Վրաստանի վարչապետ Իրակլի Ղարիբաշվիլին Թել Ավիվ պաշտոնական այցի շրջանակներում հանդիպել է Իսրայելի իր գործընկեր Բենիամին Նեթանյահուի հետ։ Վրաստանի կառավարության վարչակազմի փոխանցմամբ՝ կողմերը քննարկել են տարբեր ոլորտներում երկու երկրների համագործակցության հիմնական ուղղությունները և առկա համագործակցության հետագա խորացման հեռանկարները։ Մասնավորապես, շեշտը դրվել է Վրաստանի և Իսրայելի միջև ազատ առևտրի վրա։
«Կողմերը քննարկել են տնտեսական ոլորտում համագործակցությունը։ Վարչապետը [Ղարիբաշվիլին] նշել է, որ երկրների միջև առևտրատնտեսական հարաբերությունները դինամիկ զարգանում են, և հաջորդ տարի կմեկնարկեն ազատ առևտրի համաձայնագրի շուրջ բանակցությունները։ Սա երկու երկրների միջև գործընկերությունը կբարձրացնի որակական նոր աստիճանի»,— ասված է Վրաստանի կառավարության հաղորդագրության մեջ։
Նեթանյահուն նաև վստահություն է հայտնել, որ Վրաստանն ու Իսրայելը կարող են ավելի խորացնել իրենց հարաբերությունները.
«Իսրայելն ու Վրաստանը շատ ջերմ հարաբերություններ ունեն։ Մեր ժողովուրդների կապն արդեն 2500, իսկ գուցե նույնիսկ 2600 տարվա պատմություն ունի։ Վրաստանում ապրում էին հրեական համայնքներ։ Շատ հրեաներ Իսրայել են ներգաղթել Վրաստանից։ Նրանք կենդանի կամուրջ են դարձել մեր երկրների միջև։
Ես հնարավորություն ունեցա անձամբ տեսնել Վրաստանը։ Ես գիտեմ, որ մենք կարող ենք մեր հարաբերությունները հասցնել ավելի բարձր մակարդակի, և ես ողջունում եմ այդ հնարավորությունը Ձեր այցի ընթացքում: Մենք անհամբեր սպասում ենք Ձեզ հաջորդ անգամ Թել Ավիվում և Երուսաղեմում: Մեզ մոտ ասում են. «Հաջորդ անգամ կհավաքվենք Երուսաղեմում», — ասել է Նեթանյահուն:
