Արցախի հանրապետության դատախազությունից հայտնում են, որ պարզվել է Լեռնային Ղարաբաղի խաղաղ բնակչին սպանած ադրբեջանցի զինծառայողի ինքնությունը։ Խոսքը 65-ամյա Սեյրան Սարգսյանի սպանության մասին է։ Դեկտեմբերի 3-ին տեղեկություն էր տարածվել, որ անասնապահությամբ զբաղվող տղամարդը մոլորվել և հայտնվել է ադրբեջանական զինուժի վերահսկողության տակ գտնվող տարածքում։ Նրան Ադրբեջանի զինծառայողները բերման են ենթարկել, տեղափոխել ադրբեջանական դիրք, որտեղ էլ սպանել են։
Ադրբեջանական կողմը չի հերքել այս տեղեկությունը, սակայն հայտարարել է, որ կրակոցն արձակվել է ադրբեջանական բանակի դիրքերից մեկում հերթապահություն իրականացնելու ժամանակ հարձակման ենթարկված զինծառայողի կողմից։
Սակայն դեկտեմբերի 4-ին հայկական կողմը հավելյալ մանրամասներ է հրապարակել, որոնք ի հայտ են եկել հետաքննության ընթացքում։ Մասնավորապես, հաղորդվում է, որ սպանվածը չի մոլորվել, այլ առևանգվել է չեզոք գոտի համարվող տարածքից։ Ավելին, կան դիտավորյալ սպանության կատարումն ապացուցող համոզիչ ու անհերքելի փաստեր, այդ թվում՝ տեսագրություն։
Տեղի ունեցածի բոլոր մանրամասները՝ հայկական և ադրբեջանական կողմերի տրամադրած տեղեկատվության համաձայն։
Ադրբեջանի պաշտպանության նախարարությունը հայտնել է, որ դեկտեմբերի 3-ին՝ ժամը 13:00-ի սահմաններում, Խոջավենդի շրջանի ադրբեջանական բանակի դիրքերից մեկում հերթապահություն իրականացնող զինծառայողի վրա հարձակվել է հայազգի անձը.
«Տղամարդը փորձել է վերցնել զենքը։ Մեր զինծառայողը, նախապես օդ կրակելով, ինքնապաշտպանության նպատակով վնասազերծել է իր վրա հարձակված սադրիչին։ Միջադեպի մասին զեկուցվել է ռուսական խաղաղապահ կոնտինգենտի հրամանատարությանը և ռուս-թուրքական համատեղ մոնիտորինգի կենտրոնին։ Կատարվում է հետաքննություն»։
Տեղեկատվություն Երևանից
Հայաստանի իրավապահ մարմինները հայտնում են, որ կան անհերքելի ապացույցներ խաղաղ բնակչի սպանության վերաբերյալ, դրանք կփոխանցվեն ռուսական կողմին՝ դեպքի բոլոր հանգամանքների ամբողջական քննության համար։
Սակայն այս պահին ՌԴ խաղաղապահ ուժերի դատախազության հետ համագործակցությամբ արդեն պարզվել է, որ «Արցախի քաղաքացու սպանությունը կատարել է Ադրբեջանի քաղաքացի, շարքային Ռահիմզադե Դավիդ Գաբիլօղլին»:
Ռուսաստանի, Հայաստանի և Ադրբեջանի գլխավոր դատախազների միջև ձեռք բերված պայմանավորվածության շրջանակում դեպքի վայր է ժամանել ռուսական խաղաղապահ զորախմբի դատախազը։ Նա արդեն հնարավորություն է ունեցել հանդիպելու ադրբեջանական կողմի ականատեսների հետ, զրուցել անձամբ Ռահիմզադեի հետ։
Հաղորդվում է նաև, որ այս պահին ռուսական կողմի միջնորդությամբ դիտարկվում է Ադրբեջանի և Հայաստանի զինված ուժերի ղեկավարության հետ աշխատանքային հանդիպում անցկացնելու հնարավորությունը։
Հայկական լրատվամիջոցները հիշեցնում են, որ սա խաղաղ բնակչի սպանության արդեն երրորդ դեպքն է 2020 թվականի նոյեմբերի 10-ից, այսինքն՝ Ղարաբաղում հրադադարի ռեժիմի հաստատումից ի վեր։
ԱԳՆ-ների հայտարարությունը
Հայաստանի արտգործնախարարության մամուլի քարտուղար Վահան Հունանյանը հանդես է եկել հայտարարությամբ, որում դատապարտել է ադրբեջանցի զինծառայողի կողմից խաղաղ բնակչի սպանությունը.
«Հատկանշական է, որ Արցախի հայ քաղաքացիական բնակչության դեմ հարձակումներն ու ահաբեկման գործողությունները համակարգային բնույթ են ստանում: […] Վերջին շրջանում Արցախի քաղաքացիական բնակչության նկատմամբ ադրբեջանական զինված ուժերի կողմից իրականացված հանցագործությունները, Ադրբեջանի իշխանությունների կողմից վարվող հայատյացության և Արցախի հայաթափման ու էթնիկ զտումների քաղաքականության շարունակությունն են, ինչը ևս մեկ անգամ վկայում է, որ Արցախի հայերի ֆիզիկական անվտանգության ու կյանքի իրավունքի երաշխավորումն անհնար է Ադրբեջանի իրավասության կամ ենթակայության ներքո։
Այս և քաղաքացիական բնակչության նկատմամբ նախկինում իրականացված հարձակումների պատշաճ հետաքննությունը և մեղավորներին պատասխանատվության ենթարկելը կարող են նախադրյալներ ստեղծել՝ նմանատիպ հանցագործությունները հետագայում կանխելու համար»։
ԼՂՀ արտաքին գործերի նախարարությունը նույնպես դատապարտել է Ադրբեջանի ահաբեկչական քաղաքականությունը և կոչ է արել միջազգային հանրությանը համարժեք գնահատական տալ Ադրբեջանի զինված ուժերի գործողություններին։
Նախարարության հայտարարության մեջ ասվում է, որ Բաքվի քաղաքականությունը «բիրտ հարված է Ռուսաստանի կողմից իրականացվող խաղաղապահ առաքելությանը»։
