Ռեստորանները պետք է հստակորեն պահպանեն սահմանված կանոնները, հակառակ դեպքում կկիրառվեն սանկցիաներ։ Կառավարության նիստից հետո լրագրողների հետ զրույցում ասել է Հայաստանի առողջապահության նախարարը։
Սա Անահիտ Ավանեսյանի պատասխանն էր «Ռեստորանների ասոցիացիա» ՀԿ-ի հայտարարությանը, թե չեն «պատրաստվում հնազանդվել ոլորտի համար կործանարար որոշումներին», որոնք նախօրեին ընդունել էր կառավարությունը։
Հայաստանի առողջապահական գերատեսչությունը տեղեկացրել էր, որ 2022 թ․-ի հունվարի 1-ից քաղաքացիները մշակութային միջոցառումների և հանրային սննդի վայրեր պետք է մուտք գործեն միայն պատվաստման կամ ՊՇՌ թեստի բացասական արդյունքը հավաստող փաստաթղթով։
Նոր սահմանափակումների հանրայնացումից հետո էլ հենց անհամաձայնություն էր հայտնել «Ռեստորանների ասոցիացիա» ՀԿ-ն՝ նշելով, որ ռեստորանային ոլորտն առանց այն էլ գտնվում է խիստ ծանր տնտեսական իրավիճակում։
Կազմակերպությունը պատասխանատու գերատեսչություններին կոչ էր արել զբաղվել մասնագիտական խնդիրներով և զերծ մնալ «գործարար աշխարհին միջամտելուց»՝ որոշումը բնորոշելով որպես անհիմն և բացասական հետևանքներ ունեցող նախաձեռնություն։
Անհնազանդության մասին այս հայտարաությունից հետո առողջապահության նախարարն ասել է, որ «նման արտահայտությունները որևէ կերպ չեն տեղավորվում իրավական պետության շրջանակներում»։
Ավանեսյանի համոզմամբ՝ եթե նման սահմանափակումներ չկիրառվեն, շատ ավելի վատ տնտեսական և առողջապահական վիճակի առաջ ենք կանգնելու․
«Ճիշտ ժամանակին կիրառված սահմանափակումները հնարավորություն են տալիս պաշտպանելու ոչ միայն մարդկանց կյանքն ու առողջությունը, այլև տնտեսությունը, ռեստորանների գործունեությունը»։
Վերջին մեկ օրում Հայաստանում հաստատվել է վարակման 558 դեպք: Մահացել է 21 քաղաքացի։ Համավարակի մեկնարկից մինչ օրս COVID-19-ից մահացել է 7631 մարդ։
Առողջապահության նախարարությունը շարունակում է պատվաստումների գործընթացը՝ փորձելով ապահովել օրական 20.000 պատվաստում։ Ծնողների գրավոր համաձայնությամբ պատվաստում են նաև անչափահասներին։ 18 տարին լրացած ՀՀ քաղաքացիների 40%-ն արդեն ստացել է առաջին, 23,9%-ը՝ երկրորդ դեղաչափը։
