Նախագահը վետո է դրել դատական բարեփոխումների այսպես կոչված երրորդ ալիքի վրա

Վրաստանի նախագահը վետո է դրել դատական բարեփոխումների այսպես կոչված երրորդ ալիքի օրինագծերի փաթեթի վրա: Պետության ղեկավարը խորհրդարանին կուղարկի հիմնավորված նկատողություններ օրինագծի վերաբերյալ: Այդ մասին Գեորգի Մարգվելաշվիլին հայտարարել է այսօր կայացած հատուկ բրիֆինգի ժամանակ:

Խորհրդարանը դատական համակարգի բարեփոխումների այսպես կոչված երրորդ ալիքի մասին օրինագծերի փաթեթ է ընդունել նախորդ տարվա դեկտեմբերին: Փաթեթի գլխավոր նորարարությունները վերաբերում են դատարաններում գործերի էլեկտրոնային բաշխման ներմուծմանը, դատավորների նշանակման չափանիշներին, անկախ տեսուչի ինստիտուտի ներմուծմանն ու Արդարադատության գերագույն խորհրդում դատարանների մենեջմենթի դեպարտամենտի ստեղծմանը: Բացի այդ, Գերագույն դատարանի գործող և նախկին դատավորներն ազատվում են փարձաշրջան և որակավորման քննություն անցնելու պարտավորությունից:

Ինչպես հայտարարել է Մարգվելաշվիլին, ներկայացված փաթեթում շատ օգտակար և կարևոր փոփոխություններ կան: «Սակայն միաժամանակ այն նորմեր է ներառում, որոնք հակասում են անաչառ արդարադատության ապահովման և դատավորների ինդիվիդուալ անկախության սկզբունքներին», — հայտարարել է նախագահը: