Ձախողվել է Ընտրական օրենսգրքում Հայաստանի «հեղափոխական» կառավարության առաջարկած փոփոխությունների ընդունումը

Հայաստանի խորհրդարանի պատգամավորներն արտահերթ նիստին չեն ընդունել երկրի Ընտրական օրենսգրքում փոփոխություններ կատարելու փաթեթը: Փոփոխությունների օգտին քվեարկել է 62 պատգամավոր անհրաժեշտ 63-ի փոխարեն:

Փորձ երկրորդ

Սա Ընտրական օրենսգրքում փոփոխություններ մտցնելու երկրորդ փորձն էր: Առաջին անգամ  փոփոխությունների օգտին քվեարկել էր 56 պատգամավոր: Փոփոխությունների ընդունմանը խանգարել է նախկին իշխող Հանրապետական կուսակցությունը: Հանրապետականները հայտարարում են, որ օրինագիծը հապշտապ է մշակվել, և քաղաքական կուսակցություններն ընտրությունների անցկացման նոր սկզբունքներին հարմարվելու ժամանակ չեն ունենա:

• Մանրամասն՝ առաջին փորձի ձախողման և Հայաստանում քաղաքական ճգնաժամի մասին

• Նիկոլ Փաշինյան. ընդդիմադիր, որը Հայաստանի վարչապետ դարձավ

• Ինչպես առանձնացնել բիզնեսն իշխանությունից՝ Հայաստանի նոր կառավարության առաջին 100 օրը

Հանրապետական կուսակցության պատգամավոր Արմեն Աշոտյանն այսօր նշել է, որ Ազգային ժողովը կարողացավ ճնշմանը դիմանալ և դեմ արտահայտվեց փոփոխություններին.

«Նիկոլ Փաշինյանը պետք է շատ շնորհակալ լինի ՀՀԿ-ին, որ ցուցաբերեց սկզբունքայնություն և թույլ չտվեց, որ Հայաստանը՝ լինելով Եվրոպայի խորհրդի անդամ, նման վայրագ կերպով վերաբերվի Ընտրական օրենսգրքի բարեփոխումներին: Ընտրություններից 42 օր շուտ արմատական փոփոխություններ անելը Հայաստանին հետ կգցեր ժողովրդավարական զարգացումների տեսակետից մինչև ԵԽ անդամ դառնալու ժամանակահատված»:

Ի՞նչ էին առաջարկում փոփոխությունները

Ընտրական օրենսգրքում փոփոխությունների նախաձեռնողը «Ելք» խմբակցությունն է, որը հեղափոխությունից առաջ գլխավորում էր Նիկոլ Փաշինյանը: Փոփոխություններն առաջարկում էին հրաժարում ռեյտինգային համակարգից և անցում դեպի պարզ համամասնական համակարգ: Հայկական լրատվամիջոցները գրում էին, որ հենց այդ փոփոխությունն է, որ ամենից շատ դուր չի գալիս նախկին իշխող կուսակցության պատգամավորներին և նրանց կողմնակիցներին:

Բանն այն է, որ այդ ռեյտինգային, տարածքային ցուցակներով ներկայիս գումարման խորհրդարանում են հայտնվել շրջանների անցանկալի դեմքերը: Իրենց ազդեցության և փողի շնորհիվ նրանք կարողացել են իրենց կուսակցության համար հազարավոր ձայներ հավաքել և մանդատ ստանալ: Այդ համակարգը համարվում էր օլիգարխների և «հեղինակությունների»՝ խորհրդարան անցնելու միջոց:

Նիկոլ Փաշինյանն ու «Ելք» խմբակցության անդամները կարծում են, որ Հայաստանում մարդիկ ավանդաբար քվեարկում են «ծանոթ» կամ իրենց «օգնած» մարդու օգտին: Այդ պատճառով էլ նրանք առաջարկում էին ազատվել ընտրություններին նման մոտեցման հնարավորությունից:

Ընդհանուր առմամբ, Ընտրական օրենսգրքի փոփոխություններն ուղղված էին նրան, որ ապագայում խորհրդարանում հավասարակշռություն ապահովվի:

Ըստ գործող օրենսգրքի՝ ընտրողները քվեարկելու են ոչ միայն կուսակցությունների, այլ ընտրատարածքներում ներկայացված առանձին պատգամավորների օգտին:

Փոփոխությունները նաև հանում էին կոալիցիաներ ձևավորելու սահմանափակումներն ու ավելացնում էին դրանց ձևավորման ժամկետը 6-ից մինչև 10 օր:

• Բոլոր մանրամասներն այն փոփոխությունների մասին, որոնք առաջարկվում էր կատարել Ընտրական օրենսգրքում

Կարևոր փոփոխություն պետք է դառնար անցողիկ շեմը կուսակցությունների համար հինգից չորս տոկոս, իսկ դաշինքների համար՝ յոթից վեց տոկոս իջեցնելը:

Առաջարկվում էր նաև ավելացնել խորհրդարանում կին պատգամավորների թիվը՝ 30 տոկոս, ներկայիս 20-ի փոխարեն:

 Ի՞նչ է նշանակում նոր Ընտրական օրենսգրքի ընդունման ձախողումը

Դա նշանակում է, որ դեկտեմբերին կայանալիք արտահերթ խորհրդարանական ընտրությունները կանցկացվեն խառը ընտրական համակարգով: «Ելք» խմբակցության պատգամավոր Ալեն Սիմոնյանն արդեն հայտարարել է, որ անիմաստ է համարում Ընտրական օրենսգրքում փոփոխություններ կատարելու երրորդ փորձը: Ընդ որում, նա խիստ քննադատության է արժանացրել այն պատգամավորներին, որոնք արգելափակել են ընդունումը.

«Ես չեմ ուզում մեղադրել խմբակցություններին, բայց սա սաբոտաժ է: Նրանք արեցին հնարավոր ամեն ինչ, որպեսզի օրենսգիրքը չանցնի, սակայն մենք ընտրությունների կգնանք հին Ընտրական օրենսգրքով և կտեսնենք, թե որքան այն նրանց կօգնի»: