Հարավային Օսիայի բանակն այժմ մասամբ ռուսականի մաս է կազմում

Reuters

Հարավային Օսիայի խորհրդարանը վավերացրել է Ռուսաստանի Զինված ուժերի կազմ հարավօսական բանակի առանձին ստորաբաժանումների ներառման կարգի մասին Ռուսաստանի հետ համաձայնագիրը:

«Կողմ» է քվեարկել պատգամավորների մեծ մասը: Երեքը ձեռնպահ են մնացել, իսկ մեկը՝ Դմիտրի Տասոևը, դեմ է արտահայտվել և հայտարարել, որ «այդ փաստաթղթի իմաստը հարավօսական զինված ուժերի փլուզումն է»:

Համաձայնագիրը ստորագրվել է Մոսվայում 2017թ-ի մարտին և դարձել է Դաշնակցության և ինտեգրացիայի մասին ռուս-հարավօսական պայմանագրի մաս:

Պաշտպանության նախարարի պաշտոնակատար Իբրահիմ Գասեևի խոսքով՝ համաձայնագիրը հետևյալ բնույթն է կրում. Հարավային Օսիայի քաղաքացիներն այժմ կարող են ՌԴ զինված ուժերում պայմանագրային զինվորական ծառայություն անցնելու հայտ ներկայացնել և դրա հաստատման դեպքում նրանք կծառայեն Ցխինվալի ռուսական ռազմաբազայում՝ ենթակվելով ռուսական օրենքներին: Համաձայնագրի համաձայն՝ այժմ որպես պայմանագրային զինծառայողների ընդհանուր զինվորական ստաժ կհամարվի նաև Հարավային Օսիայի զինված ուժերում զինծառայությունը:

Հանրապետությունը կսկսի իր զինված ուժերի բարեփոխում՝ հաշվի առնելով այն, որ դրանք կկրճատվեն մի քանի ստորաբաժանումով, ասել է Գասեևը: Նոր կազմակերպչական-հաստիքային կազմին անցումը պետք է ավարտվի կես տարվա ընթացքում:

Գասեևը հաղորդել է նաև, որ Մոսկվան առաջարկում է փուլ առ փուլ ավելացնել Հարավային Օսիայի զինված ուժերի զինծառայողների աշխատավարձերն ու սոցիալական նպաստները:

Հ ամաձայնագիրը խորհրդարանում վավերացնելիս դեմ է արտահայտվել միայն մեկ պատգամավոր՝ Դմիտրի Տասոևը, որը պաշտպանության խորհրդարանական կոմիտեի նախկին նախագահն է:

Տասոևը հայտարարել է, որ համաձայնագրում հստակ մշակված չէ Ռուսական զինված ուժերի կազմ հարավօսական բանակի առանձին ստորաբաժանումների մտնելու մեխանիզմը:

«Մենք կկորցնենք մեր բանակն», — ասել է նա՝ դիմելով մնացած պատգամավորներին:

Դմիտրի Տասոևը վերջերս դարձել է Հարավային Օսիայում խորհրդարանական սկանդալի հերոս, երբ հանրային կերպով բողոք է արտահայտել խորհրդարանի նոր խոսնակ Պյոտր Գասիևի ընտրության, իր կարծիքով, «անընդունելի» հանգամանքների վերաբերյալ: Խոսնակի ընտրությունը Տասոևն անվանել է «ապտակ ժողովրդին, հանցագործ դավադրության փաստ, … կեղծիք և ժողովրդին դաժանորեն խաբելու փաստ»:

Ի պատասխան խորհրդարանոը նրա հանդեպ անվստահություն է հայտնել:

Այս անգամ Տասոևին անուղղակիորեն աջակցել է երեք պատգամավոր, որոնք ձեռնպահ են մնասել քվեարկությանը: Բոլորը երեքը ներկայացնում են

«Ժողովրդական կուսակցությունը»: Նրանք հայտարարել են, որ համաձայն չեն համաձայնագրի որոշ կետերին, նշել են նաև, որ պատգամավորները չեն մասնակցել փաստաթղթի մշակմանը:

Նրանցից մեկը՝ Ամիրան Դյակոնովը, «Էխո Կավկազա» մեդիապորտալին տված հարցազրույցում ասել է, որ սկզբնական փաստաթղթում, որը քննարկվում էր երկու տարի առաջ, ենթադրվում էր, որ ամբողջ հարավօսական զինվորական ստորաբաժանումներ անցնելու են ռուսական հրամանատարության տակ, այսինքն՝ դրանք պահպանվելու էին որպես մարտական միավորներ:

Սակայն վավերացված փաստաթղթում խոսվում է այլ բանի մասին. որ հարավօսական զինվորականներն անհատական կարգով պայմանագրեր են կնքելու ռուսական պաշտպանական գերատեսչության հետ: «Դա նշանակում է, որ հարավօսական ստորաբաժանումները լուծարվում են», — ասել է Դյակոնովը:

Հրապարակման մեջ տեղ գտած տերմինները, տեղանունները, մտքերը և գաղափարները պարտադիր չէ, որ համընկնեն JAMnews-ի կամ նրա առանձին աշխատակիցների կարծիքների և գաղափարների հետ: JAMnews-ն իրավունք է վերապահում հեռացնել հրապարկումների վերաբերյալ արված այն մեկնաբանությունները, որոնք կգնահատվեն որպես վիրավորական, սպառնալիք պարունակող, բռնություն հրահրող կամ այլ պատճառներով էթիկապես անընդունելի