Սաակաշվիլիի վիճակը բանտում գնալով վատանում է․ Վրաստանի օմբուդսմենին առընթեր բժիշկների խորհուրդ
Բժիշկները՝ Սաակաշվիլիի առողջական վիճակի մասին
Վրաստանի մարդու իրավունքների պաշտպան Նինո Լոմջարիայի կողմից ստեղծված բժիշկների խորհուրդը զեկույց է պատրաստել Վրաստանի նախկին նախագահ, Ռուսթավիի բանտում գտնվող Միխեիլ Սաակաշվիլիի առողջական վիճակի մասին։
«Սաակաշվիլին սպիտակուցային քաղց ունի»,- պնդում է խորհրդի անդամ, նյարդաբան Թենգիզ Ցուլաձեն։ Բժշկի խոսքով՝ Սաակաշվիլին օրական օգտագործում է սովորական կալորիաների մոտ 1/4-ը, մինչդեռ օրգանիզմն այս պահին «սպառում է ինքն իրեն»։
«Այն, ինչ մենք տեսանք, նա ավելի թույլ տեսք ունի: Մենք նայեցինք հիվանդության պատմությունը, տեսանք որոշ շեղումներ, ինչը ցույց է տալիս, որ հիվանդը ունի բացասական կատաբոլիկ վիճակ,այսինքն՝ «մարմինը սպառում է ինքն իրեն»: Այն սպիտակուցները, որոնք դրսից չեն ստացվում, օրգանիզմը փոխհատուցում է մկանների քայքայմամբ, այդ պատճառով էլ մկանային զանգվածն այս պահին կտրուկ նվազում է։ Դրա համար էլ վիճակն ավելի է վատացել»,— ասել է Ցուլաձեն։
Խորհրդի տվյալներով՝ սա կարող է կապված լինել մշտական հետտրավմատիկ սթրեսային խանգարման և դեպրեսիայի հետ, որոնք ի վերջո հանգեցնում են անորեքսիայի կամ ախորժակի կորստի: Ցուլաձեի խոսքով՝ բանտում Սաակաշվիլին ստանում է հիմնական բուժում, սակայն «դա բավարար չէ վերականգնման համար»։
«Հիվանդի և բանտի բուժանձնակազմի միջև պայմանավորվածություն ձեռք չի բերվել։ Նա գիտակցաբար կամ անգիտակցաբար հրաժարվում է սպիտակուցային սննդից, ինչին հաջորդում է սպիտակուցային քաղցը։ Սա է մեր եզրակացությունը»,- ասել է Ցուլաձեն։
Վրաստանի նախկին նախագահ Միխեիլ Սաակաշվիլին ապրիլի 20-ին վատացել էր դատարանի դահլիճում և դիմել բուժօգնության։ Նախկին նախագահի կողմից սահմանն ապօրինի հատելու գործով դատավարությունը ժամանակավորապես կասեցվել էր։
Կես ժամ դադարից հետո Սաակաշվիլին վերադարձել էր դահլիճ և պատմել իր առողջական վիճակի մասին։ Սաակաշվիլիի խոսքով՝ ինքը մշտական թուլություն, անքնություն ունի, իսկ կիրակի օրը՝ ապրիլի 17-ին, ամբողջովին կորցրել է ոտքերի վերահսկողությունը։
Միխեիլ Սաակաշվիլիի մայրը՝ Գյուլի Ալասանիան, պահանջում է նրան անհապաղ ուղարկել արտերկիր և տեղավորել համապատասխան կլինիկայում։ Պատգամավոր Էկա Խերխեուլիձեի խոսքով՝ գործնականում արգելել են ապրանքներ փոխանցել Միխեիլ Սաակաշվիլիին, նրան ասել են, որ նա չի կարող հանձնուքներ ստանալ:
Քրեակատարողական ծառայությունը նույնպես տարածել է հայտարարություն, որի համաձայն՝ Միխեիլ Սաակաշվիլին հանձնուքներ չի ստացել ընդամենը մեկ օր։ Ասվում է նաև, որ նախկին նախագահն իր համաձայնությամբ կկարողանա փաթեթներ ստանալ դրանք ուղարկելու համար պատասխանատու անձանց միջոցով։
«Հանրությանը տեղեկացնելու նպատակով պարզաբանում ենք, որ Սաակաշվիլին կարող է հաստատության տարածքում գտնվող խանութից գնել հաստատության կանոնադրությամբ չարգելված ցանկացած սննդամթերք՝ իր քարտին մուտքագրված գումարի հաշվին, և նրան տրամադրվում է նաև երեքանգամյա սնունդ»,- ասացին ծառայությունից։
Վրաստանի նախկին նախագահ Միխեիլ Սաակաշվիլին, որը հետախուզվում էր իշխանությունների կողմից, գաղտնի Վրաստան էր վերադարձել 2021 թվականի հոկտեմբերի 1-ին։ Շուտով նրան ձերբակալեցին և տեղափոխեցին Ռուսթավի քաղաքի բանտ։
Նախկին նախագահն ի նշան բողոքի 50 օր հացադուլ էր հայտարարել։ Սկզբում նրան ստիպողաբար տեղավորել էին Գլդանիի բանտի հոսպիտալում, այնուհետև, նրա վիճակի կտրուկ վատթարացումից և կողմնակիցների բազմաթիվ բողոքներից հետո, նոյեմբերի 19-ին տեղափոխել էին Գորի քաղաքի զինվորական հոսպիտալ։
Նոյեմբերի 10-ին Մարդու իրավունքների եվրոպական դատարանը որոշում կայացրեց և Միխեիլ Սաակաշվիլիին կոչ արեց դադարեցնել հացադուլը, իսկ պետությանը հանձնարարեց ապահովել բանտարկյալի անվտանգությունն ու նրա հանդեպ պատշաճ վերաբերմունքը։
