ՄԱԿ ԱԽ-ը մտահոգություն է հայտնել Ուկրաինայի արևելքում իրավիճակի սրացման կապակցությամբ

ՄԱԿ-ի Անվտանգության խորհուրդը խորը մտահոգություն է հայտնել Ուկրաինայի արևելքում իրավիճակի վտանգավոր սրացման կապակցությամբ և կոչ է արել հակամարտության կողմերին անհապաղ դադարեցնել կրակը: Ուկրաինայի արևելքում արդեն մի քանի օր շարունակվում են բախումները կառավարական ուժերի և ռուսամետ խմբավորումների միջև:

«ՄԱԿ-ի Անվտանգության խորհրդի անդամները դատապարտել են Դոնեցկի շրջանի շփման գծում Մինսկի համաձայնագրով արգելված սպառազինության կիրառումը, որը հանգեցրել է մարդկանց, այդ թվում խաղաղ բնակիչների շրջանում զոհերի և վիրավորումների»,- ասվում է ուկրաինական պատվիրակության նախաձեռնությամբ ընդունված հայտարարության մեջ:

Անվտանգության խորհրդի անդամները կոչ են արել անհապաղ վերադառնալ կրակի դադարեցման ռեժիմին, ինչպես նաև իրենց լիակատար աջակցությունն են հայտնել Ուկրաինայի տարածքային ամբողջականությանն ու ինքնիշխանությանը՝ ընդգծելով Մինսկի համաձայնագրերի և ՄԱԿ-ի ԱԽ՝ հակամարտության խաղաղ կարգավորմանն ուղղված բանաձևերի իրականացման կարևորությունը:

Ավդեևկայում տիրող իրավիճակի առնչությամբ իր մտահոգությունն է հայտնել նաև ԱՄՆ պետքարտուղարությունը՝ կոչ անելով անհապաղ դադարեցնել կրակը:

«Հումանիտար մեծ ճգնաժամը կանխելու նպատակով մենք կոչ ենք անում անհապաղ դադարեցնել կրակը և ապահովել ԵԱՀԿ դիտորդների կայուն, լիարժեք և առանց խոչընդոտների մուտքը: Մենք նաև հաստատում ենք ԱՄՆ-ի լիարժեք աջակցությունը Մինսկի համաձայնագրերի իրականացմանը»:

Ավդեևկայի շրջանում փոխհրաձգությունը չի դադարել փետրվարի 1-ի գիշերը և առավոտյան, երկու կողմերն էլ հայտնում են նոր կորուստների մասին: Վերջին երկու օրերին շփման գծի այդ հարվածում կտրուկ աճել է զինված բախումների թիվը: Ավդեևկա քաղաքում խնդիրներ են առաջացել էլեկտրականության և ջեռուցման հետ, Կիևի իշխանությունները խոսում են հումանիտար աղետի մասին:

Հակամարտության վերջին սրացման հետ կապված՝ այսօր Մինսկում տեղի կունենա եռակողմ կոնտակտային խմբի հանդիպումը, որի մեջ մտնում են Ուկրաինայի, Ռուսաստանի և ԵԱՀԿ ներկայացուցիչները:

• ՄԱԿ-ի վերջին տվյալներով՝ Ուկրաինայի արևելքում ռազմական գործողությունների հետևանքով 2014թ. գարնանից 2016թ. սեպտեմբեր ընկած ժամանակահատվածում զոհվել է շուրջ 9500 մարդ: Այս պահին հակամարտության գոտում զինադադար է՝ համաձայն Մինսկի համաձայնագրերի, որոնցով նաև սահմանափակվում է շփման գծում ծանր սպառազինության կիրառումը: Ռուսաստանը մինչ օրս հերքում է իր մասնակցությունը հակամարտությանը: