Միխեիլ Սաակաշվիլիին հիվանդանոցից բանտ են տեղափոխել
Սաակաշվիլին հիվանդանոցից բանտ է տեղափոխվել
Վրաստանի երրորդ նախագահ Միխեիլ Սաակաշվիլին «Վիվամեդ» կլինիկայից տեղափոխվել է ուղղիչ հիմնարկ, որտեղ կշարունակի կրել իր պատիժը ընդհանուր հիմունքներով։ Այս մասին հայտարարել է Հատուկ ուղղիչ ծառայությունը։
Ծառայությունը բացատրել է, որ Սաակաշվիլին դուրս է գրվել հիվանդանոցից, քանի որ նրա առողջական վիճակը բավարար է գնահատվում, նա այլևս ստացիոնար բուժման կարիք չունի։
«Հանրությունը տեղյակ է, որ 2022 թվականի մայիսի 12-ին դատապարտյալ Միխեիլ Սաակաշվիլին տեղափոխվել է «Վիվամեդ» կլինիկա՝ ստացիոնար բուժում ստանալու նպատակով, որտեղ էլ նա գտնվում էր մինչ օրս և ստանում էր համապատասխան բժշկական օգնություն։
Վրաստանի օրենսդրության համաձայն՝ քաղաքացիական հիվանդանոցից քրեակատարողական հիմնարկ բուժառուի վերադարձի հարցը որոշում է բուժող բժիշկը՝ հաշվի առնելով բանտարկյալի առողջական վիճակը։
Քանի որ դատապարտյալ Միխեիլ Սաակաշվիլիի առողջական վիճակը բավարար է և նա այլևս ստացիոնար բուժման կարիք չունի, նա դուրս է գրվել քաղաքացիական բուժհիմնարկից և տեղափոխվել է թիվ 12 քրեակատարողական հիմնարկ, որտեղ նա կշարունակի կրել իր պատիժը ընդհանուր հիմունքներով», — ասվում է հայտարարության մեջ։
Միխեիլ Սաակաշվիլին ձերբակալվել է 2021 թվականի հոկտեմբերի 1-ին և դատապարտվել ընդհանուր առմամբ 12 տարի վեց ամիս ժամկետով ազատազրկման՝ մի քանի մեղադրանքով։
Ըստ դատավճռի՝ Սաակաշվիլիին պատիժը կրելուց հետո իրավունք չի ունենա առաջին երեք տարիներին որևէ պետական պաշտոն զբաղեցնել։
Այս տարվա նոյեմբերի 7-ին սկսվել են նոր քրեական հետապնդումներ արևմտամետ ընդդիմության առաջնորդներ Միխեիլ Սաակաշվիլիի, Գիորգի Վաշաձեի, Նիկա Գվարամիայի, Նիկանոր Մելիայի, Զուրաբ «Գիրչի» Ջապարիձեի, Էլենե Խոշտարիայի, Մամուկա Խազարաձեի և Բադրի Ջապարիձեի դեմ։
Դատախազության փոխանցմամբ՝ քրեական հետապնդումը սկսվել է դիվերսիայի, օտարերկրյա պետության կողմից թշնամական գործունեությանը օժանդակելու և դրդելու, Վրաստանի սահմանադրական կարգի և ազգային անվտանգության դեմ ուղղված գործունեության ֆինանսավորման, ինչպես նաև Վրաստանի սահմանադրական կարգի բռնի փոփոխության և պետական իշխանության տապալման կոչերի մեղադրանքներով։
Նոր մեղադրանքով Սաակաշվիլիին սպառնում է երկուսից չորս տարի ժամկետով ազատազրկում։
Հետևեք մեզ — Facebook | Youtube
Սաակաշվիլին հիվանդանոցից բանտ է տեղափոխվել
