Սաակաշվիլին վատացել է դատարանի դահլիճում
Վրաստանի նախկին նախագահ Միխեիլ Սաակաշվիլին վատացել է դատարանի դահլիճում և դիմել բժշկի։ Նախկին նախագահի կողմից սահմանն ապօրինի հատելու գործով դատավարությունը ժամանակավորապես կասեցվել է։
Կես ժամ դադարից հետո Սաակաշվիլին վերադարձել է դահլիճ և խոսել իր առողջական վիճակի մասին։ Սաակաշվիլիի խոսքով՝ ինքը մշտական թուլություն, անքնություն ունի, իսկ կիրակի օրը՝ ապրիլի 17-ին, ամբողջովին կորցրել է ոտքերի վերահսկողությունը։
«Հիմա այն քաշին եմ, ինչ հացադուլի ամենակրիտիկական շրջանում էի, վերջին օրերին նիհարել եմ մոտ 12 կգ, հազիվ եմ ուտում… Կիրակի օրը ամբողջովին կորցրեցի ոտքերիս վերահսկողությունը, ինչի պատճառով թեթև ցավեր ունեմ ձեռքերի և ոտքերի շրջանում։ Սա գործնականում տեսել են հանրապետական հիվանդանոցում և ասել, որ վիճակը ծանր է, ես արել եմ այն, ինչ ինձ ասել են բժիշկները…. Այս բանտը, իհարկե, ամենևին էլ հարմարեցված չէ որևէ բանի բուժման համար, սա հասկանալի է, բայց ես շնորհակալ եմ բժիշկներին… Ես չէի կարող շարունակել ներկա գտնվել… եթե չլինեին ուժեղ ցավազրկողները [ …]»,- ասել է նախկին նախագահը։
Նրա խոսքով՝ սա հետտրավմատիկ համախտանիշ է։ Նա հիշեց, որ ավելի վաղ իրեն ճիշտ ախտորոշում տված բժշկի ամուսինը ազատվել է առողջապահության նախարարությունում զբաղեցրած պաշտոնից այն բանից հետո, երբ ախտորոշումը հայտնվել է լրատվամիջոցներում։
Սաակաշվիլին իր ելույթում անդրադարձավ նաև իր «Միացյալ ազգային շարժում» կուսակցությանը և հայտարարեց, որ այդ կուսակցությունը ոչ թե պատերազմի, այլ Վրաստանի պաշտպանության և գոյատևման կուսակցություն է։
«Ողջ տարածաշրջանին և աշխարհին մեծ փոփոխություններ են սպասվում։ Ուկրաինան և աշխարհը հաղթում են այս պատերազմում և հաղթում են Վրաստանի դարավոր թշնամուն։ Այնպես որ, պետք չէ բարդույթավորվել: Հիմա հասկացաք, թե ինչից փրկեցինք Թբիլիսին ու Վրաստանի մյուս շրջանները 2008 թ.-ին: Փաստն այն է, որ Վրաստանի համար մեծ վտանգ էր պատրաստվում ու պատրաստվում է։ Իսկ Ուկրաինայում բացվեցին ռուսամետ կազմակերպությունների հարյուրավոր գրասենյակներ, սակայն Զելենսկին ժամանակին փակեց դրանք։ Դրանք բացվել են նաև Վրաստանում։ Այդ գրասենյակները բացվել են դեռ պատերազմից առաջ, քանի որ հենց վերջացնեին Ուկրաինայի հետ, ներխուժելու էին այստեղ։ Ուկրաինան կանգնեց այս նենգ ծրագրի ճանապարհին»,- ասել է Միխեիլ Սաակաշվիլին։
Իշխանությունների կողմից հետախուզվող Վրաստանի երրորդ նախագահ Միխեիլ Սաակաշվիլին գաղտնի վերադարձել է Վրաստան 2021 թվականի հոկտեմբերի 1-ին և ձերբակալվել և Ռուսթավիի բանտից տեղափոխվել Թբիլիսիի ծայրամասում գտնվող բանտ (Գլդանիի շրջան):
Ձերբակալությունից անմիջապես հետո նախկին նախագահը ի նշան բողոքի հացադուլ է հայտարարել։ Սաակաշվիլին իրեն համարում է ՌԴ նախագահ Վլադիմիր Պուտինի և Վրաստանի ոչ պաշտոնական կառավարիչ Բիձինա Իվանիշվիլիի քաղբանտարկյալն ու անձնական բանտարկյալը։
Նախկին նախագահը 50 օր հացադուլ է հայտարարել։ Վերջին երկու շաբաթվա ընթացքում նա հրաժարվում էր դեղորայք ընդունելուց։ Նրա վիճակը օրեցօր վատանում էր։ Վրաստանի հանրային պաշտպան Նինո Լոմջարիայի կողմից ստեղծված բժիշկների խումբը նրա վիճակը գնահատել էր ծանր։
Վրաստանի քաղաքացիական հասարակությունը, դիվանագետները, շարքային քաղաքացիները, դերասանները, գրողները և այլ հասարակական գործիչներ կոչ են արել կառավարությանը նախկին նախագահին տեղափոխել մասնագիտացված կլինիկա։ Այս հարցումը կառավարություն են ներկայացրել Հանրային պաշտպանը և Վրաստանի պետական տեսուչի ծառայությունը։ Նույն կոչով է հանդես եկել ԱՄՆ Պետդեպարտամենտը։ Ի վերջո, նոյեմբերի 19-ին երրորդ նախագահը տեղափոխվել է Գորիի զինվորական հոսպիտալ։
Բացի այդ, նոյեմբերի 10-ին Մարդու իրավունքների եվրոպական դատարանը ժամանակավոր միջոց կիրառելու մասին որոշում է կայացրել՝ Սաակաշվիլիին խնդրելով դադարեցնել հացադուլը, իսկ պետությանը հանձնարարելով ապահովել բանտարկյալի անվտանգությունն ու նրա հանդեպ պատշաճ վերաբերմունքը:
