Աբխազիայի Գուլրիփշի շրջանում սկանդալ է տեղի ունեցել։ Էթնիկ հայերով բնակեցված Ցկիբին գյուղի մուտքի մոտ գտնվող ցուցանակի վերականգնման ժամանակ փակցվել է գյուղի խորհրդային անվանումը՝ Շահումյանովկա (ի պատիվ Ստեփան Շահումյանի)։
Ստեփան Շահումյան (1878-1918) —հայ հեղափոխական, կովկասյան բոլշևիկների ղեկավար։ Խորհրդային տարիներին նրա անունով են կոչվել Կովկասի բազմաթիվ քաղաքներ, գյուղեր, փողոցներ և այլն։
Սոցցանցերում հրապարակված «նոր՝ հին» ցուցանակի լուսանկարը վրդովմունք է առաջացրել։
Արդյունքում գյուղի բնակիչները, որոնք առանց թույլտվության փոխել էին ցուցանակը, ստիպված են եղել ներողություն խնդրել շրջանի վարչակազմից։
Իսկ հետո Աբխազիայի հայ համայնքը հայտարարել է, որ ցուցանակի փոփոխությունը մասնավոր նախաձեռնություն է՝ նշելով, որ «կիսում է երկրի բոլոր տեսակի բնակավայրերի տեղանունների ինքնակամ փոփոխությունների շուրջ առաջացած տագնապն ու մտահոգությունը»։
«Մենք հանդես ենք գալիս օրենքները խստորեն պահպանելու անհրաժեշտության օգտին, մասնավորապես՝ գյուղերի, քաղաքների և այլ տիպի վարչական կազմավորումների փաստացի անվանումների պահպանման օգտին։
Աշխարհագրական վայրի յուրաքանչյուր անվանում պատմաբանների, համապատասխան մասնագետների աշխատանքի, ինչպես նաև երկրի տեղանուններում արձանագրված պատմաաշխարհագրական առանձնահատկությունների արդյունք է»,— ասված է համայնքի տարածած հաղորդագրության մեջ։
Կատարվածի պատասխանատուներին սպառնացել են վարչական տույժերով, ցուցանակը հանվել է, իսկ «պաշտոնականը» շուտով կվերադարձվի։
Հայերը աբխազներից հետո երկրորդ էթնիկ խումբն են երկրում։ Տեղի հայերի մեծ մասը Թուրքիայից փախստականների ժառանգներ են։
Հայ-աբխազական հարաբերությունները հանրապետությունում զգայուն թեմա են։ Ըստ էության, կան չբարձրաձայնվող պայմանավորվածություններ համայնքի արտոնյալ լիազորությունների վերաբերյալ։
