Պորոշենկոն և Իվանիշվիլին պլանավորում են Սաակաշվիլիին Վրաստանին արտահանձնել

Ուկրաինայի նախագահ Պյոտր Պորոշենկոն բանակցություններ է վարում Վրաստանի նախկին վարչապետ Բիձինա Իվանիշվիլիի հետ Միխեիլ Սաակաշվիլիին արտահանձնելու հարցի շուրջ: Այդ մասին հայտարարել է Վրաստանի գլխավոր դատախազի նախկին տեղակալ Դավիթ Սակվարելիձեն:

Նա պնդում է, որ Պորոշենկոյի համար Սաակաշվիլին անհարմար մրցակցի է վերածվել, այդ պատճառով նա փորձում է ազատվել Սաակաշվիլիից:

Վրաստանի երրորդ նախագահ Միխեիլ Սաակաշվիլիին արտահանձնելու խնդրանքով ուկրաինական կողմին 2015թ-ի փոտրվարի 17-ին դիմել էր Վրաստանի գլխավոր դատախազությունը:

Նույն թվականի ապրիլի 1-ին Ուկրաինայի դատախազությունը Վրաստանի պաշտոնական նամակ էր ուղարկել, որում հրաժարվեց արտահանձնել Սաակաշվիլիին՝ ենթադրելով, որ այդ դեպքում նա քաղաքական հետապնդման օբյեկտ կդառնա:

Այդ փուլում Սաակաշվիլին Պյոտր Պորոշենկոյի կողմից արդեն նշանակվել էր Բարեփոխումների խորհրդի ղեկավար: Իսկ մի քանի ամիս անց նա նոր պաշտոն ստացավ՝ Օդեսայի մարզպետի պաշտոնը: 2016թ-ի նոյեմբերի 7-ին Սաակաշվիլին լքեց այդ պաշտոնն ու անցավ ընդդիմության շարքերը:

2015թ-ի հոկտեմբերին Վրաստանի արդարադատության նախարարությունը Սաակաշվիլիին Վրաստանի քաղաքացիությունից զրկելու ընթացակարգ սկսեց:

Դավիթ Սակվարելիձեն, որն այժմ Կիևում է և նախկին նախագահի խորհրդականն է, ուկրաինական ZIK հեռուստաընկերությանը տված հարցազրույցում հայտարարել է, որ այդ բանակցություններին վրացական կողմից մասնակցում է Բիձինա Իվանիշվիլին: Նրա խոսքով՝ հենց նա է կապի մեջ Ուկրաինայի նախագահ Պորոշենկոյի հետ:

Բիձինա Իվանիշվիլին Վրաստանի վարչապետն է եղել 2012-2013թթ-ին: Այսօր նա որևէ պաշտոն չունի, չնայած որ շատ մեծ ազդեցություն ունի Վրաստանի կառավարության և իշխող կուսակցության վրա:

Այդ ամենը կապված է Սաակաշվիլիի գործունեության հետ: Ուկրաինական իշխանությունն ամեն կերպ փորձում է ընդդիմադիր դաշտից հեռացնել Վրաստանի նախկին նախագահին, հայտարարել է Սակվարելիձեն հեռուստահաղորդման ժամանակ:

Սակայն պաշտոնապես այդ տեղեկատվությունը ոչ ոք չի հաստատում՝ ոչ Կիևը, ոչ Թբիլիսին:

Եթե արտահանձնումն այնուամենյանիվ կայանա, Վրաստանի նախկին նախագահ Միխեիլ Սաակաշվիլիին պաշտոնապես մեղադրանք կառաջադրվի նրա դեմ արդեն հարուցված գործերով: Նա մեղադրվում է լիազորությունները չարաշահելու, բյուջետային միջոցների ոչ նպատակային ծախսման և մսխման, 2007թ-ի նոյեմբերին ընդդիմության ակցիայի դաժան ցրման, ինչպես նաև «Իմեդի» հեռուստաընկերության զավթման համար: Սաակաշվիլին այնպիսի գործերով է կասկածյալ, ինչպես պատգամավոր Վալերի Գելաշվիլիի ծեծն ու բանկային ծառայող Սանդրո Գիրգվլիանիի սպանությունը: Օգոստոսի 2-ին դատարանը հեռակա կերպով Սաակաշվիլիին դատապարտել է 4 ամսվա նախնական կալանքի:

Ինքը Սաակաշվիլին իրեն առաջադրված մեղադրանքները գնահատում է որպես հետապնդում քաղաքական հաշվիներ մաքրելու նպատակով: