Հարավային Օսիայի նախագահի ընտրությունների առաջին իսկ փուլի արդյունքներով հաղթել է Անատոլի Բիբիլովը

Ըստ պաշտոնական տվյալների՝ Հարավային Օսիայի նախագահի ընտրություններում հաղթել է խորհրդարանի գործող խոսնակ Անատոլի Բիբիլովը: Նա հավաքել է ձայների 57,98%-ը: Երկրի գործող նախագահ Լեոնիդ Տիբիլովը հավաքել է ձայների 30%-ը, նախագահի երրորդ թեկնածու, ՊԱԿ-ի աշխատակից Ալան Գագլոևը՝ ձայների 11%-ը: Ընտրողների մասնակցությունը Հարավային Օսիայում, Հյուսիսային Օսիայում, Մոսկվայում և Աբխազիայում բացված ընտրատեղամասերում կազմել է 81%:

Լեոնիդ Տիբիլովը իր նախընտրական քարոզարշավը կառուցում էր «Կայունություն և զարգացում» կարգախոսի ներքո: Անատոլի Բիբիլովը ակտիվորեն քննադատում էր գործող կառավարությանը անարդյունավետության համար: Ընտրական գործընթացը ուղեկցվում էր բազմաթիվ սկանդալներով և օրենքի խախտման մեջ մեղադրանքներով:

Դիտորդները անսպասելի են համարում այն փաստը, որ Լեոնիդ Տիբիլովին չօգնեց անգամ ՌԴ նախագահ Վլադիմիր Պուտինի հետ վերջերս տեղի ունեցած հանդիպումը: Սովորաբար Հարավային Օսիայում այս փաստարկը մեծ քաշ է ունենում ընտրողի համար:

Նախագահական ընտրություններին զուգահեռ կայացավ նաև Հարավային Օսիայի վերանվանման վերաբերյալ հանրաքվեն: Ընտրողների 78%-ը կողմ է քվեարկել, որպեսզի Օսիայի Հանրապետությունը կոչվի «Հարավային Օսիա — Ալանիայի պետություն»: