Մեհրիբան Ալիևան Ադրբեջանի առաջին փոխնախագահ է նշանակվել

Միլլի Մեջլիսի անդամ, առաջին տիկին Մեհրիբան Ալիևան Ադրբեջանի առաջին փոխնախագահ է նշանակվել: Այդ մասին Ադրբեջանի նախագահ Իլհամ Ալիևը հրաման է ստորագրել փետրվարի 21-ին:

Ադրբեջանում 2016թ-ի սեպտեմբերի 26-ին հանրաքվե անցկացվեց Սահմանադրությունում փոփոխություններ մտցնելու վերաբերյալ: Այլ փոփոխությունների թվում որոշուներ կայացվեցին երկրի նախագահի կառավարման ժամկետը 5-ից մինչև 7 տարի երկարաձգելու, պետության ղեկավարի թեկնածուների տարիքային ցենզի իջեցման, ինչպես նաև երկու փոխնախագահների պաշտոնների ներմուծման մասին:

Նախագահի կողմից վաղաժամկետ պաշտոնը լքելու և մինչև պետության նոր ղեկավարի ընտրությունը, փոփոխությունների համաձայն, նրա իրավասությունները փոխանցվելու են ոչ թե վարչապետին, ինչպես նախկինում էր, այլ առաջին փոխնախագահին, որը նույնպես իրավունք է ստանում պետության անունից իր ստորագրությունը դնելու միջազգային փաստաթղթերում: