ՀՀ վարչապետ. ունենք հաստատված 3.2 մլրդ դոլարի ներդրումային ծրագրեր

ՀՀ վարչապետ Կարեն Կարապետյանը հայտարարել է, որ այսօրվա դրությամբ հաստատված են 3.2 մլրդ դոլարի ներդրումային ծրագրեր՝ հստակ ֆինանսական աղբյուրով, ակնկալվող արդյունքով և նախագծի շրջանակում ստեղծվող աշխատատեղերով. «Դրանից 830-850 մլն դոլարը նախատեսված է ներդնել 2017թ-ին։ Այսօր կառավարությունում քննարկվում են նաև 5,3 մլրդ դոլարի ծրագրեր, որոնք տրամաբանական են, որպես բիզնես կարող են աշխատել, հավելյալ արժեք ստեղծել, աշխատատեղեր»:

Կարապետյանը խոսել է այս մասին Էջմիածնում՝ ընտրողների հետ հանդիպման ժամանակ: Նա նշել է, որ մասնավորապես Արմավիրի մարզում, ընդհանուր առմամբ, նախատեսված է 85 մլն դոլարի ներդրումային ծրագիր, որի արդյունքում կստեղծվի 3500 աշխատատեղ։ Միաժամանակ բանակցություններ են ընթանում ներդրումային ծրագրի շուրջ, որը նախատեսում է երկարաժամկետ ևս 65 մլն դոլարի ներդրում։

Կարապետյանը նշել է, որ 2017-ը ախտորոշման, պետական կառավարման համակարգի բարեփոխումների, սանիտարիզացիայի, ախտահանման, ստաբիլացման տարի պետք է լինի:

«Եթե մենք այդ գործառույթները կատարենք, իսկ մենք անպատճառ այդ գործառույթները կկատարենք, 2018թ-ից ունենալու ենք շատ հստակ, անընդմեջ, ռեգուլյար, կայուն և առողջ աճ։ Դա չի նշանակում, որ 2017-ին խնդիր չենք դնում աճ ապահովելու, բայց մենք պետք է լինենք իրատեսական, և այդ իրատեսական մոտեցումները դրել ենք 2017թ-ի բյուջեի մեջ», — պարզաբանել է Կարապետյանը։