Ռուսաստանը պատրաստ է չեղարկել Վրաստանի հետ վիզային ռեժիմը
Ռուսաստանը պատրաստ է Վրաստանի հետ վիզային ռեժիմը չեղարկել: Այդ մասին այսօր՝ դեկտեմբերի 17-ին կայացած մամուլի ասուլիսին հայտարարել է Ռուսաստանի նախագահ Վլադիմիր Պուտինը:
Նրա խոսքով, Մոսկվան տրամադրված է Թբիլիսիի հետ հարաբերությունները վերականգնելուն: «Վրաստանի տարածքային ամբողջականությունը Վրաստանի գործն է, — հայտարարել է Պուտինը: — Պետք է աշխատել Աբխազիայի ու Հարավային Օսիայի հետ»:
Պուտինը նշել է նաև, որ Վրաստանի հետ հարաբերությունների «դեգրադացիայի» նախաձեռնողը Ռուսաստանը չի եղել: 2008թ. սրացման պատասխանատվությունը նա այն ժամանակվա Վրաստանի նախագահ Միխայիլ Սահակաշվիլիի «արկածախնդրային որոշումների» վրա դրեց:
Նախագահի խոսքով, Մոսկվան «ազդանշաններ է տեսնում Վրաստանի ղեկավարության կողմից, և այլ ազդանշաններն ընդունվում են»:
«Ուշադրություն դարձրեք, որ Վրաստանի գինու արտահանման ծավալների երկու երրորդը ռուսական շուկա է մտնում, այլ ոչ թե ինչ-որ հեռավոր արտասահմանյան: Մենք ընդունում ենք այդ ապրանքն այնպես, ինչպես մնացածը: Ապրանքաշրջանառության ծավալներն աճել են: Այս տարի ընդհանուր տնտեսական իրավիճակի հետ կապված մի քիչ կրճատվել է, սակայն ընդհանուր առմամբ այն աճի բավականին մեծ տեմպեր է դրսևորում», — հայտարարել է Պուտինը:
Սահակաշվիլիի մասին խոսելիս ՌԴ նախագահը հիշատակեց նրա նշանակումը որպես Օդեսայի մարզպետ՝ անվանելով դա «ուկրաինայի ժողովրդի դեմքին թքել»:
- • Ռուսաստանը Վրաստանի հետ վիզային ռեժիմի է անցել 2000թ. դեկտեմբերին: 2008թ.-ին Աբխազիայի ու Հարավային Օսիայի անկախության ճանաչումից հետո Ռուսաստանի ու Վրաստանի միջև դիվանագիտական հարաբերությունները խզվել են:
- • 2012թ. իշխանության գլուխ եկած «Վրացական երազանք» կուսակցությունը իր գլխավոր առաջնահերթություններից մեկը Ռուսատանի հետ հարաբերությունների կարգավորումն է հայտարարել:
- • Հետաքրքրական է, որ այս հայտարարությունը ժամանակային առումով համընկել է Վրաստանի ու ԵՄ միջև վիզային ռեժիմի ազատականացման գործընթացի հետ: Արդեն մի քանի օրից կհրապարակվի Վրաստանի կողմից «Վիզային ռեժիմի ազատականացման գործողությունների պլանի» կատարման վերջնական հաշվետվությունը, և, եթե այն դրական լինի, Վրաստանի քաղաքացիներն արդեն 2016թ. կարող են Եվրոպա մեկնել առանց վիզայի:
