Պետականության գլխավոր ապացույցի մասին

Հարավային Օսիայի հեռուստաընկերությունը նշում է հիմնադրման 22 ամյակը: Հեռուստատեսությունը հեռարձակումը սկսել է 1994թ-ին:

Այն մասին, թե ինչպես է այդ ամենը տեղի ունեցել և ինչ է այսօր դարձել, JAM-news-ը զրուցել է տեղական հեռուստաընկերության ամենավարկանիշային հաղորդումներից մեկի հաղորդավար Թամեռլան Ձուցևի հետ:

JAMnews: Հիշո՞ւմ եք, ինչպես ամեն ինչ սկսվեց 1994-ին:

— Ես այն ժամանակ երկրում չէի, Մոսկվա էի մեկնել: Բայց գիտեմ, թե ինչ ազդեցություն դա ունեցավ: Սեփական հեռուստատեսություն: Շատերի համար դա ամենածանրակշիռ ապացույցն էր այն բանի, որ մենք դառնում ենք ինքնուրույն պետություն: Դիտում էին բոլորը:

JAMnews: Հեռարձակումն օսերե՞ն էր:

— Այո, բայց ռուսերենով հաղորդումներ էլ ունեինք:

JAMnews: Իսկ կադրեր ո՞րտեղից էիք վերցնում:

— Այդ ամենն արվում էր միայն էնտուզիազմի շնորհիվ: Ալան Ջիոևն ու Վալերի Խուբուլովն ինչ-որ տեղից սարքավորումներ էին գտնում: Սյուժեները երբեմն տանն էին անում, ծնկների վրա: Այդպես շարունակվում էր երկու տարի, քանի դեռ հեռուստատեսությունն անկախ էր: Հետո այն դարձավ պետական:

JAMnews: Ինչպիսի՞ն է Հարավային Օսիայի պետական հեռուստատեսության բովանդակությունը:

— Սեփական հեռարձակումը սկսվում է 15:00-ից: Մինչ այդ հեռարձակում ենք ռուսական ծրագրերը, հիմնականում՝ ֆիլմերը: Սակայն եթե ռուսական դաշնային ալիքներում Հարավային Օսիայի հետ կապված նորություն է հայտնվում, բնականաբար, դա առանձին պատմություն է:

JAMnews: Իշխանությունները հատուկ հետաքրքրվածություն ցուցաբերո՞ւմ են հեռուստաալիքի հանդեպ:

— Ես վարում եմ ուղիղ եթեր, որի հյուրերն են լինում հանրապետության ղեկավարները, կիրակնօրյա երեկոյան «Բարձրաձայն…» հաղորդումը, որի եթերում նույնպես պաշտոնյաներ են ելույթ ունենում, և խորհրդարանական ու նախագահական ընտրությունների նախաշեմին՝ հեռուստադեբատներ: Հետաքրքրվածություն, իհարկե, զգացվում է:

JAMnews: Իսկ ճնշո՞ւմ:

— Առանձնահատուկ ճնշում չի գործադրվում:

JAMnews: Այսինքն գործելու ազատությո՞ւն ունեք:

— Ստեղծագործ մոտեցումը ողջունվում է: Սակայն քաղաքական գիծը պետք է պահպանել, չէ՞ որ մենք պետական հեռուստատեսություն ենք: Չնայած Հարավային Օսիայի նախագահ Լեոնիդ Թիբիլովը պնդում է, որ նա ողջունում է քննադատությունը:

JAMnews: Հնարավո՞ր է հանրապետության տարածքում վրացական հեռուստատեսություն դիտել:

— Այո, հատկապես սահմանամերձ շրջաններում: Ես երբեմն նայում եմ, որքանով, որ ինձ թույլ է տալիս վրացերենս:

JAMnews: Ինպիսի՞ն է տպավորությունը:

— Պատկերի ու տեխնիկական հնարավորությունների առումով նրանք, իհարկե, մեզ գերազանցում են:

Հոդվածում հնչած կարծիքներն արտահայտում են հեղինակի տերմինաբանությունն ու հայացքները և պարտադիր չէ, որ համընկնեն խմբագրության կարծիքի հետ.

Հրապարակվել է 17.03.2016