Վրաստանի նախագահի իմպիչմենտ Եվրոպա այցելությունների համար
Օգոստոսի 31-ին Վրաստանի նախագահ Սալոմե Զուրաբիշվիլին Գերմանիայում հանդիպել է իր գերմանացի գործընկեր Ֆրանկ-Վալտեր Շտայնմայերի հետ։ Լուսանկարները տարածել է նախագահի աշխատակազմը։ Իշխող կուսակցությունը հայտարարել է, որ Զուրաբիշվիլին «կոպտորեն խախտում է Սահմանադրությունը», քանի որ նախագահին եվրոպացի առաջնորդների հետ հանդիպելու թույլտվություն չեն տրամադրել, և այժմ նրան իմպիչմենտ է սպառնում։
Նախագահի աշխատակազմը հայտնել էր, որ Սալոմե Զուրաբիշվիլին մտադիր է մի շարք հանդիպումներ անցկացնել եվրոպացի առաջնորդների հետ՝ լոբբինգ իրականացնելու համար, որպեսզի նրանք աջակցեն Վրաստանին ԵՄ անդամության թեկնածու երկրի կարգավիճակ տրամադրելու հարցում:
Իշխող ուժ․ «Նախագահը իմպիչմենտից խուսափելու համար ընդդիմության վրա է հույս դրել»
«Մենք գիտենք, որ Սալոմե Զուրաբիշվիլին դեմ է արտահայտվում երկրի եվրաինտեգրման շահերին։ Եվ կարևոր չէ՝ նա եվրաինտեգրման դեմ հայտարարություններ կանի Վրաստանի խորհրդարանում, թե արտասահմանյան այցի ժամանակ։ Մեր միջազգային գործընկերներն ամեն դեպքում կստանան այդ տեղեկատվությունը»,- ասել է իշխող «Վրացական երազանք» կուսակցության նախագահ Իրակլի Կոբախիձեն։
«Նախագահը «կոպտորեն խախտում է Սահմանադրությունը»՝ «կոլեկտիվ ազգային շարժման աջակցությամբ» պատասխանատվությունից խուսափելու հույսով։ Սա, իհարկե, անպատասխան թողնել չենք կարող»,- զգուշացրել է նա։
Կոբախիձեի խոսքով՝ նախագահին իմպիչմենտի ենթարկելու համար խորհրդարանում 100 ձայն է անհրաժեշտ։
Վրաստանի խորհրդարանում կա 150 պատգամավոր, նրա ներկայիս կազմում իշխող «Վրացական երազանքն» ունի 84 մանդատ։ Ընդդիմությունն ունի 66 պատգամավոր, որից՝
«Ուժը միասնության մեջ է» կոալիցիա՝ 36,
«Միացյալ ազգային շարժում» (ստեղծվել է նախկին նախագահ Միխեիլ Սաակաշվիլիի կողմից)՝ 30,
«Վրաստանի համար»՝ 6,
«Եվրոպական Վրաստան»՝ 5,
«Լելո»՝ 4,
«Ագմաշենեբելիի ռազմավարություն»՝ 4,
«Հայրենասերների դաշինք»՝ 4,
«Գիրչի»՝ 4,
«Պետությունը ժողովրդի համար»՝ 3,
«Քաղաքացիներ»՝ 2,
«Առաջընթաց և ազատություն»՝ 2,
Ազգային դեմոկրատական կուսակցություն՝ 1,
Լեյբորիստական կուսակցություն՝ 1։
«Սալոմե Զուրաբիշվիլին և «Ազգային շարժումը» ընդհանուր հովանավորներ ունեն, և նա նրանցից երաշխիքներ է ստացել։ Հակառակ դեպքում նման ռիսկի չէր դիմի և կոպտորեն չէր խախտի Սահմանադրությունը։
Հասարակությունը քիչ թե շատ տեղյակ է, թե ում նկատի ունենք: Դա համաշխարհային պատերազմի կուսակցությունն է»,- ասել է Կոբախիձեն։
Օգոստոսի 30-ին Վրաստանի նախագահի աշխատակազմը հայտարարություն էր տարածել, ըստ որի՝ նախագահ Սալոմե Զուրաբիշվիլին սկսում է եվրոպացի առաջնորդների հետ հանդիպումների շարք Վրաստանին ԵՄ անդամության թեկնածու երկրի կարգավիճակ շնորհելուն աջակցելու նպատակով։
Հաջորդ օրը՝ օգոստոսի 31-ին, Վրաստանի կառավարությունը հայտարարեց, որ նախագահին Գերմանիա այցելելու թույլտվություն չի տվել։ Նրան նաև մերժել են պաշտոնական այցեր և հանդիպումներ ունենալ Ուկրաինայում, Շվեյցարիայում, Լեհաստանում, Բելգիայում, Դանիայում, Արաբական Միացյալ Էմիրություններում, Բուլղարիայում, Չեխիայում և Իսրայելում։
«Նախագահին հիշեցնում ենք, որ Վրաստանի Սահմանադրության 52-րդ հոդվածի 1-ին կետի «ա» ենթակետի համաձայն՝ Վրաստանի նախագահն արտաքին հարաբերություններում ներկայացուցչական լիազորություններն իրականացնում է միայն կառավարության համաձայնությամբ, քանի որ Սահմանադրության 54-րդ հոդվածի 1-ին կետի համաձայն՝ երկրի արտաքին քաղաքականությունը կառավարությունն է վարում»,- հայտարարել է կառավարությունը։
