«Նպատակն այլախոհներին ոչնչացնելն է»․ կարծիք Վրաստանի սահմանափակող օրենքների մասին
Վրաստանի սահմանափակող օրենքների մասին
«Եթե անարդարությունը դեռ չի անդրադարձել բոլորի վրա, ապա կանդրադառնա: Իրավիճակում, որում մենք հայտնվել ենք, անարդարությունը թափանցում է այն օդ, որը շնչում ենք: Երբ մենք փորձենք գտնել անկախ լրատվամիջոց, այն արդեն գոյություն չի ունենա: Երբ փորձենք գտնել իրավասու, անկախ և անվճար իրավաբան, մենք այլևս չենք կարողանա գտնել»,- Վրաստանի մոտ ապագայի վերաբերյալ այսպիսի մռայլ կանխատեսումներ է արել «Օրենքի գերակայության կենտրոն» կազմակերպության հիմնադիր Լոնդա Տոլորայան:
Նրա խոսքով՝ «Վրացական երազանք» կուսակցության կողմից ընդունված նոր սահմանափակող օրենքների և փոփոխությունների նպատակը միայն մեկն է՝ ոչնչացնել բոլորին, ովքեր մտածում և գործում են այլ կերպ:
«Նրանք, ովքեր դեռ կարծում են, թե այս իշխանությունները գործում են հանուն մեր երկրի բարօրության կամ որևէ «ապօրինի գործունեության» կանխարգելման նպատակով, խորապես սխալվում են:
2002 թվականից ի վեր ես ուսումնասիրում եմ մեր օրենսդրությունը, և կարող եմ ձեզ հավաստիացնել, որ մենք միշտ էլ ունեցել ենք օրենքներ, որոնք կանխարգելում են ապօրինի գործունեությունը:
Նոր օրենքների նպատակը, սակայն, ոչ թե անօրինության դեմ պայքարն է, այլ ոչնչացնելը բոլորին, ովքեր մտածում և գործում են այլ կերպ»,- ասել է Տոլորայան:
Լոնդա Տոլորայայի կարծիքով՝ «Վրացական երազանքի»՝ քննադատության դեմ «հիստերիկ պատերազմի» նպատակն այլախոհներին լռեցնելն է, թույլ չտալը, որ նրանք ազատորեն արտահայտեն իրենց մտքերը նույնիսկ ընկերների և գործընկերների շրջապատում։
Նա ենթադրում է, որ ՀԿ-ների և մեդիայի ներկայացուցիչները, որոնց դեմ առաջին հերթին ուղղված են սահմանափակող օրենքները, կդիմադրեն, կգտնեն իրենց ճանապարհը, քանի որ «նրանք ունեն բավարար կրթություն, հմտություններ, պայմանագրեր և չեն վախենում աշխատանքը կորցնելուց»: Միևնույն ժամանակ շեշտում է՝ կքանդվի ինչ-որ իսկապես կարևոր բան՝ հասարակությունը կկորցնի ճշմարիտ տեղեկատվության, անվճար իրավաբանական աջակցության և այլ ծառայություններին հասանելիությունը, ծառայություններ, որոնք ապահովում էին այդ կազմակերպություններն ու լրատվամիջոցները:
Հետևեք մեզ — Facebook | Youtube | Telegram
Վրաստանի սահմանափակող օրենքների մասին
