«Սաակաշվիլին ինքնասպանության իրավունք ունի», - ասել է Վրաստանի վարչապետը

Սաակաշվիլին «ինքնասպանության իրավունք ունի»․ Վրաստանի վարչապետի խոսքերն են մեկնաբանում իրավաբանները

JAMnews-ի հետ զրույցում իրավաբանները «աբսուրդային, կեղծ և վտանգավոր» են անվանել Վրաստանի վարչապետի խոսքերն այն մասին, որ բանտում հացադուլ հայտարարած նախկին նախագահ Միխեիլ Սաակաշվիլին «օրենքով՝ ինքնասպանության իրավունք ունի»։

«Եթե մարդը վնաս է հասցնում իր առողջությանը, այլ ոչ թե ուրիշի, ապա, ըստ օրենքի, նա այդ իրավունքն ունի։ Սակայն, իհարկե, պետությունը չի կարող դրա համար պատասխանատվություն ստանձնել», — ասել է Վրաստանի վարչապետ Իրակլի Ղարիբաշվիլին հոկտեմբերի 29-ին «Իմեդի» հեռուստաընկերության եթերում՝ պատասխանելով լրագրողի հարցին, թե ինչով կարող է ավարտվել Միխեիլ Սաակաշվիլիի հացադուլը։

Վարչապետն ասել է, որ «իշխանությունը [Սաակաշվիլիի] համար անում է հնարավոր ամեն ինչ»։ Այդ թվում, նա նշել է, որ Սաակաշվիլիի առողջության հարցերով զբաղվում է բժիշկների լրացուցիչ խումբ՝ «չնայած այն բանին, որ նրան՝ որպես բանտարկյալի, արդեն անթերի բժշկական օգնություն է ցուցաբերվում»։

«Մենք նրա համար լիակատար հարմարավետ պայմաններ ենք ստեղծել, որպեսզի մեզ ուղղված հարցեր չլինեն», — ասել է վարչապետը։

Վարչապետի այս խոսքերը վրդովմունք են առաջացրել իրավաբանների և իրավապաշտպանների շրջանում։

«Դա սուտ է, կարծես օրենքում ինչ-որ տեղ գրված է, որ մարդ ինքնասպանության իրավունք ունի։ Նման բան գրված չէ և չի կարող լինել, քանի որ կյանքի իրավունքը չի ներառում ինքնասպանության իրավունք։ Եվ դա ոչ միայն Վրաստանի ներքին իրավունքի ստանդարտ է, այլև միջազգային ստանդարտ, որը երաշխավորվում է մարդու իրավունքների մասին օրենսդրությամբ», —JAMnews-ին ասել է Վրաստանի երիտասարդ իրավաբանների ասոցիացիայի նախագահ Նիկա Սիմոնիշվիլին։

Ամեն ինչ լիովին հակառակն է․ պետությունը պարտավոր է պաշտպանել ցանկացած մարդու կյանքի իրավունքը։ Եվ հատկապես դա վերաբերում է բանտարկյալներին։

«Պետությունը պարտավոր է ապահովել կյանքի և առողջության համար անվտանգ միջավայր նրանց համար, ովքեր իր վերահսկողության տակ են, նախևառաջ՝ բանտարկյալների։ Սրանք նրանց բազային իրավունքներն են», — ասել է Նիկա Սիմոնիշվիլին։

«Վրացական ժողովրդավարական նախաձեռնության» նախագահ Էդուարդ Մարիկաշվիլին JAMnews-ին հայտարարել է, որ վարչապետի հայտարարությունն իրականում շատ վտանգավոր ուղերձ էր։

«Մարդն ինչ որոշում էլ կայացնի իր կյանքի վերաբերյալ, եթե պետությունն ազդեցության լծակներ և դրան միջամտելու հնարավորություն ունի, նա պարտավոր է դա անել։

Սա շատ լուրջ հայտարարություն է։ Այն կարող է դասական օրինակ լինել այն բանի, որ պետական պաշտոնյան կարող է խրախուսել ինքնասպանությունը երկրում», — ասել է Էդուարդ Մարիկաշվիլին։

«Լելո» ընդդիմադիր կուսակցության իրավաբան և անդամ Անա Նացվլիշվիլին «Պիրվելի» հեռուստաալիքին հայտարարել է, որ վարչապետի խոսքերը «ոչ մի կապ չունեն իրավունքի և արդարության վերականգնման հետ։ Դա իսկական վրեժ է քաղաքական հակառակորդի նկատմամբ»։

• Միխեիլ Սաակաշվիլին հացադուլ է անում գրեթե մեկ ամիս։ Ի՞նչ գիտենք նրա առողջության մասին, և ի՞նչ է նրան սպասվում
• Կարծիք․ ինչո՞ւ է Սաակաշվիլին վերադարձել և արդյո՞ք Վրաստանում Մայդան կլինի

Նոյեմբերի 1-ին մեկ ամիս կլրանա, որ Վրաստանի նախկին նախագահ Միխեիլ Սաակաշվիլին հացադուլ է հայտարարել Վրաստանի Ռուսթավի քաղաքի համար 12 ուղղիչ հաստատությունում։

Հայտնի է, որ այս մեկ ամսում Սաակաշվիլին կերել է ընդամենը 50 մլ մեղր հացադուլի առաջին շաբաթը։

Բժիշկները, որոնք տեղյակ են նրա առողջության մասին, ասում են, որ ցանկացած պահի նրա վիճակը կարող է կտրուկ վատթարանալ։

Հոկտեմբերի 29-ին հայտնի է դարձել, որ Միխեիլ Սաակաշվիլին դադարեցնում է համագործակցությունը հատուկ ստեղծված բժշկական խորհրդի հետ և այլևս չի ընդունելու հացադուլի հետ կապված բուժում։ Այս հրաժարումը նույնպես բողոքի նշան է։

Միխեիլ Սաակաշվիլին կալանավորվել է 2021 թ․ հոկտեմբերի 1-ին։ Կալանքից անմիջապես հետո նա հացադուլ է հայտարարել։ Նա համաձայն չէ իր դատավճռին և իրեն քաղբանտարկյալ է համարում։

Իշխանությունն առաջվա պես հրաժարվում է նախկին նախագահին տեղափոխել որևէ բուժհաստատություն՝ բացառությամբ բանտային հիվանդանոցի։ Սակայն այդ հիվանդանոցում, ըստ ժողովրդական պաշտպանի, չկան ոչ սարքավորումներ, որոնք անհրաժեշտ են նրա բուժման համար, ոչ էլ անվտանգ պայմաններ նախկին նախագահի համար, որը բազմաթիվ թշնամիներ ունի քրեական աշխարհի ներկայացուցիչների շրջանում։

Սաակաշվիլին նույնպես համաձայն չէ տեղափոխվել բանտի հիվանդանոց։