Ուկրաինացի ռեժիսոր Օլեգ Սենցովը դադարեցրել է հացադուլը ռուսական բանտում

Ուկրաինացի ռեժիսոր Օլեգ Սենցովը, որը Ռուսաստանում դատապարտվել է 20 տարվա ազատազրկման և քաղբանտարկյալ է ճանաչվել, դադարեցրել է հացադուլը, որը տևել է ավելի քան 140 օր:

2018թ-ի հոկտեմբերի 6-ին նա իր փաստաբանի միջոցով հայտարարություն է փոխանցել, որում բացատրել է իր որոշման պատճառները: Դա առողջության կրիտիկական վիճակն է և բռնի կերակրելու իշխանությունների մտադրությունները:

«Իմ կարծիքն այդ դեպքում արդեն հաշվի չի առնվում: Իբր ես արդեն ի վիճակի չեմ ադեկվատ գնահատել առողջությանս մակարդակն ու նրան սպառնացող վտանգը… Այս պայմաններում ես ստիպված եմ դադարեցնել հացադուլս»:

Պայքարի 145 օր, քաշի նվազում 20 կիլոգրամով, խաթարված առողջություն, սակայն նպատակն այդպես էլ անհասանելի է մնացել: Ես շնորհակալ եմ բոլոր նրանց, ովքեր աջակցում էին ինձ, և թող ինձ ներեն նրանք, ում հիասթափեցրել եմ… Փառք Ուկրաինային», — ասված է Օլեգ Սենցովի հայտարարությունում:

Ո՞վ է Օլեգ Սենցովը

Օլեգ Սենցովն ուկրաինացի ռեժիսոր է, Ղրիմի բնակիչ: 2014թ-ին Ռուսաստանի կողմից թերակղզու բռնակցումից հետո նա հրաժարվել է ռուսական քաղաքացիություն ստանալ և չի թաքցրել իր քննադատական վերաբերմունքը կատարվածի հանդեպ:

2015թ-ին Օլեգ Սենցովը կալանավորվել է ահաբեկչական մեկ ակտի իրականացման և մյուսի նախապատրաստման մեղադրանքով: Առաջինը Սիմֆերոպոլում «Միասնական Ռուսաստան» կուսակցության գրասենյակի դռան հրկիզումն էր, երկրորդը՝ ռուս կայսր Նիկոլ Երկրորդի հուշարձանի պլանավորվող պայթեցումը:

Դատավճիռը՝ 20 տարի:

Օլեգ Սենցովը քաղբանտարկյալ է ճանաչվել ռուսական «Մեմորիալ» կազմակերպության և Amnesty International-ի կողմից:

Կարդացեք նաև. Կայքում կարդացեք նաև. Քանի՞ ուկրաինացի քաղբանտարյալ կա ռուսական բանտերում և ովքեր են նրանք

Հացադուլը

2018թ-ի ապրիլին Օլեգ Սենցովը, որը գտնվում է Ռուսաստանի հյուսիսում գտնվող Լաբիտնանգի քաղաքի բանտում, հացադուլ հայտարարեց:

Նա պահանջում էր Ուկրաինայի բոլոր քաղաքացիների ազատ արձակում, որոնք պահվում են ռուսական բանտերում և քաղբանտարկյալ են ճանաչվել: Ըստ իրավապաշտպան կազմակերպությունների տվյալների՝ նրանց թիվը հասնում է 70-ի:

Ի պաշտպանություն Օլեգ Սենցովի են արտահայտվել շատ երկրների տասնյակ առաջատար մշակութային գործիչներ: Նրա ճակատագիրն էին ռուսական իշխանությունների հետ քննարկում Ֆրանսիայի նախագահը, ԵԱՀԿ նախագահը, ՄԱԿ գլխավոր քարտուղարը:

Օլեգ Սենցովի հացադուլը դադարեցվեց այն պահին, երբ նրա առողջությունը կրիտիկական վիճակում էր, կյանքի իրական սպառնալիք կար: