Բոսնիական պատերազմի սերբ գեներալը դատապարտված է ցմահ ազատազարկման

Reuters

Ռատկո Մլադիչը նախկին սերբ գեներալ է, որը 1992-1995թթ-ին գլխավորել է Բոսնիայի սերբերի բանակը Հարավսլավիայում քաղաքացիական պատերազմի ժամանակ:

Նրան մեղադրել են 11 կետով: Նախկին Հարավսլավիայի հարցերով միջազգային տրիբունալը Մլադիչին մեղավոր է ճանաչել դրանցից 10-ի համար, հաղորդում է Բի-Բի-Սին:

Ամենամեծամասշտաբ հանցագործությունը Ռատկո Մլադիչը կատարել է, երբ կոչ է արել Սերեբրենիցայում 1995թ-ին սպանել ավելի քան 7 հազար մուսուլմանների:

Նա նաև ղեկավարել է Սարաևոյի պաշարումը, որը շարունակվել է մոտ երեքուկես տարի: Այդ ընթացքում քաղաքում զոհվել է մոտ 10 հազար մարդ:

Բոսնիայում պատերազմի ավարտից անմիջապես հետո Մլադիչը թաքնվել է Սերբիայում, և նրա գտնվելու վայրն անհայտ է եղել: Նա կալանավորվել է միայն 2011թ-ին սերբական հատուկ ծառայությունների գործողության արդյունքում: Մլադիչին բռնելն ու միջազգային տրիբունալին հանձնելը Եվրամիությանը Սերբիայի անդամակցության պայմաններից մեկն էր:

Մլադիչը չի ընդունում իր մեղքը: Նա բազմիցս կրկնել է, որ “պարզապես պաշտպանել է իր ժողովրդին” քաղաքացիական պատերազմում:

Դատավճռի կայացման պահին Մլադիչը դատարանի դահլիճում չի եղել: Նախկին սերբ գեներալին դուրս են հանել դատարանի դահլիճից դատավորի հասցեին արված արտահայտությունների համար: