Հյուսիսային Կորեան հերթական հրթիռն է փորձարկել

Նոյեմբերի 28-ին Հյուսիսային Կորեայի տարածքից արձակվել «Խվասոն-15» միջմայրցամաքային բալիստիկ հրթիռը: Այն 53 րոպեանոց թռիչքից հետո հասել է 4500 կմ բարձրության և ընկել Ճապոնիայի արևմտյան ափից 210 կմ հեռավորության վրա: Այս մասին հաղորդում է CNN-ը՝ վկայակոչելով հյուսիսկորեական տեղեկատվական գործակալությունը:

Սա սեպտեմբերի 15-ից հետո Հյուսիսային Կորեայի առաջին հրթիռային փորձարկումն էր:

Հյուսիսային Կորեայի առաջնորդ Կիմ Չեն Ինը հայտարարել է, որ երեկ տեղի ունեցած փորձարկումը խորհրդանշել է Հյուսիսային Կորեայի «պետական միջուկային ուժերի» ստեղծման ավարտը:

Հյուսիսային Կորեայի պետական ԶԼՄ-ները պնդում են, որ «Խվասոն-15»-ը Հյուսիսային Կորեայի ամենահզոր միջմայրցամաքային բալիստիկ հրթիռն է: Հյուսիսկորեական իշխանությունների խոսքով՝ այն ի վիճակի է խոցել ցանկացած թիրախ ԱՄՆ տարածքում:

Փորձագետները կարծում են, որ «Խվասոն-15»-ը իսկապես Հյուսիսային Կորեայի ամենահզոր հրթիռն է: Դրա գլխավոր առավելությունն այն է, որ կարող է կրել գերծանր միջուկային մարտագլխիկ:

ԱՄՆ պետքարտուղար Ռեքս Թիլերսոնը վճռականապես դատապարտել է տեղի ունեցած փորձարկումը: Նրա խոսքով՝ ԱՄՆ-ը նախկինի պես խաղաղ ուղիներ է փնտրում Հյուսիսային Կորեայի հետ հակամարտության կարգավորման ուղղությամբ, բայց կոչ է անում կրկնապատկել միջազգային ճնշումն այդ երկրի նկատմամբ:

Երեկ Հյուսիսային Կորեայի կողմից հերթական ագրեսիայի դրսևորման մասին խոսել է նաև ԱՄՆ նախագահ Դոնալդ Թրամփը: Նա հայտարարել է, որ Ամերիկան «կհաղթահարի դա, և իրավիճակը կհարթվի»: Թրամփը նաև Հյուսիսային Կորեայի առաջնորդ Կիմ Չեն Ինին անվանել է «հիվանդ շան լակոտ»: Հարավային Կորեան արձագանքել է հրթիռի փորձարկմանը գրեթե նույն վարյկյանին և ինքն էլ 3 հրթիռ է արձակել: Գործի են դրվել ցամաքային, ծովային և ռազմաօդային ուժերը: Փորձագետները ենթադրում են, որ այդկերպ Սեուլը փորձում է ցույց տալ, որ ինքը ինքնուրույն խաղացող է և կարող է պատասխան տալ Հյուսիսային Կորեային առանց ԱՄՆ-ի օգնության:

Չինաստանի և Ռուսաստանի իշխանությունները նույնպես դատապարտել են Հյուսիսային Կորեայի գործողությունները: