Վրաստանում նախագահական ընտրությունների երկրորդ փուլի նախաշեմին հրաժարվել են մարիխուանա աճեցնելուց
Մարիխուանայի աճեցմանը վերաբերող օրինագիծը հետ է կանչվել Վրաստանի խորհրդարանից այն բանից հետո, երբ իշխող «Վրացական երազանք» կուսակցության առաջնորդները հանդիպել են համայն վրաց կաթողիկոս-պատրիարք Իլյա Երկրորդին։
Ինչպես հանդիպումից հետո հայտարարել է խորհրդարանի խոսնակ Գիորգի Կոբախիձեն, հոգևորականների և հասարակության դիրքորոշումից բացի հաշվի է առնվել նաև նախագահի իշխանամետ թեկնածու Սալոմե Զուրաբիշվիլիի դիրքորոշումը, որը նույնպես դեմ է այս նախագծին։
• Վրաստանի կառավարությունը պլանավորում է մարիխուանայի արտահանում սկսել
• Նոր նարկոքաղաքականություն․ արդյո՞ք Պորտուգալիայի օրինակը կարող օգտակար լինել
«Մեր կուսակցության ներսում ի սկզբանե տարբեր դիրքորոշումներ կային։ Մենք ի սկզբանե հայտարարել ենք, որ ցանկացած որոշում կայացվելու է լայն խորհրդատվությունների հիման վրա և համաձայնեցվելու է եկեղեցու հետ։ Այդ խոստումը մենք կատարել ենք։ Սալոմե Զուրաբիշվիլին սկզբունքային դիրքորոշում է արձանագրել, որ, ելնելով հասարակության տրամադրություններից, աննպատակահարմար կլիներ հետաձգել որոշման ընդունումը։ Հետևաբար, մենք այդ որոշումը հիմա ենք կայացրել և հետ ենք կանչել նախագիծը», — ասել է Կոբախիձեն։
• Սեպտեմբերի 11-ին Վրաստանի կառավարությունն օրենսդրական նախաձեռնությամբ էր hանդես եկել, որի համաձայն՝ Վրաստանում թույլատրվում է մարիխուանա աճեցնել հետագայում բժշկական և կոսմետիկ նպատակներով արտահանելու համար։ Նախագիծը մշակվել է ներքին գործերի նախարարության հետ։ Օրինագծում ընդգծվում էր, որ Վրաստանում մարիխուանան աճեցվելու է միայն բժշկական և կոսմետիկ նպատակներով արտահանելու համար։
• Դրան հետևեց Վրաց ուղղափառ եկեղեցու և հասարակության մեծ մասի դժգոհությունը։ Հոկտեմբերին փաստաթղթի քննարկումը կասեցվել էր, բայց հետ չէր կանչվել։ Այն ժամանակ Կոբախիձեն հայտարարել էր, որ խորհրդարանում օրինագծի քննարկմանը կվերադառնան ընտրություններից հետո։
• Վերջերս իշխող կուսակցության ղեկավար, միլիարդատեր Բիձինա Իվանիշվիլին խոստովանել է, որ անձամբ է մասնակցել Վրաստանում բժշկական նպատակներով մարիխուանա աճեցնելու գաղափարի մշակմանը։ Նրա խոսքով՝ մարիխուանայի արտահանումը Վրաստանին հնարավորություն կտար տարեկան մեկ միլիարդ դոլար վաստակել (Վրաստանի ՀՆԱ գրեթե 6%-ը):
