Որքանո՞վ է անվնաս միլիարդատիրոջ հոբբին: Փողոցում անցկացված հարցում՝ դարավոր ծառերի տեղափոխման շուրջ

Նախկին վարչապետ Բիձինա Իվանիշվիլին շարունակում է Վրաստանի սևծովյան ափից հարյուրամյա ծառերը տեղափոխել սեփական դենդրոպարկ:

Ըստ տարբեր տեղեկությունների՝ Ուռեկի է տեղափոխվել մինչև 20 հսկայական ծառ: Գործընթացը շարունակվում:

Մի քանի օր առաջ փոխադրմանը չդիմացավ և ճանապարհին «փլվեց» 250 տարեկան հաճարենին, որը Իվանիշվիլին 5000 դոլարով գնել էր Օզուրգետի շրջանի Նաթանեբի գյուղից՝ Խուրմավա ընտանիքից:

Լադո Խուրմավան տեղի դպրոցում նկարչության ուսուցիչ է: Նա ասում է, որ իր բակ ծառը տեսնելու է եկել անձամբ Իվանիշվիլին, և այն նրան միանգամից դուր է եկել:

«Նրա հետ կային օտարերկրացի փորձագետներ, որոնք ասացին, որ ծառը կարող է չդիմանալ տեղափոխմանը կամ չապրել այլ հողում, բայց Իվանիշվիլին, միևնույն է, իր ձևով որոշեց»,- ասում է Խուրմավան:

Մասերի բաժանված 250 տարեկան հաճարենին մի քանի օր արգելափակել էր ճանապարհը: Այնուհետև այն վառելափայտի վերածեցին:

Բիձինա Իվանիշվիլիի նստավայրը գտնվում է Վրաստանի սևծովյան ափին՝ Դաբա Շեկվեթիլիում: Հենց այնտեղ էլ նա որոշել է դենդրոպարկ կառուցել: Եվ հենց այդ այգու համար էլ նա բազմամյա ծառեր է հավաքում:

Մի քանի ծառ Իվանիշվիլին գնել է մասնավոր անձանցից, չնայած բազմամյա ծառերի մեծ մասը նա բերում է Ցիխիսձիրիի պետական զբոսայգուց:

Բնապահպաններն ահազանգում են. գործընթացը տագնապալի ընթացք է ստացել, որովհետև այգում ծառերն արմատախիլ անելուց հետո հսկա փոսեր են գոյանում, հողը վնասվում է, ինչը սպառնալիք է ներկայացնում շրջակա միջավայրին:

«1 սանտիմետր պարարտ հողի գոյացման համար պահանջվում է շուրջ 100 տարի, իսկ այս դեպքում, երբ փորում-հանում են դարավոր ծառերը, հողը դառնում է անպիտան»,- հայտարարել է կենսաբան Իրակլի Մաչարաշվիլին «Ռուսթավի-2»-ի հետ զրույցում:

Մաչարաշվլին ընդգծում է, որ, ըստ Վրաստանի օրենսդրության, եթե շրջակա միջավայրին հասցվում է ավելի քան 1000 լարիի վնաս, քրեական պատասխանատվության հարց է առաջանում: Իսկ այնտեղ, որտեղ ծառերը հանել են, վնասն ակնհայտորեն ավելի շատ է:

Այլ կերպ է գնահատում իրավիճակը Վրաստանի շրջակա միջավայրի նախարար Գիգլա Ագուլավշիլին: Նրա խոսքով՝ միլիարդատերը գործում է օրենքի շրջանակներում, այդ պատճառով էլ նախարարությունը Ցիխիսձիրիի տարածքում ստուգում չի իրականացրել: «Դա տեղի կունենա այն դեպքում, եթե որևէ խախտում արձանագրվի»,- ասում է նախարարը:

Ցիխիսձիրիից բացի՝ տասնյակ ծառեր են վերացվել Չակվիում, ինչպես նաև պետական տարածքում: Այստեղ աշխատանքների ընթացքում վնասվել է ափամերձ պաշտպանիչ ամբարտակը և փակվել է ծով տանող միակ ճանապարհը:

Ինքը՝ Բիձինա Իվանիշվիլին, մի քանի ամիս առաջ «Իմեդի» հեռուստաալիքին տված հարցազրույցում խոստովանել է, որ թուլություն ունի հսկա ծառերի նկատմամբ, դա իր հոբբին է:

«Դա իմ հոբբին է, ինձ շատ են դուր գալիս հսկա ծառերը»,- հայտարարել է Իվանիշվիլին:

Հսկայական, 650 տոննա կշռող կակաչենին առաջինն էր, որն Իվանիշվիլին ծովով Աջարիայից տեղափոխեց Ուռեկի: Տարբեր տեղեկություններով՝ Իվանիշվիլին Ուռեկի է տեղափոխել շուրջ 20 հսկա ծառ: Ծանր տեխնիկայով դրանք փոխադրվում են ծովափ, իսկ հետո բեռնանավով տեղափոխում են Ուռեկի:

Նախկին վարչապետի կողմից դարավոր ծառերի տեղափոխման ընթացում.

• դժվարացել է տեղաշարժը Բաթումի-Քոբուլեթի ճանապարհին,
• դադարեցվում է տեղաշարժը երկաթգծով, քանի որ հսկայական ծառերի տեղափոխման համար երբեմն անհրաժեշտ է լինում ժամանակավորապես քանդել երկաթուղին և անջատել էլեկտրամատակարարումը,
• վերացվում են հարյուրավոր այլ ծառեր, որոնք խանգարում են հսկայական ծառերի տեղափոխումն իրականացնող ծանր տեխնիկայի աշխատանքներին,
• անտառում կառուցվում են բետոնե ճանապարհներ՝ ծանր տեխնիկայի շարժն ապահովելու համար,
• արմատախիլ արված դարավոր ծառերի տեղում մնացել են հսկայական փոսեր, վնասվել է հողը, որը վերականգնման ենթակա չէ: