Վրաստանի դատախազությունը մեղադրանք է առաջադրել Ցխինվալիի իրավապահներին Արչիլ Թաթունաշվիլիի կտտանքների փաստի վերաբերյալ

Վրաստանի դատախազությունը հեռակա կերպով մեղադրանք է առաջադրել Ցխինվալիի շրջանի այսպես կոչված իրավապահ մարմինների աշխատակիցներ Դավիթ Գուրցիևին և Ալիկ Տաբոևին: Նրանք մեղադրվում են Վրաստանի քաղաքացի Արչիլ Թաթունաշվիլիին, Լևան Քութաշվիլիին և Իոսեբ Պավլիաշվիլին ազատազրկելու և կտտանքների ենթարկելու համար:

Դավիթ Գուրցիևն օկուպացված Ախալգորիի դատախազի օգնականն է, իսկ Ալիկ Տաբոևն այսպես կոչված ՊԱԿ բաժնի պետը: Նրանց մեղադրանք է առաջարդվել ՔՕ 143 և 25-1441 հոդվածների համաձայն, ինչը ենթադրում է 9-15 տարվա ազատազրկում:

Քննության ընթացքում դատախազությունը պարզել է, որ Արչիլ Թաթունաշվիլին պարբերաբար այցելել է օկուպացված Ախալգորիի շրջան՝ զբաղվելով փոքր բիզնեսով: Օկուպացված Ցխինվալիի իրավապահ մարմիններին 2018թ-ի փետրվարի 20-ին հայտնի է դարձել, որ Արչիլ Թաթունաշվիլին ծառայել է Վրաստանի զինված ուժերում 2008թ-ի օգոստոսին, և 2018թ-ի փետրվարի 22-ին նա Լևան Քութաշվիլիի և Իոսեբ Պավլիաշվիլիի հետ միասին ձերբակալվել է:

Թաթունաշվիլին Ցխինվալի է տարվել ձեռնաշղթաներով և դատախազության շենքում կտտանքների ենթարկվել, ինչի հետևանքով նրա մարմնի վրա խեղման ավելի քան 100 հետք է մնացել: Թաթունաշվիլին մահացել է հաջորդ օրը՝ չպարզված հանգամանքներում:

Օսական կողմը վարկած է առաջ քաշել այն մասին, որ 35-ամյա Արչիլ Թաթունաշվիլին «փետրվարի 23-ի գիշերն ընկել է Ցխինվալիի մեկուսարանի աստիճաններին և ավելի ուշ սրտի անբավարարությունից մահացել հիվանդանոցում, ուր տեղափոխվել էր բուժօգնություն ստանալու նպատակով»:

Առաջադրված վարկածին չի հավատում ոչ պաշտոնական Թբիլիսին, ոչ Թաթունաշվիլիի ընտանիքը: Կասկածներն առ այն, որ Թաթունաշվիլին մահացել է բռնի մահով ամրապնդվում են նաև նրանով, որ գրեթե մեկ ամիս շարունակ օսական կողմը հրաժարվում էր հարազատներին տրամադրել մահացածի մարմինը:

Թաթունաշվիլիի մարմինը վրացական կողմին է փոխանցվել միայն մարտի 20-ին: JAMnews-ն առաջին պարբերականն էր, որը տեղեկատվություն է հրապարակել այն մասին, որ փոխանցված մարմնում բացակայել են որոշ օրգաններ՝ սիրտը և ուղեղը:

Հրապարակման մեջ տեղ գտած տերմինները, տեղանունները, մտքերը և գաղափարները պարտադիր չէ, որ համընկնեն JAMnews-ի կամ նրա առանձին աշխատակիցների կարծիքների և գաղափարների հետ: JAMnews-ն իրավունք է վերապահում հեռացնել հրապարկումների վերաբերյալ արված այն մեկնաբանությունները, որոնք կգնահատվեն որպես վիրավորական, սպառնալիք պարունակող, բռնություն հրահրող կամ այլ պատճառներով էթիկապես անընդունելի