Պատվաստումն Ադրբեջանում, փաստացի, հարկադիր է դարձել
Ադրբեջանում գրեթե բոլոր պետական և մասնավոր հաստատությունների աշխատակիցներին, ինչպես նաև բուհերի ուսանողներին պարտավորեցրել են պատվաստվել կորոնավիրուսի դեմ։ 2021 թ-ի հոկտեմբերից միայն 18 տարեկանից բարձր անձինք, որոնք COVID-անձնագիր ունեն, կարող են այցելել հանրային սննդի կետեր, հյուրանոցներ և առևտրի կենտրոններ։
- Աբխազիա․ «Թե ինչպես մենք համաճարակի հետ մեն մենակ մնացինք»
- «Այցի նպատակը պատվաստումն է»․ շարունակվում է իրանցի զբոսաշրջիկների հոսքը Հայաստան
Ադրբեջանի կառավարությունը փոփոխություններ է կատարել «Հատուկ կարանտինային ռեժիմի հաղթահարման միջոցների և որոշ սահմանափակումների չեղարկման մասին» օրենքում։ Այս փոփոխությունների համաձայն՝ պատվաստումն Ադրբեջանում, փաստացի, հարկադիր է դառնում։
Չպատվաստված ուսանողները չեն կարողանա դասի գնալ
Կառավարության նոր որոշման համաձայն՝ 18 տարեկանից բարձր անձինք, որոնք սովորում են բարձրագույն և միջին մասնագիտական ուսումնական հաստատություններում, պետք է COVID-անձնագիր ունենան։ Ադրբեջանում ուսումնական տարին սկսվում է սեպտեմբերի 15-ին։
COVID-անձնագիրն Ադրբեջանում ներմուծվել է 2021 թ-ի հունիսին և երկու տեսակի է լինում։
Պատվաստվածի սերտիֆիկատ են ստանում բոլոր նրանք, ովքեր ստացել են կորոնավիրուսի դեմ պատվաստնյութի երկու դեղաչափն էլ։ Սերտիֆիկատի այս տեսակի գործողության ժամկետն անսահմանափակ է։
Վերջին վեց ամսում կորոնավիրուսով հիվանդացածներն իմունիտետի սերտիֆիկատ են ստանում։ Այս փասատթուղթը վավեր է առողջացման պահից վեց ամսվա ընթացքում։ Վեց ամիս անց այս սերտիֆիկատն ունեցողները պետք է պատվաստանյութի մեկ դեղաչափ ստանան։
Այցելություն առևտրի կետ՝ COVID-անձնագրով
2021 թ-ի սեպտեմբերի 1-ից բոլոր պետական կառույցների, ինչպես նաև բոլոր պետական և մասնավոր ձեռնարկությունների աշխատակիցների գրեթե 80 տոկոսը, որոնց աշխատանքը կապված է բնակչության սպասարկման հետ, պարտավոր է ստանալ COVID-19-ի դեմ պատվաստանյութի առաջին դեղաչափը, իսկ հոկտեմբերի 1-ից՝ երկրորդ դեղաչափը, կամ ունենալ COVID-19-ի դեմ իմունիտետի սերտիֆիկատ։
2021 թ-ի սեպտեմբերի 1-ից 18 տարեկանից բարձր անձինք կարող են փակ տարածքներում տրամադրվող ծառայություններից օգտվել միայն այն դեպքում, եթե COVID-19-ի անձնագիր ունեն։ Այս հաստատությունների թվում են հանրային սննդի կետերը, հյուրանոցներն ու առևտրի կենտրոնները։
Սեպտեմբերի 1-ից վարսավիրանոցների և գեղեցկության սրահների ծառայություններից կարող են օգտվել նույնպես միայն COVID-անձնագիր ունեցողները։
Ի՞նչ անեն նրանք, ում հակացուցված է պատվաստանյութը
Նրանց, ում հակացուցված է կորոնավիրուսի դեմ պատվաստանյութը, շուտով QR-կոդով հատուկ սերտիֆիկատ կտրամադրվի, նշել են Ադրբեջանի կառավարությունում։
