Վրաստանում Հայաստանի նոր դեսպան է նշանակվել խորհրդարանի պասիվ պատգամավորներից մեկը

Լուսանկարը՝ civilnet-ից

Հայաստանը Վրաստանում այսուհետ դիվանագիտական նոր ներկայացուցիչ կունենա: Հայաստանի նախագահի հրամանագրով Վրաստանում արտակարգ և լիազոր դեսպան Յուրի Վարդանյանն ազատվել է պաշտոնից: Նրա փոխարեն դեսպան է նշանակվել է Ռուբեն Սադոյանը:

Ինչ վերաբերում է նորանշանակ դեսպանին, դժվար է ասել, թե ինչ դիրքորոշում ունի Ռուբեն Սադոյանը հայ-վրացական հարաբերությունների, տարածաշրջանային զարգացումների մասին: Բանն այն է, որ պատգամավորության տարիներին, ըստ parliament monitoring կայքի, նա որևէ անգամ ելույթ չի ունեցել, նախաձեռնություններով հանդես չի եկել:

Ռուբեն Սադոյանը համարվել է ԱԺ 5-րդ գումարման 4-րդ նստաշրջանի «չխոսկան» պատգամավորներից մեկը:

Հայաստանում մամուլը գրում է այն մասին, որ Ռուբեն Սադոյանի թեկնածությունն առաջարկվել է նրանից հետո, երբ վրացական կողմը չի համաձայնել Կովկասի ինստիտուտի փոխտնօրեն, քաղաքագետ Սերգեյ Մինասյանի թեկնածության հետ:

Վրաստանի արտաքին գործերի նախարարությունը Մինասյանին ագրեման չտրամադրելուց հետո հայկական մամուլում հրապարակված հնարավոր պատճառների վերաբերյալ հոդվածներին պատասխանեց հետևյալ հայտարարությամբ.

«Երբ դեսպանի հետ կապված որոշում է ընդունվում, այն միշտ հանրային է լինում։ Այս թեմայի վերաբերյալ որևէ շահարկում անելը տեղին չէ»:

Սերգեյ Մինասյանի թեկնածությունը մերժելուց հետո վրացական կողմը համաձայնել է Ռուբեն Սադոյանի թեկնածության հետ, ով Երևանի կենտրոն համայնքի ղեկավար Արա Սադոյանի եղբայրն է: Դեղին մամուլում լուրեր են շրջանառվում, թե այս թեկնածության հաստատման հարցում դեր են կատարել Հայաստանի և Վրաստանի կառավարող որոշ շրջանակների մտերմիկ հարաբերությունները: