Վրաստանում կգործարկվի զբաղվածության ծրագիր սոցիալապես անապահովների համար

Սոցիալական ապահովման և զբաղվածության ծրագիր Վրաստանում

Մարտի 1-ից կգործարկվի զբաղվածության ծրագիր բնակչության սոցիալապես անապահով շերտերի համար, որի շրջանակում աշխատանքի կտեղավորվի 200 հազար մարդ, ասել է Վրաստանի վարչապետ Իրակլի Ղարիբաշվիլին։

Նա նշել է, որ դա կրկնակի արդյունք է ունենալու․ մի կողմից՝ կավելանա նպաստառու գործազուրկների եկամուտը, մյուս կողմից՝ զգալի հասարակական բարիքներ կստեղծվեն նոր ենթակառուցվածքի ստեղծման կամ եղածի բարելավման համար։

«Աշխատատեղերը կստեղծվեն հատուկ թիրախային խմբերի համար, և դա կլինի այնպիսի աշխատանք, որը կկարողանա անել որակավորում ունեցող ցանկացած մարդ։ Դա կօգնի բարձրացնել մոտիվացիան և կխթանի ակտիվությունն աշխատաշուկայում։ Մենք մշակել ենք ծրագիր՝ առաջատար արևմտյան փորձին համապատասխան», — ասել է Ղարիբաշվիլին։

• Էրդողանի կառավարությունը՝ լիրայի փորձությանը դեմ հանդիման

Նրա խոսքով՝ ծրագիրն օգտակար կլինի աշխատունակ անձանց, որոնք սոցիալական նպաստ են ստանում 18 տարեկանից մինչև կենսաթոշակային տարիք, չունեն հաշմանդամություն կամ առողջական լուրջ խնդիրներ։ Թափուր աշխատատեղեր կստեղծեն նաև համայնքապետարաններն ու նախարարությունները։ Վարչապետի խոսքով՝ առաջին փուլում կստեղծվի 50 հազար աշխատատեղ։

Ըստ Ղարիբաշվիլիի՝ ծրագիրն իրականացնելու է զբաղվածության պետական գործակալությունը, և շահառուն հնարավորություն կունենա ընտրելու պետական ծառայությունը կամ թափուր հաստիքը, որ կապված է հմտությունների, փորձի և աշխատաշուկայում պրոֆեսիոնալ զարգացման հետ։ Իսկ սոցիալապես անապահովների համար, որոնք սկսելու են աշխատել, պետական օգնությունը չի դադարելու չորս տարի շարունակ։

«Օգնությունը, որը մարդը ստանում է այսօր, կտրամադրվի ևս չորս տարի։ Այս ծրագրի յուրաքանչյուր մասնակցի կտրվի լրացուցիչ 300 լարի [մոտ $100]։ Մի կողմից՝ մարդիկ սոցիալական օգնություն կստանան, որ որոշ դեպքերում կարող է կազմել 400-500 լարի [մոտ $140-170], գուցե 700-800 լարի [մոտ $240-270]։ Բացի այդ, նրանք լրացուցիչ 300 լարի կստանան պետությունից». — ասում է Ղարիբաշվիլին։

Վարչապետի խոսքով՝ մարդը շարունակելու է նպաստ ստանալ, անգամ եթե չհամաձայնի առաջարկներից որևէ մեկին, սակայն մեկ տարի անց ընտանիքի սոցիալ-տնտեսական դրությունը կվերանայվի․

«Աշխատատեղերի լայնամասշտաբ ծրագիրը, մեր կարծիքով, կարևոր քայլ է աղքատության դեմ պայքարում։ Մի կողմից՝ մենք մեր 200 հազար համաքաղաքացիներին կտրամադրենք լավագույն եկամուտները, աշխատանքի և ինքնաիրացման արժանապատիվ պայմաններ, մյուս կողմից՝ մենք նրանց պետք է դարձնենք մրցունակ, նպատակասլաց, որպեսզի նրանք կարողանան ամբողջությամբ ներգրավվել մեր երկրի վերականգնման գործընթացին»։

Վիճակագրության ազգային բյուրոյի տվյալներով՝ Վրաստանի բնակչության 13,7 տոկոսը սոցիալական նպաստ է ստանում, իսկ դա նշանակում է, որ յուրաքանչյուր յոթերորդը գտնվում է ծայրահեղ աղքատության մեջ։ Համավարակի մեկնարկից ի վեր այդպիսի մարդկանց թիվն ավելացել է 16 տոկոսով, և այժմ նպաստ է ստանում ավելի քան կես միլիոն մարդ՝ 510 343։

Պետությանը սոցիալական նպաստ ստանալու դիմում ներկայացրածների տվյալների բազայում գրանցված անձանց թիվը նույնպես ավելացել է համավարակի մեկնարկից ի վեր։