Վրաստանի դատախազությունը գաղտնի է պահում ահաբեկչության կասկածյալի անունը

Թբիլիսիի քաղաքային դատարանը ամբողջությամբ պաշտպանեց դատախազության դիրքորոշումն ու վարած քննությունը, և նոյեմբերի 22-ի հակաահաբեկչական գործողության ընթացքում ձերբակալված օտարերկրյա քաղաքացուն ժամանակավորապես կալանավորեց:

Սակայն ձերբակալվածի անունը և քաղաքացիությունը նախկինի պես գաղտնի է պահվում:

Դատախազ Նանա Խունչուան լրագրողներին հայտարարել է, որ քննության շահերից ելնելով՝ չի բացահայտում մեղադյալի անունը և քաղաքացիությունը, ինչպես նաև գործով այլ մանրամասներ:

«Մենք չենք կարող նշել նրա անունը, քանի որ գիտենք նրա դիրքորոշումն այդ հարցում: Բացի այդ, ելնելով քննության շահերից՝ մենք նաև նպատակահարմար չենք համարում այս փուլում բացահայտել նրա ինքնությունը»,- նրա խոսքերն է մեջբերում «Նովոստի-Գրուզիան»:

Դատախազությունը հրապարակում է միայն նրա անվատանատառերը՝ Ս.Դ, և նշում, որ նա ձերբակալվել է նոյեմբերի 21-ին՝ օպերատիվ տեղեկատվության հիման վրա՝ դեռ նախքան հատուկ գործողության անցկացումը: Ընդ որում, նրա մոտ հայտնաբերվել է անօրինական ճանապարհով ձեռք բերված հրազեն և մարտական փամփուշտներ:

Ձերբակալվածի պետական պաշտպան Իմեդա Կարկաշաձեն հայտարարում է, որ իր պաշտանյալն օգտվում է լռելու իրավունքից և չի ընդունում իր դեմ առաջադրված մեղադրանքները: Փաստաբանը նաև հայտնել է, որ մեղադրյալը Ռուսաստանի քաղաքացի է:

Դատախազ Իրակլի Մարշանիան մեկնաբանել է, որ «այդ գործում հիմնավորված ենթադրություններ կան առ այն, որ մեղադրյալն անդամակցել է ահաբեկչական կազմակերպության, ինչպես նաև նա մեղադրվում է ահաբեկչական նպատակներով հրազեն, պայթուցիկ նյութեր և զինամթերք ձեռք բերելու և պահելու մեջ»,- ասել է Մարշանիան:

«Քննությունը պարզել է, որ Ս.Դ-ն հաստատվել քուրմ Գաբրիել Սալոսի փողոցի բնակարաններց մեկում իր 3 համախոհների հետ, որտեղ նա և իր համախոհները պահում էին ահաբեկչական նպատակներով ձեռք բերված պայթուցիկ նյութերը, զինամթերքը, պայթուցիկ սարքերը և հրազենը»,- ասվում է դատախազության հաղորդագրության մեջ:

Ս.Դ-ի ձերբակալությունից հետո իրավապահները նրա համախոհներին առաջարկել են վայր դնել զենքերը և հանձնվել, սակայն այդ պահանջին ի պատասխան՝ նրանք ձեռքի նռնակներ են պայթեցրել և հրազենից ինտենսիվ կրակ բացել իրավապահների ուղղությամբ, ասվում է դատախազության հաղորդագրության մեջ:

Նոյեմբերի 22-ին Թբիլիսիի Գաբրիել Սալոսի փողոցում Վրաստանի հատուկ ծառայությունների կողմից 22 ժամ տևած հատուկ գործողության արդյունքում ահաբեկչության հետ առնչություն ունեցող 3 մեղադրյալները սպանվել են: Նրանցից մեկը ձերբակալվել էր նախօրեին: Սակայն թե ովքեր են նրանք՝ առայժմ չի հաղորդվում: Անվտագության ծառայության տեղեկատվության համաձայն՝ խմբում Վրաստանի քաղաքացիներ չկան: Ընդ որում, չի հաղորդվում՝ որ երկրի քաղաքացիներ են նրանք և ինչպես են հայտնվել Վրաստանում:

Մեկնաբանություններում ուժային կառույցների ղեկավարությունը նշում է, որ կատարվածը կապ ունի միջազգային ահաբեկչության հետ, և, այդ գործով քննություն տարվում է ոչ միայն Վրաստանում, այլև արտասահմանում:

Միաժամանակ, մի շարք փորձագետներ և թուրքական մամուլը հայտարարում են, որ Թբիլիսիում չեզոքացվել է Ահմեթ Չաթաևը՝ Սիրիայում «Իսլամական պետություն» ահաբեկչական կազմակերպության բջիջներից մեկը պարագլուխը, որը մեղադրվում է 2016թ. Ստամբուլի օդանավակայանում ահաբեկչություն իրականացնելու մեջ:

Դատական նիստն ընթացել է փակ ռեժիմով

Դատավոր Ռոման Խորավան որոշում է ընդունել ոչ միայն փակ պահել նիստը, այլև դատավարությունը սկսվելուց մի քանի րոպե առաջ փոխել դահլիճը, որտեղ պետք է տեղի ունենար նիստը: Լրագրողները կարծում են, որ դա արվել է, որպեսզի իրենք չկարողանան տեսնել մեղադրյալին:

Դատախազ Մարշանիայի խոսքով՝ դատարանը որոշում է կայացրել փակել նիստը՝ ապահովելու համար հակաահաբեկչական գործողությանը մասնակցած իրավապահ մարմինների աշխատակիցների անվտանգությունը:

Մեղադրյալի դեմ քրեական գործը հարուցված է հետևյալ հոդվածներով. «օտարերկրյա կամ օտարերկրյա պետության ենթակայության տակ գտնվող ահաբեկչական կազմակերպությանն անդամակցություն, կամ դրան օժանդակություն ահաբեկչական գործողության մեջ» և «հրազենի, զինամթերքի, պայթուցիկ նյութերի և պայթուցիկ սարքերի անօրինական ձեռքբերում, պահում, կրում, պատրաստում, տեղափոխում, փոխանցում, սպառում և օգտագործում՝ ահաբեկչական նպատակներով»:

Այս հոդվածները նախատեսում են 10-17 տարվա ազատազրկում:

Գործով նախապատրաստական նիստը նշանակված է 2018թ. հունվարի 18-ին: