Պուտինը ներում է շնորհել 2008թ-ին Վրաստանի կողմ գնացող զինվորական տեխնիկայի մասին SMS-հաղորդագրություն ուղարկած ռուսաստանցի կնոջը

Ռուսաստանի նախագահ Վլադիմիր Պուտինը ներում է շնորհել Սոչիի բնակիչ Օքսանա Սևաստիդիին, որին 7 տարվա ազատազրկման էին դատապարտել 2008թ-իպատերազմից առաջ ռուսական ռազմական տեխնիկայի տեղաշարժի մասին Վրաստանին տեղեկատվություն տրամադրելու համար:

Պուտինի հրամանը հրապարակվել է այսօր իրավական տեղեկատվության պաշտոնական պորտալում: Այն ուժի մեջ կմտնի հրապարակումից 5 օր անց:

Ռուսաստանի քաղաքացի Օքսանա Սևաստիդիին 2016թ-ի մայիսին 7 տարվա ազատազրկման են դատապարտել պետական դավաճանության մեղադրանքով: Հարավային Օսիայի շուրջ 2008թ-ի օգոստոսյան պատերազմի նախօրեին նա մի քանի SMS-հաղորդագրություն է ուղարկել Վրաստանում իր ծանոթին: Օքսանան գրել է, որ Սոչիում ռազմական տեխնիկայով լի գնացք է տեսել, որն, ըստ իր տեղեկատվության, ուղևորվելիս է եղել Աբխազիա:

Սակայն Սևաստիդիի փաստաբան Եվգենի Սմիրնովը հայտարարել է, որ, չնայած ներմանը, նա հասնելու է դատավճռի լիակատար չեղարկմանը, որը նա ապօրինի է անվանել, և իր պաշտպանյալի լրիվ արդարացմանը:

Նախորդ տարվա դեկտեմբերին կայացած մամուլի ասուլիսին  Սևաստիդիի գործի մասին հարցին Վլադիմիր Պուտինը դատավճիռը “բավականին խիստ” է անվանել, սակայն նշել է, որ գործի մանրամասներին չի տիրապետում:

Սևաստիդիի դեպքը բացառիկ չէ: 2014թ-ի նոյեմբերին Սոչիի բնակիչ Եկատերինա Խարեբավային դատարանը 6 տարվա ազատազրկման է դատապարտել 2008թ-ին դեպի Աբխազիայի կողմ ռազմական տեխնիկայի տեղաշարժի մասին նմանատիպ հաղորդագրություն ուղարկելու համար:

Օքսանա Սևաստիդիի դատավճռի մեջ մանրամասն նկարագրված են այն դեպքերը, որոնք նախորդել են 2008թ-ի պատերազմին, այդ թվում նշված են զորամասերի համարները և տեխնիկայի տեսակները, որը տեղափոխվել է երկաթուղով: «Տեղեկատվական նշանակության և տեղեկությունների զգայունության առումով եթե նրա հաղորդագրությունը համեմատենք դատավճռի հետ, դա մի կաթիլ է ծովում», — ասել է Սևաստիդիի փաստաբան Իվան Պավլովը: JAMnews-ի հոդվածը Սևաստիդիի մասին:

Հոդվածում արտահայտած մտքերը փոխանցում են հեղինակի տերմինաբանությունն ու հայացքները և միշտ չէ, որ արտացոլում են խմբագրության դիրքորոշումը: