Վրաստանի խորհրդարանի նախագահը հերթական անգամ թիրախավորել է JAMnews-ը
Վրաստանի խորհրդարանի նախագահը քննադատել է JAMnews-ին
Վրաստանի խորհրդարանի նախագահ Շալվա Պապուաշվիլին հերթական անգամ խեղաթյուրել է փաստերն ու քննադատել JAMnews անկախ լրատվամիջոցին։
Պապուաշվիլին կրկնել է սուտը, թե իբր JAMnews-ի աշխատակիցն իշխող «Վրացական երազանք» կուսակցության պատգամավորներին սպառնացել է 84 փամփուշտով։
«Ցավոք, շաբաթներ ու ամիսներ են անցել, և մենք չենք տեսել մեկ եվրոպացի դեսպանի, ով կարձագանքեր, օրինակ՝ JAMnews-ի աշխատակցի կողմից խորհրդարանականների հասցեին հնչած 84 փամփուշտների մասին սպառնալիքներին։ Չնայած այս կազմակերպությունը ֆինանսավորվում է ԵՄ բյուջեից, սակայն ոչ մի եվրոպացի դիվանագետ կամ քաղաքական գործիչ այդ առիթով մտահոգություն չի հայտնել»,- հայտարարել է խոսնակը։
JAMnews-ը բազմիցս պարզաբանել է, որ գրառումը, որը Պապուաշվիլին անվանում է «սպառնալիք», եղել է մեջբերում Թբիլիսիի կամուրջներից մեկի վրա պատկերված գրաֆիտիից: Մեր պարբերականը որևէ առնչություն չունի ո՛չ այդ գրության, ո՛չ էլ այս համատեքստում Պապուաշվիլիի հիշատակած տեսանյութի հետ։
Խոսքը JAMnews-ի ֆեյսբուքյան էջում 2024 թվականի մայիսի 28-ին հրապարակված տեսանյութի մասին է։ Այս տեսանյութում երևում է գրաֆիտի, որն ինչ-որ մեկը պատկերել է Թբիլիսիի Վախուշտի կամրջի վրա՝ հասարակական վայրում և հանրության տեսադաշտում. «84 դավաճան՝ 84 փամփուշտ ծոծրակին»։
Ակնհայտ է, որ նկատի է առնվում այն, որ «օտարերկրյա գործակալների մասին» օրենքի ընդունման համար տրված խորհրդարանական 84 ձայները վտանգի տակ են դնում ողջ երկիրը։ Սակայն հետագայում ի հայտ եկան արտահայտության բոլորովին այլ մեկնաբանություններ։ Պապուաշվիլին սկսեց հայտարարել, որ Եվրամիության կողմից ֆինանսավորվող մեր պարբերականը, իբր, կոչ է անում ուղղակի հաշվեհարդար տեսնել այդ պատգամավորների հետ։
Նման մեկնաբանությունները կանխելու համար հեռացրել ենք այդ գրառումը և հայտարարել, որ կտրականապես դեմ ենք ցանկացած տեսակի բռնության։
Այս ամենը JAMnews-ի խմբագրությունը մեկ անգամ չէ, որ բացատրել է կայքում տեղադրված հատուկ հայտարարությամբ և իշխանամետ լրատվամիջոցներին տրված մեկնաբանություններում։
Չնայած դրան՝ «Վրացական երազանքի» քարոզչամեքենան շարունակում է կանխամտածված ստեր տարածել և հարձակվել անկախ լրատվամիջոցների վրա։
Հարձակումները շարունակվում են ինչպես պաշտոնական հայտարարությունների, այնպես էլ քարոզչական ֆեյսբուքյան էջերի, բոտերի ու տրոլ ֆերմաների միջոցով։
Այս առումով հատկապես ակտիվ է ինքը՝ խորհրդարանի նախագահը։
Հետաքրքիր է, որ Պապուաշվիլիի այսօրվա հայտարարությանը նախորդել է նույնաբովանդակ գրառում, որն արվել է ֆեյսբուքյան ֆեյք էջերից մեկում, որտեղ հաճախ հայտնվում են լրագրողների, ակտիվիստների և ՀԿ-ների ներկայացուցիչների դեմ ուղղված կեղծ, ատելություն հրահրող գրառումներ։
«Անցել է երկու ամիս այն օրից, երբ արտասահմանյան դրամաշնորհներով ֆինանսավորվող JAMnews պարբերականի լրագրող Իրակլի Դաթունաշվիլին սպառնացել էր կրակել [պատգամավորների] գլխին։ Մինչ օրս ոչ մի դոնոր չի արձագանքել դրան: Ավելին, նա [Դաթունաշվիլին] հավանաբար մինչ օրս աշխատավարձ է ստանում օտարերկրյա դրամաշնորհից։ Բռնության ժխտումը բռնության խրախուսում է»,- գրում է նշված էջը, որի հղումը մենք միտումնավոր չենք տեղադրում։
Այս հրապարակմանն անմիջապես հաջորդեց խորհրդարանի նախագահի հայտարարությունը:
Նախկինում Պապուաշվիլին արդեն իսկ արել էր մի քանի հայտարարություններ՝ նվիրված JAMnews-ին։ Հունիսի 11-ին նա Facebook-ում հրապարակել էր գրառում, որտեղ կոնկրետ լրագրողների և ակտիվիստների (այդ թվում՝ մեր պարբերականին) մեղադրել էր «կազմակերպված և քաղաքական դրդապատճառներ ունեցող ահաբեկչական արշավ իրականացնելու մեջ»։
Ուղիղ մեկ ժամ անց իր տան մոտ ծեծի էր ենթարկվել այդ գրառման մեջ հիշատակված քաղաքացիական ակտիվիստ Զուկա Բերձենիշվիլին։
Այն ժամանակ մենք տարածեցինք հայտարարություն, որում ասվում էր, որ Բերձենիշվիլիի վրա հարձակումը մեզ ստիպում է մտածել, որ մեր աշխատակիցներին կարող է վտանգ սպառնալ, և JAMnews-ը դրա ողջ պատասխանատվությունը դնում է կառավարության վրա։
