Ռուսաստանի ԱԳՆ ղեկավարն Աբխազիայում նոր դեսպանատուն կբացի և նոր դեսպան կներկայացնի
Ռուսաստանի ԱԳ նախարար Սերգեյ Լավրովն այսօր երկօրյա այցով Աբխազիա է ժամանում: Պաշտոնապես նրա այցը համապատասխանեցված է Սուխումում Աբխազիայում Ռուսաստանի դեսպանության շենքային նոր համալիրի բացմանը: Պլանի համաձայն՝ բացման արարողությունը կկայանա այսօր՝ ապրիլի 18-ին, օրվա երկրորդ կեսին:
Այցի ծրագրում նախատեսված է Լավրովի հանդիպումն Աբխազիայի նախագահ Ռաուլ Հաջիմբայի և արտգործնախարար Դաուր Կովեի հետ:
Ռուսական ԱԳՆ պաշտոնական ներկայացուցիչ Մարիա Զախարովայի խոսքով՝ քննարկումների հիմնական թեման Աբազիայի միջազգային դիրքերի ամրապնդումն ու ռուս-աբխազական արտաքին քաղաքական փոխազդեցության համակարգման հարցերն են լինելու:
“Ռուսաստանի ԱԳՆ ղեկավարի այցն Աբխազիա միտված է լրացուցիչ խթան հաղորդելու ռուս-աբխազական հարաբերություններին, որոնք հիմնված են դաշնակցության և ռազմավարական գործընկերության սկզբունքների վրա”, — հաղորդել է Մարիա Զախարովան:
Ենթադրաբար այցի ընթացքում ոչ պաշտոնապես կներկայացվի Աբխազիայում Ռուսաստանի նոր դեսպանը: Աբխազիայում դեռևս գործող դեսպան Սեմյոն Գրիգորևը, որն այդ պաշտոնը զբաղեցրել է 2008թ-ին Աբխազիայում Ռուսաստանի դեսպանատան բացումից ի վեր, այլ աշխատանքի է անցնելու, Ադրբեջանում ՌԴ դեսպանն է լինելու:
ՌԴ դեսպանատունն Աբխազիայում բացվել է 2008թ-ի երկրրոդ կեսին այն բանից հետո, երբ Ռուսաստանը ճանաչել է Աբխազիայի և Հարավային Օսիայի անկախությունը: Մինչև վերջին ժամանակներս դեսպանատունը գտնվել է վարձակալած հյուրանոցի շենքում:
Պաշտոնական Թբիլիսին բողոք է արտահայտել Աբխազիա ՌԴ ԱԳ նախարարի այցի առթիվ:
Վրաստանի նախագահ Գիորգի Մարգվելաշվիլին կոչ է արել համաշխարհային հանրությանը քննադատել Ռուսաստանի գործողությունները Վրաստանի միջազգայնորեն ճանաչված տարածքում:
“Արտասահմանյան պետության ներկայացուցչի այցը Վրաստանի տարածք և այստեղ ցանկացած ներակայացուցչության բացումը հնարավոր է բացառապես Վրաստանի ղեկավարության համաձայնությամբ: Հակառակ դեպքում նման գործողությունները խախտում են ոչ միայն Վրաստանի օրենսդրությունը, այլ նաև միջազգային օրենսդրությունը”, — հայտարարել է Մարգվելաշվիլին:
