Նվազագույնը 64 մարդ է զոհվել ռուսական Կեմերովո քաղաքում հրդեհի հետևանքով

Մարտի 25-ին ռուսական Կեմերովո քաղաքում, որը տեղակայված է Մոսվկայից 3,5 հազար կիլոմետր հեռավորության վրա՝ Արևմտյան Սիբիրում, հրդեհ է տեղի ունեցել «Ձմեռվա բալ» առևտրի կենտրոնում, հաղորդում է Meduza առցանց պարբերականը:

Կրակի հիմնական օջախները հրշեջները կարողացել են մարել 12 ժամվա ընթացքում, սակայն ծուխը կենտրոնի վերևի հարկերում պահպանվում է: Փրկարարները մինչև հիմա չեն կարողանում մուտք գործել առևտրի կենտրոնի որոշ տարածքներ, որտեղ, ըստ ամենայնի, մարդիկ են գտնվում: Փրկարարաորոնողական աշխատանքները շարունակվում են:

Տվյալ պահին հայտնի է, որ առևտրի կենտրոնում տեղի ունեցած հրդեհի հետևանքով մահացել է 64 մարդ, որոնց թվում նվազագույնը 9 երեխա է եղել: Այս տեղեկատվությունը մշտապես թարմացվում է և, ըստ ամենայնի, վերջնականը չէ:

Հաղորդվում է նաև անհետ կորած 6 մարդու մասին, սակայն առևտրի կենտրոնում տուժած մարդկանց թիվը դժվար է հստակ նշել:

«Ձմեռվա բալում» նաև կոնտակտային կենդանաբանական այգի կա: Դրանում ապրում էր մոտ 200 կենդանի: Նրանք բոլորն, ըստ երևույթին, մահացել են հրդեհից:

Առևտրի կենտրոնում հրդեհի բռնկման պատճառները պարզ չեն: Ռուսաստանի քննչական կոմիտեն քրեական գործ է հարուցել միագամից 3 հոդվածով, կալանավորվել է 4 մարդ: