Վրաստանը 2017թ-ին առանց «Գազպրոմի» բնական գազի կմնա

Մինչև տարվա վերջ Վրաստանը չի պլանավորում «Գազպրոմից» գազ գնել: Համապատասխան կանխատեսումային բալանսը հաստատվել է ապրիլի 7-ին էներգետիկայի նախարար Կախա Կալաձեի կողմից:

Կառավարությունը պլանավորում է ապրիլից բնակչությանն ու առևտրային հատվածին ապահովել բացառապես ադրբեջանական գազով: Ադրբեջանի պետական նավթային ընկերությունը (SOCAR) գազի մատակարարումն իրականացնելու է Շահդենիզ գազի հանքավայրից Բաքու-Թբիլիսի-Էրզրում գազատարով:

Կանխատեսումային բալանսի համաձայն, այս տարի Վրաստանը 2,457 մլրդ կուբամետր գազ կստանա, որից Ադրբեջանից ներկրվող գազին բաժին է ընկնում 2,347 մլրդ կուբամետրը, կամ ընդհանուր ծավալի 95,5%-ը:

—Այս փուլում Վրաստանի բնական գազի հիմնական մատակարարն Ադրբեջանն է: Նախորդ տարի Վրաստանում օգտագործվող բնական գազի ընդհանուր ծավալի 87,1%-ն Ադրբեջանն է մատակարարել: Վրաստանն ադրբեջանական գազն արտոնյալ գներով է գնում. բնակչությանն այն վաճառվում է 120 ԱՄՆ դոլարով 1000 կուբամետրի դիմաց, ՋԷԿ-երին՝ 143 ԱՄՆ դոլար 1000 կուբամետրի դիմաց, ինչը զգալիորեն ցածր է այն գնից, որը «Գազպրոմն» առաջարկում է իր ռազմավարական գործընկեր Հայաստանին: Ներկա պահին Հայաստանը վճարում է 165 ԱՄՆ դոլար 1000 կուբամետր ռուսական գազի դիմաց:

—Ադրբեջանական գազից բացի Վրաստանը ռուսական գազ էլ է ստանում, չնայած՝ փոքր ծավալներով: 2014թ-ին Վրաստանը 267 մլն 773 հազար կուբամետր ռուսական գազ է ստացել, ներառյալ 206մլն 166 հազար կուբամետր՝ տարանցման դիմաց: Վրաստանը ստանում է 221 կմ երկարությամբ Հյուսիս-Հարավ գազատարով Հայաստան տարանցվող ռուսական բնական գազի ընդհանուր ծավալի 10%-ը:

— Մոտ 2,1 մլրդ կուբամետր բնական գազ է տարանցվել Հայաստան Վրաստանի տարածքով անցնող գլխավոր գազատարով: Վրաստանը ստացել է տարանցված գազի ընդհանուր ծավալի 0,3 մլրդ կուբամետրը:

— «Գազպրոմը» համաշխարհային մասշտաբի խոշորագույն ռուսական ընկերություն է: Պետության մասնաբաժինն ընկերության կապիտալում կազմում է 51%: