Պայթյուն ադրբեջանական ռազմական գործարանում

Երկու մարդ է զոհվել Շիրվանի ռազմական գործարանում ուտիլիզացիայի ենթակա զինամթերքի պայթյունի հետևանքով: Այդ փաստի հաստատումը մոտ 7 ժամ է տևել:

Ժամանակագրություն

Ժամը 16:10 մի շարք լրատվամիջոցներ և տեղեկատվական գործակալություններ (ԱՊԱ, “Թրենդ, “Թուրան և այլն) հրապարակեցին Ադրբեջանի ՆԳՆ, ԱԻՆ և գլխավոր դատախազության համատեղ հայտարարությունը պայթյունի մասին, որը տեղի է ունեցել հուլիսի 26-ին ժամը 15:30 Ադրբեջանի պաշտպանական արդյունաբերության նախարարության “Արազ գործարանի ուտիլիզացիայի հատվածում:

Սկզբում պաշտպանության և առողջապահության նախարարությունները հաղորդում էին, որ զոհեր չկան և վիրավոր է ընդամենը 6 մարդ: Այնուհետև 17:55-ին վիրավորների քանակը հասավ 20-ի, սակայն զոհերի մասին չէր հաղորդվում:

Ժամը 18:26-ին, վկայակոչելով գործարանի տարածքում գտնվող իր աշխատակցին, ԱՊԱ գործակալությունը հայտնեց, որ գործարանում դեռ պայթյուններ են լսվում և ծուխ է երևում, ամենուր արկերի բեկորներ են թափված, տեղում շտապօգնության մեքենաներ կան, որոնք տուժածներին տարբեր հիվանդանոցներ են տեղափոխում: Ընդհանուր առմամբ 20 մարդ է հոսպիտալացվել:

Պաշտպանական արդյունաբերության նախարար Յավեր Ջամալովը, ԱԻ փոխնախարարներ Ռուստամ Ուսուբովն ու Էթիբար Միրզոևը դեպքի վայրում են:

Իսկ 20:39 1news գործակալությունը հաղորդեց, որ Գլխավոր դատախազության Ծանր հանցագործությունների քննչական վարչությունում քրեական գործ է հարուցվել 223.2 հոդվածով (անվտանգության կանոնների խախտումը պայթյունավտանգ օբյեկտներում, որը ծանր հետևանքներ է ունեցել) և 314.2 հոդվածով (անփություն, որը ծանր հետևանքներ է ունեցել): Ըստ նախնական տվյալների՝ պայթյունը տեղի է ունեցել գործարանի ուտիլիզացիայի հատվածում ժամկետանց զինամթերքի ուտիլիզացիայի նախապատրաստման ժամանակ:

Ժամը 21:40-ին պաշտպանության նախարարությունը հայտարարել է, որ տուժածների մեջ զինծառայողներ չկան:

Եվ միայն 22:00-ին Պաշտպանական արդյունաբերության նախարարությունը հաղորդեց, որ երկու մարդ է զոհվել՝ Մամեդով Ալլահյարովն ու Նուրիևա Իլհաման:

Կիսով չափ լիքը, կիսով չափ դատարկ

Իշխանամետ գործակալություններն ու անկախները տեղեկատվությունը տարբեր կերպ են մատուցում: Այսպես, Meydan.tv-ի, հատկապես Contact.az կայքի նորությունները հիմնականում վերաբերում են գործարանում տիրող իրավիճակին:

Միաժամանակ Trend.az, Day.az, 1news.az կայքերը հիմնականում դրական նորություններ են տալիս:
Հատկանշական է, որ գործարանում կատարված միջադեպի մասին լուրը 1news.az-ը հետևյալ վերնագրով էր տվել՝ “Պաշտպանական արդյունաբերության նախարարության գործարանում տեղի ունեցած պայթյունի հետևանքով 4 վիրավորները դուրս են գրվել հիվանդանոցից

“Թուրան գործակալությունը հուլիսի 27-ի առավոտյան հաղորդեց. “Մինչ այժմ հստակ տեղեկատվություն չկա պայթյունի հետևանքների չեզոքացման վերաբերյալ:

Սոցցանցերում շրջանառվող տեղեկատվության համաձայն, իրավիճակը դեռևս չի հաջողվել վերահսկողության տակ առնել, իսկ փրկարարները չեն կարողանում ձեռնարկության տարածք մտնել զինամթերքի պայթյունի վտանգի պատճառով: Նույն աղբյուրների համաձայն՝ գործարանում կարող են էլի մարդիկ մնացած լինել, և նրանց ճակատագիրն անհայտ է:

Ըստ ոչ պաշտոնական տվյալների՝ գործարանների աշխատակիցների մի մասը կարող էր պատսպարվել ընդհատակյա թաքստոցում, սակայն պաշտոնական աղբյուրները չեն մեկնաբանում այս տեղեկությունները»: 

Փորձագիտական գնահատական

Տնտեսագետ Նաթիկ Ջաֆարլի.

“Ադրբեջանին պետք է պաշտպանական արդյունաբերություն, այլ ոչ թե պաշտպանական արդյունաբերության նախարարություն: Դա դատարկ ու անիմաստ կառույց է՝ նախարարության կարգավիճակով, ուռճացված աշխատակազմով և անօգուտ կարգավիճակով, պետական բյուջեի դատարկ մսխում: Պաշտպանական արդյունաբերությունն, օրինակ, կարող է էկոնոմիկայի նախարարության փոքր բաժին լինել: Շիրվանի գործարանում առաջին անգամը չէ նման դեպք տեղի ունենում, հետևաբար, խնդիրն աշխատանքի կազմակերպման մեջ է, ընդ որում, չկա մեկը, ով դրա համար պատասխան կտա: Քանի որ զոհվածները սևագործ են համարվում: Թող զոհերի հողը թեթև լինի, արտակարգ իրավիճակից տուժածներին շուտափույթ ապաքինում եմ ցանկանում:

Սոցկայքերի արձագանքը

Ֆեյսբուքի օգտատերերի արձագանքն ավելի քան զուսպ էր, կարծես քննարկելու բան չլիներ.

“Պայթյունով ուտիլիզացիան էկոլոգիապես վտանգավոր է: Այդ պատճառով ոչ ոք ապահովագրված չէ:

“Դա պետք է պոլիգոններում ուտիլիզացվեր, այլ ոչ թե աշխատող ձեռնարկության տարածքում՝ բնակելի տարածքից մեկ կիլոմետր հեռավորության վրա:
Այս ի՞նչ հեքիաթներ են պատմում, և ո՞վ է դրանց հավատում:

“Քանի դեռ կառավարական կառույցներում և բարձր պաշտոններում աշխատում են ոչ պրոֆեսիոնալ քծնողներ, այդպիսի դեպքեր հաճախ են լինելու:

“Դե ինչ, հիմա կրկին անձնական լուսանկարների փոխարեն Ֆեյսբուքում դրոշների նկար կտեղադրեն, մի քիչ կվշտանանք, կվրդովվենք , և մեկ ամիս անց ամեն ինչ կավարտվի:

Կարծես, այս անգամ ամեն ինչ արդեն երկու օրից ավարտվեց:

Հրապարակվել է 27.07.2016