Ռուսասատնը վերջնականապես դուրս մնաց «Եվրատեսիլ» մրցույթից և բոյկոտելու է հեռարձակումը

Ռուսաստանը չի կարող մասնակցել 2017թ-ի «Եվրատեսիլ» մրցույթին. այդ մասին պաշտոնական որոշում է կայացրել երաժշտական փառատոնի կազմակերպիչ Եվրոպական հեռարձակողների միությունը:

«Եվրատեսիլ» մրցույթի եզրափակիչը կկայանա Կիևում մայիսի 13-ին: Խնդիրները սկսվել են, երբ Ռուսաստանը որպես իր ներկայացուցիչ է ընտրել երգչուհի Յուլյա Սամոյլովային, իսկ Ուկրաինան նրան 3 տարով արգելել է Ուկրաինա մուտք գործել այն պատճառով, որ երգչուհին Ղրիմ է այցելել 2015թ-ին:

Երգչուհին պետք է ելույթ ունենար Flame Is Burning երգով:

Եվրոպական հեռարձակողների միությունն իր հայտարարությունում հաղորդել է, որ Սամոյլովայի մուտքն արգելելուց հետո Ռուսաստանին երկու տարբերակ է առաջարկվել. հեռահար մասնակցել մրցույթին կամ այլ թեկնածու ընտրել:

Երկու առաջարկներն էլ մերժվել է: Ռուսաստանի գլխավոր հեռուստաընկերությունը՝ «Առաջին ալիքը», հայտարարել է, որ ընդհանրապես չի հեռարձակելու մրցույթը:

Ռուսաստանի արտգործնախարարությունը Սամոյլովայի՝ երկիր մուտք գործելու արգելքն «անմարդկային քայլ» է անվանել:

Այդ արգելքը քննադատել է նաև «Եվրատեսիլի» կազմակերպիչը: Եվրոպական հեռարձակողների միության դիտորդական խորհրդի նախագահ Ֆրանկ-Դիտեր Ֆրեյլինգն ասել է, որ «դա հարված է մրցույթի ոչ քաղաքական բնույթին և առաքելությանը»:

«Մենք շատ էինք ուզում, որ բոլոր 43 երկրները կարողանան մասնակցել մրցույթին, և արել ենք ամեն ինչ այդ նպատակին հասնելու համար», — ասված է Եվրոպական հեռարձակողների միության հայտարարությունում: