Հարավային Օսիայի դատարանն արդարացրել է քաղաքացիական ակտիվիստ Թամարա Մեարաքիշվիլիին
Քաղաքացիական ակտիվիստը Հարավային Օսիայի Ախալգորիից (օսական անվանումը՝ Լենինգոր) շահել է դատական գործը Ցխինվալիի դատարանում:
Գործը վերաբերում էր Հարավային Օսիայի գլխավոր դատախազության դեմ Մեարաքիշվիլիի հայցին, որին նա մեղադրում էր իր հանդեպ ապօրինի քրգործ հարուցելու համար:
Դատարանի որոշումը նշանակում է, որ Մեարաքիշվիլիի դեմ զրպարտության մեղադրանքով դատախազության հարուցված քրեական գործը պետք է վերանայվի: Որոշումը կայացրել է Ցխինվալիի շրջանային դատարանի դատավոր Ֆաթիմա Պարաստաևան:
Մեարաքիշվիլիի դեմ Հարավային Օսիայում երկու քրեական գործ է հարուցվել:
Վերջին ամիսների ընթացքում իրավապահները Մեարաքիշվիլիի համար լուրջ խնդիրներ են ստեղծում. նա մի քանի անգամ ձերբակալվել է և հարցաքննվել, նրա տունը խուզարկել են և փնտրել «էքստրեմիստական» գրականություն: Խուզարկության ժամանակ բռնագրավվել էին նրա անձնական իրերը և փաստաթղթերը, որի պատճառով նա չի կարող լքել Հարավային Օսիայի տարածքը:
Առաջին քրգործը Մեարաքիշվիլիի դեմ կապված էր նրա լրագրողական գործունեության հետ: 2017թ-ի օգոստոսին դատախազությունը նրան զրպարտության մեղադրանք էր առաջադրել «Էխո Կավկազա» առցանց պորտալում լույս տեսած հոդվածի պատճառով, որում նա քննադատել էր Միասնական Օսիա իշխող կուսակցության անդամ Սպարտակ Դրյաևին:
2017թ-ի օգոստոսին Մեարաքիշվիլին դատախազության դեմ հայց էր ներկայացրել Ցխինվալիի դատարան՝ գերատեսչությանը մեղադրելով ապօրինի քրեական հետապնդման համար:
Նրա դեմ երկրորդ քրգործը հարուցվել է 2018թ-ի մարտին. նրան մեղադրել էին փաստաթղթեր կեղծելու և Հարավային Օսիայի քաղաքացիության ապօրինի ստացման համար: Իրավապահների պնդմամբ՝ նրա մոտ երկու անձնագիր էր հայտնաբերվել՝ հարավօսական և վրացական, ինչն արգելված է Հարավային Օսիայի օրենքով:
Մայիսի 3-ին Վրաստանի ժողովրդական պաշտպան Նինո Լոմջարիան Թամարա Մեարաքիշվիլիին մարդու իրավունքների պաշտպանության ոլորտում երկու միջազգային մրցանակի էր ներկայացրել՝ մարդու իրավունքների ոլորտում ՄԱԿ մրցանակի և մարդու իրավունքների ոլորտում Վացլավ Գավելի անվան մրցանակի:
Օմբուդսմենը Մեարաքիշվիլիին շնորհակալություն էր հայտնել հակամարտությունից տուժած մարդկանց պաշտպանության գործում ունեցած ներդրման համար:
«Ակտիվիստ և բլոգեր Թամարա Մեարաքիշվիլին, վտանգելով կյանքն, անվտանգությունն ու առողջությունը, հանրության սեփականություն է դարձնում օկուպացված Ախալգորիում մարդու իրավունքների հետ կապված ծանր իրավիճակը և դե ֆակտո իշխանությունների կողմից տեղի բնակիչների իրավունքների խախտման դեպքերը», — ասված էր Նինո Լոմջարիայի հայտարարությունում:
