Վրաստանի նախկին նախագահ Գիորգի Մարգվելաշվիլին վերադառնում է քաղաքականություն
Վրաստանի չորրորդ նախագահ Գիորգի Մարգվելաշվիլին հայտարարել է քաղաքականություն վերադառնալու մասին։ Նա այդ մասին գրել է իր Twitter–ում։
Գիորգի Մարգվելաշվիլին 2010-ականների սկզբին համարվում էր «Վրացական երազանք» իշխող կուսակցության առաջնորդ Բիձինա Իվանիշվիլիի մերձավոր համախոհը։ Հենց ամենազոր օլիգարխ Իվանիշվիլին էր ժամանակին նրա թեկնածությունն առաջադրել նախագահի պաշտոնում, և շնորհիվ նրա ակտիվ աջակցության՝ Մարգվելաշվիլին 2013 թ–ին հաղթել էր ընտրություններում և դարձել Վրաստանի նախագահ։
Իվանիշվիլիի հետ իր տարաձանությունները նա բացատրում է նրանով, որ իշխող կուսակցությունը գնում է դեպի ավտորիտարիզմ, ինչը սպառնալիքներ է ստեղծում ինչպես երկրի արտաքին քաղաքական ուղղության, այնպես էլ ներքին կայունության համար։
«Հենց այդ պատճառով եմ ակտիվ քաղաքականություն վերադառնում, և ընկերներիս ու ժողովրդի հետ միասին ծառայելու եմ Վրաստանի արևմտյան առաքելությանը», — գրում է Մարգվելաշվիլին։
By choosing authoritarianism, Georgian Dream crossed red lines. No democracy — no national unity, no western path. Won’t watch this happen. Returning to active politics. Will serve the mission of our western choice with my friends and the Georgian people.
— Giorgi Margvelashvili (@MargvelashviliG) February 17, 2020
Դեռևս հայտնի չէ, թե արդյոք Մարգվելաշվիլին անդամակցելու է որևէ կուսակցության, իր կուսակցությունն է հիմնելու, թե գործելու է որպես առանձին քաղաքական գործիչ։
•Ամեն ինչ Վրաստանի 2020 թ–ի ընտրությունների մասին
Գիորգի Մարգվելաշվիլին Վրաստանի չորրորդ նախագահն է դարձել 2013 թ–ին՝ այդ պաշտոնում փոխարինելով Միխեիլ Սաակաշվիլիին։ Մասնագիտությամբ նա փիլիսոփա է։
Նրա հարաբերությունները քաղաքական հովանավոր Բիձինա Իվանիշվիլիի հետ փչացել էին երդմնակալությունից անմիջապես հետո, երբ նա որպես նստավայր էր ընտրել նախագահական պալատը, որը նրանից առաջ Սաակաշվիլին էր զբաղեցնում։ Դրանով նա թերևս վերջնականապես զայրացրել էր Բիձինա Իվանիշվիլիին, որն այլ տարբերակներ էր առաջարկում նախորդ իշխանությունների հետ չասոցացվելու համար։
Հետագայում Գիորգի Մարգվելաշվիլիի հնգամյա ողջ նախագահության ընթացքում Իվանիշվիլին նրան բազմիցս անվանում էր իր գլխավոր քաղաքական հիասթափությունը։
Իշխող թիմն ընդհանրապես նրան համարում էր իր գլխավոր ընդդիմադիրը։
Նախագահական լիազորությունների ժամկետի սպառվելուց հետո Մարգվելաշվիլին հայտարարել էր քաղաքականությունից հեռանալու մասին՝ ասելով․ «Ես քաղաքական հավակնություններ չունեմ»։
Նա երբեմն մասնակցում էր հեռուստահաղորդումների որպես փորձագետ։
2019 թ–ի ամռանը Մարգվելաշվիլին աջակցություն էր հայտնել Թբիլիսիի ցույցերի ալիքին և բազմիցս ելույթներ ունեցել հակակառավարական ակցիաների ամբիոններից։
