Վրաստանի ավելի քան 300 լրագրողներ պահանջում են ազատ արձակել Մզիա Ամաղլոբելիին
Վրաստանի ԶԼՄ-ների պահանջը՝ ազատ արձակել Մզիա Ամաղլոբելիին
Վրաստանի ավելի քան 300 լրագրողներ, խմբագիրներ և մեդիա մենեջերներ համատեղ հայտարարությամբ են հանդես եկել՝ պահանջելով անհապաղ ազատ արձակել «Batumelebi» և «Netgazeti» պարբերականների համահիմնադիր և տնօրեն Մզիա Ամաղլոբելիին, ով արդեն 16-րդ օրն է հացադուլ անում բանտում՝ ընդունելով միայն ջուր։
Լրագրողները դիմել են լրագրողների իրավունքները պաշտպանող միջազգային կազմակերպություններին և բարեկամ երկրների դիվանագիտական կորպուսի ներկայացուցիչներին՝ խնդրելով «հանդես գալ օլիգարխ Բիձինա Իվանիշվիլիի ռեժիմի կողմից Վրաստանում լրագրողների զանգվածային հետապնդման փաստերի դեմ»։
Մզիա Ամաղլոբելին Վրաստանում առաջին կին լրագրողն է, ով դարձել է խղճի բանտարկյալ։
Amnesty International-ը խղճի բանտարկյալ է համարում այն անձանց, ովքեր բանտարկությամբ կամ այլ եղանակով ազատությունից զրկվել են իրենց համոզմունքների, արտահայտած տեսակետների կամ ազգային, ռասայական և այլ պատկանելության համար և որպես պարտադիր պայման` որևէ բռնություն չեն գործադրել կամ քարոզել:
- «ԼՂ-ի նախկին ղեկավարների նկատմամբ Բաքվում հոգեներգործուն միջոցներ են կիրառվում». Փաշինյան
- Էստոնիայի խորհրդարանը «Վրացական երազանքի» կառավարությունը ոչ լեգիտիմ է ճանաչել
«Մզիա Ամաղլոբելին պատժի է ենթարկվում իր անկողմնակալ լրագրողական գործունեության և օրինակելի քաղաքացիական ակտիվության համար, որոնք անընդունելի են օլիգարխ Բիձինա Իվանիշվիլիի ռեժիմի համար։ Նա չի կատարել քրեական հանցագործություններ, որոնց մեջ նրան մեղադրում է ռեժիմը։
Հունվարի 12-ից, երբ օլիգարխը գերեվարեց մեր գործընկեր Մզիա Ամաղլոբելիին, մեզանից յուրաքանչյուրին ձերբակալություն է սպառնում մեր մասնագիտական գործունեության համար։
Վրաստանում մեդիա միջավայրը կտրուկ վատթարացել է «Վրացական երազանքի» կառավարման վերջին տարիներին։ Բացի այն, որ 2024 թվականի ամռանն ընդունված «Օտարերկրյա ազդեցության թափանցիկության մասին» օրենքը սպառնում է փակել անկախ մեդիա կազմակերպությունները, հաճախակի են դարձել իշխանության ներկայացուցիչների կողմից լրագրողներին վիրավորելու և ֆիզիկական բռնության ենթարկելու դեպքերը։ Բացի այդ, սկսվել են ռուսական տիպի բռնաճնշումներ ԶԼՄ ներկայացուցիչների նկատմամբ»,- ասված է լրագրողների համատեղ հայտարարության մեջ։
Հայտարարության հեղինակներն ընդգծում են, որ 2024 թվականի նոյեմբեր-դեկտեմբեր ամիսներին պրոեվրոպական հանրահավաքների լուսաբանման ժամանակ արձանագրվել է ուժայինների կողմից լրագրողների նկատմամբ բռնություն գործադրելու ավելի քան 90 դեպք, իսկ քննչական մարմինները չեն հետաքննել այդ գործերից ոչ մեկը, չեն պատժել մեղավորներին։
Բացի այդ, նույն ժամանակահատվածում բազմաթիվ լրագրողներ վարչական կարգով ձերբակալվել են և ազատ են արձակվել տուգանքներ վճարելուց կամ մի քանի օր վարչական կալանքի տակ մնալուց հետո։
«Այն փաստը, որ Մզիա Ամաղլոբելին ձերբակալվել է քրեական մեղադրանքով, վկայում է այն մասին, որ օլիգարխի ռեժիմը մտել է իրեն քննադատող լրագրողներին հետապնդելու նոր փուլ, ինչը ներառում է կեղծ մեղադրանքների հիման վրա նրանց բանտարկումը՝ այնպես, ինչպես դա վերջին տարիներին տեղի է ունենում Ռուսաստանում, Բելառուսում, հարևան Ադրբեջանում և այլուր։
Մենք պահանջում ենք անհապաղ ազատ արձակել խղճի բանտարկյալ Մզիա Ամաղլոբելիին։ Կոչ ենք անում լրագրողների իրավունքները պաշտպանող միջազգային կազմակերպություններին և բարեկամ երկրների դիվանագիտական կորպուսի ներկայացուցիչներին հանդես գալ օլիգարխ Բիձինա Իվանիշվիլիի ռեժիմի կողմից Վրաստանում լրագրողների զանգվածային հետապնդումների դեմ և պաշտպանել Վրաստանի ԶԼՄ ներկայացուցիչներին»,- իրենց հայտարարության մեջ շեշտել են Ամաղլոբելիի գործընկերները։
Ի՞նչ է հայտնի Ամաղլոբելիի առողջական վիճակի մասին
Հունվարի 27-ին Վրաստանի երիտասարդ իրավաբանների ասոցիացիան, որը պաշտպանում է Մզիա Ամաղլոբելիի շահերը, հայտնել է, որ լրագրողի կյանքը վտանգված է։ Ասոցիացիան Արդարադատության նախարարությանը կոչ է արել «անհապաղ հանդես գալ հայտարարությամբ և պարբերաբար հանրությանը տեղեկություններ տրամադրել Մզիա Ամաղլոբելիի առողջական վիճակի մասին»։
Մզիա Ամաղլոբելիի ձերբակալման օրվանից նրա մտերիմ գործընկերը՝ Batumelebi-ի խմբագիր Էթերի Թուրաձեն հանդիպում է խնդրում գլխավոր դատախազի և խորհրդարանի խոսնակի հետ՝ նրանց Ամաղլոբելիի առողջական վիճակի մասին տեղեկություններ տրամադրելու համար, սակայն մինչ օրս նրանցից պատասխան չի ստացել։
Քրեակատարողական ծառայությունն իր հերթին պնդում է, որ Մզիա Ամաղլոբելին ստանում է պատշաճ բժշկական օգնություն և գտնվում է բուժանձնակազմի մշտական հսկողության տակ։
«Ընդ որում, մեղադրյալը իր իսկ շահերից ելնելով տեղափոխվել է տեսահսկման համակարգով հագեցած խուց՝ անհրաժեշտության դեպքում անհապաղ արձագանքելու համար»,— հավելում է քրեակատարողական ծառայությունը։
Մզիա Ամաղլոբելիի գործը
Batumelebi и Netgazeti անկախ առցանց լրատվամիջոցների համահիմնադիր և տնօրեն Մզիա Ամաղլոբելին երկու անգամ ձերբակալվել է Վրաստանի հարավ-արևմուտքում գտնվող Բաթումի քաղաքի ոստիկանության շենքի առջև ընթացող բողոքի ակցիայի ժամանակ՝ հունվարի 11-ի լույս 12-ի գիշերը։
Առաջին անգամ նրան ձերբակալել են այն բանի համար, որ ոստիկանության շենքին է փակցրել համընդհանուր գործադուլի կոչով պիտակ, սակայն մի քանի ժամ անց գրավով ազատ են արձակել։
Դրանից կարճ ժամանակ անց Ամաղլոբելին կրկին ձերբակալվել է իր հանդեպ բազմակի վիրավորանքներից հետո քաղաքային ոստիկանության պետ Իրակլի Դգեբուաձեին ապտակ հասցնելու համար։ Միջադեպին նախորդել էր ցուցարարների և ոստիկանության միջև բախումը, որն ուղեկցվել էր ուժայինների սադրիչ գործողություններով։
Ձերբակալությանը հաջորդած երեք ժամերի ընթացքում լրագրողին թույլ չէին տվել հանդիպել փաստաբանի հետ։ Ամաղլոբելին Վրաստանի օմբուդսմենի ներկայացուցչին պատմել էր նաև իր նկատմամբ դաժան վերաբերմունքի մասին։
Մզիա Ամաղլոբելին մեղադրվում է ոստիկանության աշխատակցի վրա հարձակվելու մեջ։ Այդ հոդվածով նրան սպառնում է 4-7 տարվա ազատազրկում։ Որպես խափանման միջոց ընտրվել է երկամսյա կալանքը։
