Ադրբեջանը միջազգային հետախուզում է հայտարարել Եվրախորհրդարանի 3 անդամի հանդեպ

Լեռնային Ղարաբաղում անցկացվող հանրաքվեն մոնիթորինգ անելու համար ժամանած արտասահմանյան դիտորդները կներառվեն Ադրբեջանի անցանկալի անձանց ցուցակում: Այդ մասին հայտարարել է Ադրբեջանի ԱԳՆ մամուլի քարտուղար Հիքմեթ Հաջիևը:

«Առաջին ստուգումները ցույց են տվել, որ այդ անձանց մեծ մասի անուններն արդեն «անցանկալի անձանց ցուցակում» են: Դա հայկական լոբբիի ներկայացուցիչներն են ու այն անձինք, որոնք Հայաստանի ազդեցության տակ են գտնվում: Եվս մի քանիսի անունները պարտադիր կերպով այդ ցուցակում կներառվեն ճշտումներ կատարելուց հետո», — ասել է Հիքմեթ Հաջիևն «Ինտերֆաքս-Ադրբեջան» գործակալությանը:

Ադրբեջանի գլխավոր դատախազությունը միջազգային հետախուզում է հայտարարել Եվրախորհրդարանի պատգամավորներ Ֆրանկ Էնգելի (Լյուքսեմբուրգ), Էլենի Թեոխարուսի (Կիպրոս) և Յարոմիր Շտետինայի հանդեպ: Առիթը Լեռնային Ղարաբաղ այցելությունն է հանրաքվեի ժամանակ:

Ադրբեջանի ԱԳՆ «սև ցուցակի մասին» ավելի մանրամասն՝ այստեղ:

• Չճանաչված Լեռնային Ղարաբաղի Հանրապետության նոր սահմանադրության նախագծի վերաբերյալ հանրաքվեն անցկացվել է փետրվարի 20-ին: Սահմանադրական հանրաքվեի միջոցով տեղի բնակիչները կորոշեն՝ արդյոք համաձայն են անցում կատարել կառավարման նախագահական համակարգի: Ղարաբաղյան հանրաքվեի մասին ավելի մանրամասն՝ այստեղ:
•  Ավելի վաղ Ադրբեջանի ԱԳՆ-ն ոչ լեգիտիմ է անվանել Լեռնային Ղարաբաղում անցկացրած հանրաքվեն:
• Լեռնային Ղարաբաղի ԿԸՀ փետրվարի 19-ի տվյալների համաձայն՝ 207 դիտորդ, այդ թվում՝ 104 արտասահմանյան դիտորդ աշխարհի 30 երկրներից քվեարկության մոնիթորինգ է անցկացրել: