Ռազմական գործողություններ հայ-ադրբեջանական սահմանին, կան զոհեր

Ռազմական գործողություններ հայ-ադրբեջանական սահմանին

Սեպտեմբերի 13-ի կեսգիշերից հայ-ադրբեջանական սահմանին ռազմական գործողությունները շարունակվում են։ Դեպքի վայրում գտնվող հայ լրագրողների փոխանցմամբ՝ առավոտյան ժամը 7-ի դրությամբ գնդակոծությունն այնքան ինտենսիվ չէ, որքան գիշերը, սակայն կրակոցները շարունակվում են։

Ըստ Հայաստանի պաշտպանության նախարարության՝ ադրբեջանական զինուժը կիրառել է հրետանի և անօդաչու թռչող սարքեր և գնդակոծել սահմանին մոտ գտնվող հայկական Ջերմուկ, Գորիս, Վարդենիս, Կապան քաղաքներն ու մի քանի գյուղեր, այդ թվում՝ Սոթքը։

Ադրբեջանի ՊՆ-ն հաստատել է սահմանային սրացումը, սակայն կտրականապես հերքել է ներխուժման մասին տեղեկությունը՝ հայ զինվորականներին մեղադրելով ադրբեջանական դիրքերն ականապատելու մեջ։

Երկու կողմերն էլ հայտարարել են, որ հայ զինծառայողների շրջանում կան զոհեր, սակայն ճշտված տեղեկություններ դեռևս չկան։

Սոցցանցերում տեղեկություններ են շրջանառվում այն մասին, որ սահմանի առանձին հատվածներում դիրքային մարտեր են ընթանում։ Բայց այս տեղեկությունները ևս դեռ հաստատված չեն։

Այն ամենն, ինչ հայտնի է ներկա պահին

● Հայաստանի Անվտանգության խորհուրդը, որը նիստ է գումարել գիշերը, որոշել է պաշտոնապես դիմել Ռուսաստանին, ՀԱՊԿ-ին և ՄԱԿ-ի Անվտանգության խորհրդին՝ կապված Ադրբեջանի հետ սահմանին տեղի ունեցած ռազմական գործողությունների հետ։ Հանդիպմանը ներկա են եղել նախագահ Վահագն Խաչատուրյանը և Ազգային ժողովի նախագահ Ալեն Սիմոնյանը։

Հավաքական անվտանգության պայմանագիրը (ՀԱՊԿ՝ Ռուսաստանի գլխավորությամբ) նախատեսում է փոխադարձ օգնություն անդամ երկրի վրա հարձակման դեպքում։ Հայաստանը ՀԱՊԿ անդամ է, Ադրբեջանը՝ ոչ.

● ՀՀ վարչապետ Նիկոլ Փաշինյանը շտապ հեռախոսազրույց է ունեցել ԱՄՆ պետքարտուղար Էնթոնի Բլինքենի և Ֆրանսիայի նախագահ Էմանուել Մակրոնի հետ։

● Բլինքենը հայտարարություն է տարածել և կոչ արել Ադրբեջանին և Հայաստանին անհապաղ դադարեցնել ցանկացած ռազմական գործողություն հայ-ադրբեջանական սահմանին։ «Միացյալ Նահանգները խորապես մտահոգված է հայ-ադրբեջանական սահմանի երկայնքով հարձակումների մասին հաղորդումներով, ներառյալ Հայաստանի ներսում բնակեցված տարածքներին և քաղաքացիական ենթակառուցվածքներին հարվածների մասին հաղորդումները: Ինչպես մենք վաղուց հստակեցրել ենք, հակամարտությունը ռազմական լուծում չի կարող ունենալ։ Մենք կոչ ենք անում անհապաղ դադարեցնել բոլոր ռազմական գործողությունները»:

● ՀՀ ԱԳ նախարար Արարատ Միրզոյանը գիշերը հեռախոսազրույց է ունեցել ԱՄՆ պետքարտուղարի Եվրոպայի և Եվրասիայի հարցերով տեղակալ Քերըն Դոնֆրիդի հետ։

● ՀՀ ԱԳ նախարար Արարատ Միրզոյանը հեռախոսազրույց է ունեցել ՌԴ ԱԳ նախարար Սերգեյ Լավրովի հետ։

● ՀՀ ՊՆ պաշտպանության և միջազգային համագործակցության վարչության պետ Լևոն Այվազյանը և գլխավոր շտաբի ներկայացուցիչները հանդիպել են Հայաստանում օտարերկրյա դեսպանությունների ռազմական կցորդների հետ։

● «Մեզ անհանգստացնում են տեղեկություններն այն մասին, որ ադրբեջանական զինուժն ինտենսիվ գնդակոծության է ենթարկել հայկական բնակավայրերը՝ Գորիս, Ջերմուկ, Վարդենիս և Սոթք։ Կոչ ենք անում կողմերին անհապաղ դադարեցնել կրակը և գտնել խաղաղ լուծում»,- հայտարարել է Freedom House միջազգային իրավապաշտպան կազմակերպությունը։

● «Ազատություն» ռադիոկայանը հաղորդում է, որ Հայաստանի Գյումրի քաղաքում գտնվող ռուսական ռազմաբազայում տագնապ է հայտարարվել։

«Ադրբեջանի լայնածավալ սադրանք». Հայաստանի ՊՆ

Հայաստանի պաշտպանության նախարարությունը հայտարարել է Ադրբեջանի լայնածավալ սադրանքի մասին։

«Սեպտեմբերի 13-ին, ժամը 00։05-ի սահմաններում, Ադրբեջանի զինված ուժերի ստորաբաժանումները, հրետանային միջոցների, ականանետերի ու ԱԹՍ-ների կիրառմամբ ինտենսիվ կրակ են բացել հայ-ադրբեջանական սահմանի միանգամից մի քանի հատվածում տեղակայված հայկական դիրքերի ուղղությամբ։

Մասնավորապես՝ հրետակոծման են ենթարկվել Սոթքի, Վարդենիսի, Գորիսի, Կապանի, Արտանիշի և Իշխանասարի ուղղությամբ տեղակայված դիրքերը։ Հարվածներ են հասցվում նաև քաղաքացիական ենթակառուցվածքներին։

Հայաստանի Հանրապետության զինված ուժերի ստորաբաժանումներն ամբողջ ծավալով կատարում են իրենց առջև դրված մարտական խնդիրները։

Ադրբեջանի պաշտպանության նախարարության պնդումները, թե հրետակոծությունն սկսել է հայկական կողմը, բացարձակ կեղծ են։ Ավելին՝ Ադրբեջանի ռազմաքաղաքական ղեկավարությունն այս սադրանքի համար վերջին օրերին ակնհայտ տեղեկատվական հենք էր նախապատրաստում, ինչի վկայությունն էին ամենօրյա ռեժիմով հրապարակվող ապատեղեկատվությունները՝ իբր հայկական կողմի գնդակոծությունների վերաբերյալ։

Այս ձեռագրին մենք ծանոթ էինք դեռևս 2020 թվականի 44-օրյա պատերազմի ժամանակ։

Ինչպես բոլոր այդ դեպքերում, վերջին, լայնածավալ սադրանքի պարագայում նույնպես այն նախաձեռնել է Ադրբեջանի զինված ուժերը։

Հայկական կողմն ունի զոհեր և վիրավորներ։ Տվյալները ճշտվում են»։

«Ադրբեջանը Հայաստան չի ներխուժել». Ադրբեջանի ՊՆ

 «Հայկական մամուլում և սոցիալական ցանցերում տարածված լուրերը Հայաստանի տարածք Ադրբեջանի ներխուժման մասին ոչ այլ ինչ են, քան անհեթեթություն։

Տարածաշրջանում ագրեսոր և օկուպանտ պետությունը Հայաստանի Հանրապետությունն է։ Ադրբեջանի ղարաբաղյան տնտեսական գոտում հայկական զինված ուժերի անձնակազմի և տեխնիկայի առկայությունը շարունակվում է առ այսօր։

Ադրբեջանական բանակը, ի պատասխան Հայաստանի սադրանքի, իրականացնում է լոկալ հակաքայլեր և վնասազերծում կրակակետերը։

Հայաստանի կողմից շարունակվող ռազմական արկածախնդրության և ռևանշիզմի քաղաքականությունը, վերջին մեկ ամսվա ընթացքում ադրբեջանական բանակի դիրքերի ինտենսիվ գնդակոծությունները Քելբաջարի, Լաչինի, Դաշքեսանի և Գեդաբեկի ուղղություններում և այսօր դրա հետևանքով առաջացած լայնածավալ սադրանքները հակամարտության սրման հիմնական պատճառներն են։

Ուստի պատասխանատվությունը կրում է Հայաստանի ռազմաքաղաքական ղեկավարությունը»։

Ռազմական գործողություններ հայ-ադրբեջանական սահմանին