Ռուբեն Վարդանյանը 4 ամսով կալանավորվել է
Ռուբեն Վարդանյանի ձերբակալությունը
Լեռնային Ղարաբաղի նախկին պետնախարար Ռուբեն Վարդանյանը նախաքննության արդյունքում 4 ամսով կալանավորվել է։ Որոշումն այսօր կայացրել է ադրբեջանական դատարանը։
Վարդանյանը բերման էր ենթարկվել նախօրեին Լաչինի շրջանում՝ Հայաստանի հետ Ադրբեջանի պետական սահմանը հատելու փորձի ժամանակ։ Նրան մեղադրանք է առաջադրվել Ադրբեջանի քրեական օրենսգրքի երեք հոդվածներով։
- ԼՂ-ի հայերը լքում են իրենց տները, շտապում են տեղափոխվել Հայաստան
- «Բաքուն կփորձի հայերին պահել ԼՂ-ում՝ որպես թանգարանային նմուշ»․ կարծիք
- ԼՂ-ի հայերի վերաինտեգրում. «Ֆանտաստիկայի ժանրից է»
Ռուբեն Վարդանյանը Ադրբեջանի պետական սահմանային ծառայության աշխատակիցների կողմից բերման էր ենթարկվել 2023 թվականի սեպտեմբերի 27-ին՝ Հայաստանի հետ Ադրբեջանի պետական սահմանը հատելու փորձի ժամանակ։ Նույն օրը նրան տարել են Բաքու։
«ՀՀ քաղաքացի Ռուբեն Վարդանյանը բերման է ենթարկվել և որպես մեղադրյալ ենթարկվել պատասխանատվության։
Հավաքագրված ապացույցներով հիմնավոր կասկածներ են հարուցվել առ այն, որ ՀՀ քաղաքացի հանդիսացող Ռուբեն Վարդանյանը (ծնված 1968 թ.) հանցագործություններ է կատարել Ադրբեջանի քրեական օրենսգրքի 214-1 (ահաբեկչության ֆինանսավորում), 279.3 (մասնակցություն ապօրինի զինված կազմավորումների կամ խմբերի ստեղծմանը և գործունեությանը) և 318.1 (Ադրբեջանի պետական սահմանի ապօրինի հատում) հոդվածներով։
Ռուբեն Վարդանյանը մեղադրվում է այն բանի մեջ, որ լինելով օտարերկրյա քաղաքացի, 2022 թվականի սեպտեմբերին ահաբեկչական գործողություններ կատարելու նպատակով ապօրինի հատել է Ադրբեջանի պետական սահմանը, մուտք գործել Ադրբեջանի Ղարաբաղի տնտեսական շրջան, որտեղ ժամանակավորապես տեղակայված են ՌԴ խաղաղապահները, մասնակցել է Ադրբեջանի Հանրապետության տարածքում ապօրինի զինված խմբավորումների գործունեության կազմակերպմանը, այդ ապօրինի կազմավորումներին զենք, զինամթերք, պայթուցիկ նյութեր, զինտեխնիկա մատակարարելուն, որոնք հարձակումներ են իրականացրել կազմակերպությունների, գերատեսչությունների և անհատների վրա, ինչը հանգեցրել է մարդկանց մահվան և այլ ծանր հետևանքների։
Բացի այդ, նա ֆինանսավորել է ահաբեկչությունը՝ միջոցներ ուղղելով անօրինական զինված խմբավորումների կողմից ահաբեկչական գործողությունների կազմակերպմանը։
Կատարված ապօրինի գործողությունների համար Ռուբեն Վարդանյանը սեպտեմբերի 27-ին կալանավորվել և որպես մեղադրյալ ենթարկվել է քրեական պատասխանատվության, դատարանի որոշմամբ նրա նկատմամբ խափանման միջոց է ընտրվել կալանավորումը։
Քրեական գործի շրջանակներում այս պահին շարունակում են իրականացվել օպերատիվ-քննչական միջոցառումներ»,- ասված է Ադրբեջանի Պետական անվտանգության ծառայության հաղորդագրության մեջ։
