Ադրբեջանն առաջին անգամ նշել է արցախյան երկրորդ պատերազմում զոհերի թիվը

Ղարաբաղյան երկրորդ պատերազմի օրերին զոհվել է ադրբեջանական բանակի 2 783 զինծառայող։ Եվս 100 մարդ անհետ կորած է համարվում։

• Օգնություն Հայաստանի կառավարությունից՝ Արցախում ռազմական գործողություններից տուժածներին

Ադրբեջանի պաշտպանության նախարարությունը սեպտեմբերի 27-ին հակամարտության գոտում ռազմական գործողությունների մեկնարկից ի վեր առաջին անգամ հրապարակել է ադրբեջանական բանակի զոհված զինծառայողների թիվը։

«Ադրբեջանի զինված ուժերը Հայրենական պատերազմի օրերին [այդպես են Ադրբեջանում անվանում ղարաբաղյան երկրորդ պատերազմը — JAMnews] կորցրել են 2783 զինծառայող։ Ներկա պահին ԴՆԹ-անալիզի օգնությամբ հաստատվում է նրանցից 103-ի անձը։ Ադրբեջանական բանակի ավելի քան 100 զինծառայող անհետ կորած է համարվում», — ասված է պաշտպանության նախարարության հաղորդագրությունում։

Պատերազմում վիրավորված 1 245 զինծառայող շարունակում է բուժում ստանալ երկրի բուժհաստություններում, նշել է գերատեսչությունը։

Պաշտպանության նախարարությունը հավելում է, որ զոհերի անուններն ու կոչումները լրացուցիչ կհրապարակվեն։ Հատուկ հանձնաժողովը շարունակում է աշխատանքն այդ ուղղությամբ։