Մարթա Կոս. «Վրացական երազանքի» օրոք Վրաստանը նույնիսկ 2030 թ․-ին չի դառնա ԵՄ անդամ»
Մարթա Կոսը Վրաստանի եվաինտեգրման մասին
Եվրամիության ընդլայնման հարցերով հանձնակատար Մարթա Կոսը վրացական «Պիրվելի» պարբերականին տված հարցազրույցում հայտարարել է, որ «Վրացական երազանքի» վարած քաղաքականության պայմաններում Վրաստանը նույնիսկ 2030 թվականին չի դառնա ԵՄ անդամ։
Նրա խոսքով՝ «Վրացական երազանքի» քարոզչությունն ուղղված է Վրաստանի՝ Եվրամիությանն անդամակցելու դեմ։
Եվրամիության ընդլայնման հարցերով հանձնակատար Մարթա Կոս.
«Լրագրողների, քաղաքական հակառակորդների և քաղաքացիական հասարակության ներկայացուցիչների կալանավորումները չեն համապատասխանում [Եվրամիությանն անդամակցելու] թեկնածու երկրի հետ կապված մեր ակնկալիքներին։
Հենց այդ պատճառով ես Վրաստանի իշխանություններին կոչ եմ անում դադարեցնել հակաժողովրդավարական քայլերը, որոնք Վրաստանն ավելի շատ են հեռացնում Եվրամիությունից։
Մենք գիտենք, որ վրացական իշխանությունները հայտարարում են, թե Վրաստանը մինչև 2030 թվականը կդառնա Եվրամիության անդամ, բայց դա անհնար կլինի, եթե երկիրը շարունակի շարժվել նման ուղղությամբ․ «Վրացական երազանքի» քաղաքականությունը չի աշխատի։
Մենք մշակում ենք առանց վիզայի ռեժիմի կասեցման նոր մեխանիզմ, որը կհաստատվի նոյեմբերին, ինչից հետո կդիտարկենք [Վրաստանի հետ առանց վիզայի ռեժիմի վերաբերյալ] ամենատարբեր հնարավորություններ։
«Վրացական երազանքը» պետք է ականջալուր լինի և ուշադիր հետևի, թե ինչ ենք մենք անում Եվրոպայում։
Պետք է կրկնեմ՝ Վրաստանը թեկնածու երկիր է։ Երկրի կողմից այս կարգավիճակի ստացումը նրա վրա դնում է պատասխանատվություն և պարտավորություններ, և եթե երկիրը դրանք չի կատարում, մենք չենք կարող խոսել այն մասին, թե Վրաստանն ընթանում է եվրոպական ուղով։
Ինձ համար նշանակություն չունի, որ [վրացական իշխանությունները] ստեր են տարածում իմ մասին։ Բայց այն, որ նրանք [անմեղ] մարդկանց բանտ են նետում, իսկապես ցավալի է։
Ես քաղաքական գործիչ եմ և գիտեմ, որ նման բաներն անխուսափելի են իմ մասնագիտության մեջ, ուստի ինձ համար նշանակություն չունի, թե ինչ են ասում իմ մասին։ Բայց երբ նրանք ստեր են տարածում Եվրամիության մասին, երբ հայտարարում են, որ ինքնուրույն կտանեն երկիրը դեպի ԵՄ, դա իսկապես անհանգստացնում է ինձ։
Երկարաժամկետ հեռանկարում մենք միշտ պատրաստ կլինենք խոսել այն մարդկանց հետ, ովքեր պաշտպանում են եվրոպական արժեքները, ժողովրդավարությունը, պաշտպանում են ազատ և անկախ լրատվամիջոցներին։ Մենք միշտ կխոսենք նրանց հետ, ովքեր ականջալուր են լինում իրենց ժողովրդին»։
2025 թ․-ի հոկտեմբերի 20-ին ԵՄ արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը Արտաքին գործերի նախարարների խորհրդի նիստից հետո հայտարարել էր, որ օրենքի գերակայության և մարդու իրավունքների պաշտպանության տեսանկյունից Վրաստանում իրավիճակը վատթարացել է։
Նրա խոսքով՝ մշակվող պարզեցված մեխանիզմը, որը վերաբերում է վիզաների ազատականացման չեղարկմանը, հնարավորություն կտա չեղարկել «ԵՄ-ի հետ առանց վիզայի ռեժիմը առանձին խմբերի համար»։ Կալլասը նաև հավելել էր, որ ԵՄ անդամ երկրների դեսպանների նկատմամբ անձնական հարձակումներն անթույլատրելի են։
Հետևեք մեզ — Facebook | Youtube
Մարթա Կոսը Վրաստանի եվաինտեգրման մասին
