«Սիրել Կադիրովին»․ Չեչնիայի նախագահն առաջատար ռուս բլոգերների հետ նկարահանվում է «հումորիստական» տեսանյութերում

Չեչնիայի ղեկավար Ռամզան Կադիրովը նոր դերով է հանդես եկել՝ դերասանի։ Նա ռուս հայտնի բլոգերների հետ ընկերակցություն է ստեղծում և մեկը մյուսի հետևից «հումորիստական» կարճ տեսապատմություններ թողարկում, որոնք կոչված են նրան ցուցադրելու որպես բարի և ուժեղ առաջնորդ, պատմում է ռուսական Medialeaks–ը։

Երկու պատմություն

• Տեսանյութ․ Պուտինով հիանալու վերաբերյալ լավագույն բանաստեղծության մրցույթ Ռուսաստանում

«Չեչեներեն սովորիր, և կինդ հնազանդ կլինի»

Այս հոլովակը նկարահանվել է բլոգեր Արտյոմ Կալայջյանի մասնակցությամբ, որն Ինստագրամում շուրջ երեք միլիոն հետևորդ ունի։

Բլոգերը մեկ բաժակ թեյի շուրջ պատմում է Ռամզան Կադիրովին պատմություն այն մասին, թե ինչպես է իրեն կանգնեցրել ճանապարհային ոստիկանությունը, սակայն նրան զանգահարում է կինն ու խանգարում ավարտել պատմությունը։ Նա կնոջն ասում է, որ զբաղված է, սակայն կինը կրկին է զանգահարում, այդ ժամանակ հեռախոսը վերցնում է Կադիրովը։

Նա բլոգերի կնոջ հետ խոսում է չեչեներեն և հաղորդում, որ բլոգերն իր հյուրն է և շուտով տուն կվերադառնա։ Հիացած կինը Կադիրովին պատասխանում է, որ հասկացավ, թե նա ինչ ասեց, թեև մինչ այդ չեչեներեն չգիտեր, նաև որ ամուսնուն այլևս չի շեղելու «հիմար զանգերով»։

Ցնցված բլոգերն ասում է, որ այժմ նա էլ է չեչեներեն սովորելու։

https://www.instagram.com/p/B50MLWOoxSv/?utm_source=ig_web_copy_link

«Թշնամիները սարսափելի չեն, եթե մարզիչդ Կադիրովն է»

Մեկ այլ հոլովակում Կադիրովը նկարահանվել է ռուս երեք բլոգերների հետ․ Արտյոմ Կալայջյանից բացի նկարահանվել են նաև Միխայիլ Լիտվինը, որն ավելի քան ութ միլիոն հետևորդ ունի, և Ամիրան Սարդարովը՝ գրեթե երեք միլիոն հետևորդներով։

Երկու երիտասարդները վիճում են, երրորդը նրանց առաջարկում է հարցերը ռինգում պարզել։ Երկու մրցակիցներն էլ մարզվում են, սակայն Կալայջյանի մարզիչը Ռամզան Կադիրովն է դառնում։ Նա բլոգերին հարվածներ է սովորեցնում, ստիպում մարզվել և սովորեցնում «մարտիկի իսկական հայացք» ունենալ։ Արտյոմ Կալայջյանը ռինգ է բարձրանում Կադիրովի հետ միասին, որին տեսնելով՝ մրցակիցն ուշագնաց է լինում՝ դեռ մարտը չսկսված։

 

View this post on Instagram

 

A post shared by РОФ им.Ахмата Кадырова (@za_kadyrova_95eng) on Dec 4, 2019 at 9:03am PST

«Սպանել և նստեցնել այնքան ժամանակ, քանի դեռ համացանցում ներդաշնակություն չի հաստատվել»

Այս գովազդային արշավը քննադատելու ցանկություն ունեցողներին Ռամզան Կադիրովը դեռ դրա մեկնարկից առաջ նախազգուշացրել է՝ ելույթ ունենալով Չեչնիայի կառավարության նիստին․

«Անգամ եթե ողջ աշխարհը կապույտ բոցով այրվի, եթե նույնսիկ բոլոր երկրների օրենքները խախտվեն, մի՞թե մենք աչք կփակենք մարդու վրա, որը ոտնահարում է [համացանցում մեկ այլ մարդու] պատիվը։ Երդվում եմ սուրբ Ղուրանով, չենք փակի»։

Իսկ դրանից առաջ Չեչնիայի ղեկավարն առաջարկել էր «սպանել, նստեցնել և ահաբեկել հեյթերներին և թրոլներին այնքան ժամանակ, քանի դեռ համացանցում ներդաշնակություն և փոխադարձ հարգանք չի հաստատվել»։ Իրավապաշտպանների պահանջով Ռուսաստանի ՆԳՆ–ն այդ կոչը քննել է, բայց օրենքի ոչ մի խախտում չի գտել։