Հայաստանը օտարերկրյա հարկատուների մասին տվյալներ կփոխանակի, ռուս ռելոկանտները մտահոգ են
ՀՀ-ն կտրամադրի օտարերկրյա հարկատուների մասին ինֆորմացիա
Հայաստանն օտարերկրյա հարկատուների վերաբերյալ տեղեկություններ կփոխանակի 47 երկրների հետ: Սա նշանակում է, որ ՀՀ-ն իր բանկերում հաշիվ ունեցող օտարերկյա հարկատուների տվյալները տրամադրելու է այդ երկրներին, իսկ նրանցից ստանալու է Հայաստանի քաղաքացիների վերաբերյալ տեղեկատվություն, մասնավորապես՝ հաշվի մնացորդի վերաբերյալ։
Այս մեխանիզմը գործարկվելու է առաջին անգամ։ Պետական եկամուտների կոմիտեից հայտնել են՝ ֆինանսական հաշիվների վերաբերյալ տեղեկությունների փոխանակումը կիրականացվի սեպտեմբերի 30-ին։
Պաշտոնական Երևանի փոխանցմամբ՝ մեխանիզմը թույլ կտա ինֆորմացիա ստանալ ՀՀ քաղաքացիների չհայտարարագրված եկամուտների ու շահույթների մասին։
Փոխանակման մեխանզիմի ներդրումը հատկապես մտահոգել է ՀՀ-ում հաստատված Ռուսաստանի քաղաքացիներին։ ՌԴ-ն վերոնշյալ 47 երկրների շարքում է։ Ռուս ռելոկանտներն ահազանգում են՝ նույնիսկ պարզ թվացող ֆինանսական գործարքները ՌԴ-ում կարող են գնահատվել որպես հանցանք և դառնալ քրեական հետապնդման հիմք: Այդ մտահոգությունը կիսում են նաև հայ իրավապաշտպանները։
47 երկրների շարքում են եվրոպական երկրներ, Հոնկոնգը, Մեծ Բրիտանիան, Իռլանդիան, նաև օֆշորային գոտի համարվող երկրներ։ Հայաստանը ֆինանսական տվյալներ չի փոխանակի Ադրբեջանի, Թուրքիայի հետ, քանի որ երկկողմ դիվանագիտական հարաբերություններ հաստատված չեն։
- «Ոչ մի օտար զորք Հայաստանում»․ ռուսական ռազմաբազայի հնարավոր դուրսբերման մասին
- «Անջատե՛ք թշնամու ձայնը»․ ՀՀ-ում պահանջում են դադարեցնել ռուսական հեռուստաալիքների հեռարձակումը
- «Մոսկվան փորձում է ՀՀ-ում «Իվանիշվիլի-2» գործողություն իրականացնել»․ հայ քաղաքագետ
Երևանը տեղեկությունների փոխանակման ստանդարտին է միացել 2023 թ․-ին
Հայաստանը՝ որպես Տնտեսական համագործակցության և զարգացման կազմակերպության անդամ, կառույցի՝ տեղեկությունների ավտոմատ փոխանակման Միասնական հաշվետվողական ստանդարտին է միացել 2023 թ․-ին։ Այս տարի առաջին անգամ Երևանը ստանալու և փոխանցելու է տեղեկություններ։
«Համակարգին միանալու նպատակն այն է, որ Հայաստանին հասանելի դառնա իր ռեզիդենտների համաշխարհային եկամուտների վերաբերյալ տեղեկատվությունը»,- պարզաբանում է ՊԵԿ Միջազգային հարկման վարչության պետ Նաիրուհի Ավետիսյանը։
«Ազատության» հետ զրույցում Ավետիսյանը նկատել է՝ մեխանիզմը երկրներին հնարավորություն է տալիս հարկային եկամուտներ գեներացնել, ինչպես նաև թափանցիկություն է ապահովում.
«Արդեն գիտես, որ եթե հաշիվ ես բացել Վիրջինյան կղզիներում, ի վերջո, ինչ-որ պահից սկսած այդ ինֆորմացիան քո հարկային մարմինն իմանալու է»։
Ո՞ր օտարերկրյա քաղաքացիների տվյալներն են ենթակա փոխանակման
Պետական եկամուտների կոմիտեից հայտնել են՝ փոխանակումն ընդգրկելու է օտարերկրյա հարկային ռեզիդենտների հաշիվների վերաբերյալ տեղեկությունները․
«ՀՀ ռեզիդենտ են համարվում այն ֆիզիկական անձինք, որոնք հարկային տարում գտնվել են Հայաստանում 183 օր կամ ավելի, կամ որոնց կենսական շահերի կենտրոնը գտնվում է Հայաստանում»։
Շեշտել են՝ կենսական շահերի կենտրոն է համարվում այն վայրը, որտեղ կենտրոնացած են անձի ընտանեկան կամ տնտեսական շահերը, օրինակ՝ ՀՀ-ում է գտնվում նրա տունը (որտեղ բնակվում է նրա ընտանիքը), անձնական կամ ընտանեկան հիմնական գույքը, կամ հիմնական տնտեսական (պրոֆեսիոնալ) գործունեության իրականացման վայրը։
ՊԵԿ պարզաբանման համաձայն՝ իրավաբանական անձի դեպքում հարկային ռեզիդենտության երկիր է համարվում այն երկիրը, որի իրավասու մարմնի կողմից այն գրանցված է կամ որտեղ գտնվում է դրա իրական ղեկավարման վայրը։
Կառույցն ուշադրություն է հրավիրել այն հանգամանքի վրա, որ այն անձինք, որոնց վերաբերյալ տեղեկությունները նախատեսվում է փոխանակել, «այդ մասին պատշաճ ծանուցվում են համապատասխան ֆինանսական հաստատության կողմից»:
«Եթե տվյալ անձինք չեն ցանկանում, որ իրենց հաշվի վերաբերյալ տեղեկությունները փոխանակվեն, ապա ֆինանսական հաստատությունը դադարեցնում է նրանց հետ գործարար հարաբերությունները կամ չի հաստատում այդպիսիք և հարկային մարմնի կողմից այդ հաշիվների փոխանակում չի իրականացնում»,- ասված է հաղորդագրությունում։
«Ամենամեծ վտանգը ՌԴ ռեպրեսիվ մեխանիզմն է»
ՀՀ-ում հաստատված ռուսների մտահոգությունների մասին «Ազատությանը» պատմել է «Կովչեգ» նախագծի հիմնադիր, իրավաբան Անաստասիա Բուրակովան։
Ասում է՝ ռուսների մտահոգում է ոչ թե ֆինանսական թափանցիկությունը կամ հարկեր չվճարելը, այլ այն, որ «շատ պարզ ֆինանսական գործարքներ Ռուսաստանում կարող են համարվել հանցանք և քրեական հետապնդման հիմք դառնալ»։ Շեշտում է՝ ամենամեծ վտանգը Ռուսաստանի ռեպրեսիվ մեխանիզմն է։
«Ուղղակի ինչ-որ դրամական նվիրաբերումները, անգամ Ուկրաինայում ապրող բարեկամներին գումար ուղարկելը, կարող է վտանգավոր լինել ու երկարատև բանտարկության պատճառ դառնալ»,- ընդգծել է իրավաբանը։
Անաստասիա Բուրակովան նաև մեկ այլ օրինակ է բերել։ Նշել է՝ Meta ընկերությունը ՌԴ-ում ծայրահեղական է ճանաչվել, եթե հայկական քարտով ֆեյսբուքում գովազդ միացնեն, ապա Ռուսաստանում դա կարող է համարվել «ծայրահեղական կազմակերպության ֆինանսավորում»։
Ոչ թե ՌԴ, այլ Հայաստանի ռեզիդենտ են համարվում այն ռուսաստանցիները, որոնք կես տարուց ավելի բնակվում են ՀՀ-ում։ ՀՀ-ի ռեզիդենտ հանդիսացողների տվյալները Ռուսաստանի հարկային մարմինների հետ փոխանակման ենթակա չեն։
Մեկնաբանություն
«Ռուսաստանի Դաշնության հետ որևէ տեղեկատվական փոխանակում Ռուսաստանի քաղաքացիների վերաբերյալ պետք է դադարեցվի: Դա կլինի՝ տնտեսական, ֆինանսական, քաղաքական, չգիտեմ, ինչ ուզում է լինի։
Ցանկացած տվյալի փոխանցում պետք է դադարեցնել, որովհետև այդ տեղեկությունը նա օգտագործելու է որպես ճնշման միջոց իր քաղաքական հակառակորդների նկատմամբ»,- կարծում է իրավապաշտպան Արթուր Սաքունցը։
Հետևեք մեզ — Facebook | Youtube
ՀՀ-ն կտրամադրի օտարերկրյա հարկատուների մասին ինֆորմացիա
