Ոստիկանությունն Ինգուշեթիայում «պատվի համար» հերթական սպանությունն է սադրել

Կավկազսկի ուզելի նյութերով

Ինգուշեթիայում՝ Ռուսաստանի կազմում գտնվող հանրապետությունում, հերթական «պատվի համար սպանությունն» է տեղի ունեցել։ Երիտասարդ կնոջ եղբայրը սպանել է նրան՝ կասկածելով վարկաբեկող կապի մեջ։ Ինչպես հաղորդում է «Կավկազսկի ուզելը», ողբերգությունը սադրել է օպերատիվ տեղեկության արտահոսքը․ ինչ–որ մեկը համացանց է գցել ոստիկանների նկարահանած տեսանյութը։ Իրավապաշտպանների պնդմամբ՝ այդպիսի սպանությունները տարածված երևույթ են ռուսաստանյան Հյուսիսային Կովկասում։

Ճակատագրական տեսանյութ

Ողբերգությունը տեղի է ունեցել այն բանից հետո, երբ ինգուշ ոստիկանները փետրվարի յոթին փորձել են ձերբակալել հանրապետության բնակիչ Իսա Ալտեմիրովին։ Կասկածվում էր, որ նա կապ ունի շորթողների խմբի հետ․ քննության կարծիքով՝ Ալտեմիրովն ու նրա հանցակիցները կանանց սեքսի են դրդել, նրանց հետ էրոտիկ տեսանյութեր նկարահանել, այնուհետև փրկագին պահանջել՝ սպառնալով հրապարակել դրանք։ Տեղական լրատվամիջոցներն ընդգծում են, որ խոսքը ամուսնացած կանանց մասին է։

•Ֆեմիցիդը Վրաստանում․ հայտարարված մահերի ժամանակագրություն 

• Աղմկահարույց հանցագործություն Ադրբեջանում․ վաղաժամ ամուսնությունն արդեն երկու շաբաթից ողբերգությամբ է ավարտվել

• «Սա մեր տղամարդն է, մեր գործն է, ինքներս գլուխ կհանենք»։ Չեչնիայի գեյերին շարունակում են հետապնդել ողջ Ռուսաստանում

Ալտեմիրովը մահացել է փախուստի փորձի ժամանակ՝ ցատկելով հինգերորդ հարկից։ Գրոհի ժամանակ, որն ուժայինները տեսանկարահանել են, տանը երկու կին է գտնվել՝ 23 և 33 տարեկան, և նրանցից մեկը կադրի մեջ է հայտնվել։ Հաջորդ օրը՝ փետրվարի ութին, տեսանյութն Ինստագրամում է հայտնվել և արագ տարածվել սոցցանցում։ Կնոջը հնարավոր էր առանց դժվարության նույնականացնել, նա նույնիսկ իր անունն ու ծննդյան վայրն է նշում։

Կնոջն նույն օրը սպանել է եղբայրը, որից հետո հանձնվել է ոստիկանությանը։   

«Կավկազսկի ուզելը» մեջբերում է իրավաբանների կարծիքն այն մասին, որ ինգուշ ուժայինների գործողությունները կարելի է որակել որպես անփութություն, ինչպես նաև՝ որպես անհատական տվյալների մասին օրենքի խախտում։

Ինգուշեթիայի բնակիչների մեծ մասը սոցցանցերում ապրումակցում է մարդասպանին, ոչ թե զոհին․

«Եղբայրն, իհարկե, իսկական տղամարդու պես է իրեն պահել, բայց մտածե՞լ եք արդյոք, որ նա դրա հետ ողջ կյանքը պետք է ապրի, Ալլահը չանի, մարդ նման բան վերապրի»։

«Այս իրավիճակում ամենասարափելին այն չէ, որ այդ տականքներն ամուսնացած կանանց են գայթակղել․․․ Ամենասարսափելին այս պատմության սկզբում այն է, որ ամուսնացածները գայթակղվել են։ Այդ որքան նվաստ պետք է լինեն կանայք՝ նման բան անելու համար։ Չէ՞ որ նրանք գետնին են հավասարեցրել իրենց ամուսիններին, եղբայրներին, հայրերին, իրենց ողջ ցեղը»։

«Պատվի սպանությունները» Հյուսիսային Կովկասում

«Պատվի» շարժառիթներով կանանց սպանությունները, կամ «պատվի սպանությունները» կանանց նկատմամբ բռնության ամենադաժան ձևերից մեկն են։ 

Ըստ «Իրավական նախաձեռնություն» ռուսական նախագծի տվյալների, հինգ տարում՝ 2012–2017 թթ–ին, Հյուսիսային Կովկասի ռուսաստանյան հանրապետություններում 36 կին է սպանվել։ Դատարան է հասել ընդամենը 14 գործ, մեղադրյալներից մեկն արդարացվել է։ Իրավապաշտպանները կարծում են, որ կանանց սպանությունների իրական վիճակագրությունն ավելի սարսափելի է․ տվյալներ կան, որ զոհերի հարազատներից շատերը թաքցնում են կատարվածը, իսկ հասարակության զգալի մասն այդ սպանություններին ըմբռնումով է մոտենում և հակված է կատարվածի համար զոհին մեղադրել։   

•90 վայրկյան․ «Պատվի համար սպանություննեըը» Հյուսիսային Կովկասում․ 36 կին՝ հինգ տարում 

«Պատիվը» մաքրելու համար կատարված սպանությունները շարունակում են անպատիժ մնալ աշխարհի շատ շրջաններում։ Այն երկրների թվում, որտեղ առավելագույնս տարածված է այդ պրակտիկան, միջազգային կազմակերպություններն առանձնացնում են Իրանը, Պակիստանն ու Պաղեստինը։

 Կանանց դեմ այդպիսի հանցագործությունների վերաբերյալ Ռուսաստանում կատարված առաջին հետազոտության  հեղինակները կարծում են, որ պատճառները, որոնցով «պատվի համար սպանությունները» Ռուսաստանում մեծ հնչեղություն և միջազգային արձագանք չեն ստանում, տեղեկությունների պակասն ու հասարակության կողմից խնդրի տաբուացումն է։