Ռուսաստանում մտահոգվում են, որ Հայաստանը գնում է Ուկրաինայի ճանապարհով

Լուսանկարը՝ azatutyun.am

Ռուսաստանին մտահոգում է Հայաստանի և Եվրամիության միջև համագործակցության մասին համաձայնագրի ստոագրումը: Փաստաթուղթն արդեն նախաստորագրված է, ենթադրվում է, որ այն կստորագրվի նոյեմբերի 24-ին Բրյուսելում մեկնարկող Արևելյան գործընկերության գագաթաժողովի ժամանակ:

Ռուսաստանի պաշտպանության նախարարության պաշտոնական լրատվամիջոցը համարվող «Զվեզդա» («Звезда») հեռուստաալիքի եթերում հաղորդավարուհի Վերոնիկա Կրաշենիննիկովան, ով իշխող «Եդինայա Ռոսիա» («Единая Россия») կուսակցության բարձրագույն խորհրդի անդամ է, քննադատել է Հայաստանին՝ համաձայնագիրը ստորագրելու համար:

Հաղորդավարուհին հայտարարել էր, որ այսպիսով Հայաստանը, որը Եվրասիական տնտեսական միության ու ՀԱՊԿ անդամ է և Ռուսաստանի միակ գործընկերն է Հարավային Կովկասում, փորձում է գնալ Ուկրաինայի ճանապարհով:

Ավելին, նա քննադատել է նաև Հայաստանի իշխող Հանրապետական կուսակցությանը, որը պատասխանատու է Հայաստանի արտաքին քաղաքականության համար: Նրա կարծիքով, կուսակցության խորհրդանիշը նման է ֆաշիստական Գերմանիայի գերբին: Բացի դրանից   պետական և ռազմական գործիչ, քաղաքագետ Գարեգին Նժդեհին, ում գաղափարախոսությունն է դրված Հանրապետական կուսակցության գաղափարախոսության հիմքում, անվանել է ֆաշիզմի հետևորդ:

«Ասոցիացիան միակ բանը չէ, որը Հայաստանն անում է Ուկրաինայի նման: Դժվար է հավատալ, բայց Երևանը հերոսացնում է նաև ֆաշիզմի հետևորդներին: 2016թ.-ի մայիսին Երևանում տեղադրվել էր Գարեգին Նժդեհի հուշարձանը: 1942 թվականին Նժեդհը դիմել է 3-րդ ռեյխին՝ խնդրելով խորհրդային Հայաստանը գերմանական գաղութ դարձնել: Նժդեհի հուշարձանը խորագույն վիրավորանք է ամբողջ հայ ժողովրդին, որը հերոսաբար կռվել է Մեծ հայրենականի ռազմաճակատներում: 106 հայեր խորհրդային միության հերոսներ են, բայց Նժդեհը հերոս է Հայաստանում իշխող Հանրապետական կուսակցության համար»,- ասել է Կրաշենիննիկովան: 

Հայաստանի հանրապետական կուսակցության ներկայացուցիչները նշել են, որ այս իրավիճակն իրենց համար արդեն զարմանալի չէ, Գարեգին Նժդեհի արձանի տեղադրման օրվանից ի վեր Ռուսաստանից հնչել են բազում քննադատական կարծիքներ, հնչել են կոչեր՝ անգամ հեռացնել այդ արձանը:

Ռուսաստանի արտգործնախարարության պաշտոնական ներկայացուցիչ Մարիա Զախարովան արձանի տեղադրումից հետո ասել էր. «Մոսկվան զարմացած է Երևանում Վերմախտի «Հայկական լեգիոնի» հիմնադիրներից մեկի՝ գեներալ Գարեգին Նժդեհի արձանի տեղադրմամբ»: Զախարովան հիշեցրել էր, թե ինչ վերաբերմունք ունի ՌԴ-ն Հայրենական Մեծ պատերազմի, նացիզմի, նեոնացիզմի, ծայրահեղականության հերոսացման վերաբերյալ:

«Այդ վերաբերմունքն արձանագրված է միջազգային փաստաթղթերում: Մեզ համար անհասկանալի է, թե ինչու է տեղադրված այդ արձանը, չէ՞ որ մենք ամեն ինչ գիտենք Հայրենական մեծ պատերազմում, Երկրորդ համաշխարհային պատերազմում հայ ժողովրդի անմահ սխրանքների մասին»,- ասել էր ՌԴ ԱԳՆ պաշտոնական ներկայացուցիչը:

Վերջերս էլ Ռուսաստանի Պետդումայի պատգամավորների, Ռուսաստանի Հանրային պալատի անդամների, փորձագետների և իրավաբանների խումբը հայտարարել էր, որ մտադիր է դիմել ՄԱԿ-ի Միջազգային դատարան՝ պահանջելով հեռացնել ֆաշիզմի հետևորդների արձանները հետխորհրդային պետություններից:

«Արդյոք Գարեգին Նժդեհի հիշատակի հավերժացումը ֆաշիզմի կամակատարների հերոսացում չէ՞»,- մեկնաբանել էր նախաձեռնողներից մեկը՝ Քաղաքական ուսումնասիրությունների ինսիտիտուտի տնօրեն Սերգեյ Մարկովը:

«Հանրապետական» խմբակցության ղեկավար Վահրամ Բաղդասարյանն իր զարմանքն է արտահայտել՝ նշելով, որ որևէ գաղտնի քայլ Հայաստանը չի կատարել և երբ միացել է Եվրասիական տնտեսական միությանը, չի ունեցել իր առջև պայման, որ չպետք է համագործակցի Եվրամիության հետ:

«Մենք տեղյակ ենք պահել, որ առաջնորդվում ենք «և-և»-ի քաղաքականությամբ, համագործակցում ենք և՛ ԵԱՏՄ հետ, և՛ ԵՄ հետ, ու մենք շարունակելու ենք համագործակցել այն երկրների հետ, որոնց հետ համագործակցության եզրեր կգտնենք», – նշել է Բաղդասարյանը:

Իսկ ՀՀԿ-ական մեկ այլ անդամ Վազգեն Կարախանյանն էլ ասել է, որ ՀՀԿ-ի խորհրդանիշը որևէ կերպ կապ չունի ֆաշիզմի, ֆաշիստական գաղափարախոսության հետ:

«Եթե նրանք նկատի ունեն սվաստիկան, ապա ասեմ, որ այն հինավուրց պատմություն ունի, դեռ ֆաշիստական Գերմանիան չկար, որ հավերժության խորհրդանիշները, արեգակի լույսը խավարի դեմ պայքարը կային: Իսկ հայ ժողովուրդն ուներ աշխարհին հաղորդակցվելու իր մոտեցումները: Այդ հաղորդավարուհու ասածն իրականության հետ աղերս չունի, շահարկում են»,- ասել է Կարախանյանը:

Ըստ նրա՝ այս զրույցները լինելու են, բայց իրենց մոտեցումները չեն փոխվելու: Անդրադառնալով այն բանին, որ թե՛ ՀՀԿ խորհրդանիշի, թե՛ հիտլերյան Գերմանիայի զինանշանի վրա արծիվի պատկեր կա, Կարախանյանն ասել է. արծիվը թռչունների արքան է, այն վկայում է հայ ժողովրդի ազատատենչ ոգու մասին, խորհրդանշում է ճախրանք, ազատություն՝ և որքան էլ փորձ է արվել կոտրել ազատ ապրելու իրավունքը, դա հայ ժողովրդին դարձել է ավելի խրոխտ ու անկախ: