«ՌԴ-ն Հայաստանի վրա ազդելու շատ ավելի մեծ կարողություն ունի, քան Մոլդովայի»․ կարծիք
Հայաստան-Մոլդովա զուգահեռներ ԵՄ-ում
«Հայաստանում մյուս տարի ընտրություններ են, և մենք պետք է տեսնենք, թե ինչ կարող ենք անել նրանց օգնելու համար։ Հայերը դիմել են մեզ՝ խնդրելով արտաքին միջամտության դեմ պայքարում նույնպիսի աջակցություն ցուցաբերել, ինչպիսին մենք տրամադրել էինք Մոլդովային»,- այսօր հայտարարել է ԵՄ արտաքին գործերի և անվտանգության քաղաքականության հարցերով բարձր հանձնակատար Կայա Կալասը։ Վերջերս նա հայտնել էր նաև, որ միությունը ՀՀ-ին կտրամադրի 15 մլն եվրո, այդ թվում՝ հիբրիդային հարձակումների և ապատեղեկատվության դեմ պայքարի համար։
Արձագանքելով ԵՄ բարձր հանձնակատարի հայտարարությանը՝ ՀՀ Էկոնոմիկայի նախարար Գևորգ Պապոյանը Հայաստանի դեմ հիբրիդային հարձակումները հնարավոր է համարել։ Միաժամանակ շեշտել է՝ ժողովրդավարությունն իրավունք ունի ինքն իրեն պաշտպանել։
«Ժողովրդավարությունը դրա համար պետք է ունենա, այո, փող, անհրաժեշտ ուժ։ Պետք է ունենա գիտելիքներ և անհրաժեշտ ժամանակին գործի կտրուկ և հատուկ»,- նկատել է Պապոյանը։
Թե որ երկրից են հիբրիդային սպառնալիքները՝ պաշտոնյան չի հստակեցրել։ Հայաստանյան փորձագետները, սակայն, սկսել են ահազանգել 2026 թ․-ի խորհրդարանական ընտրություններին ընդառաջ Ռուսաստանից եկող վտանգների մասին։
Հայկական խորհրդի նախագահ, քաղաքագետ Արեգ Քոչինյանը Factor TV-ի եթերում նկատել է՝ Ռուսաստանը շատ ավելի մեծ կարողությունների է տիրապետում Հայաստանի ներսում, քան Մոլդովայում, որտեղ վերջերս են ընտրական գործընթացներ տեղի ունեցել։
«Խոսքը և՛ քաղաքական գործիչների, ուժերի բացահայտ գնվածության մասին է, և՛ ուղիղ կարողությունների՝ տարբեր լրատվականներ, բարեգործական հիմնադրամներ, կազմակերպություններ։ Սրանք բոլորը մեծացնելու են հաջողության իրենց հնարավորությունները»,- նկատել է նա և հավելել՝ ՀՀ-ն պետք է դիմադրունակության ավելացման պետական միջոցառումներ ձեռնարկի։
- ԵՄ-ն ու Ադրբեջանը․ մարդու իրավունքները՝ էներգետիկ քաղաքականության ստվերում
- «ՀՀ-ԵՄ գործընկերության նոր էջ»․ Բրյուսելում ռազմավարական օրակարգ է հաստատվել
- Հստակեցվում է ՀՀ-ի մասնակցության շրջանակը ԵՄ ճգնաժամային կառավարման գործողություններին
«Պետք է հիբրիդային հարձակումներից պաշտպանենք մեր պետությունը»․ Էկոնոմիկայի նախարար
«Հայաստանի նկատմամբ, իհարկե, հնարավոր է լինեն հիբրիդային հարձակումներ։ Մասնավորապես՝ մեր ժողովրդավարությունը վտանգի տակ դնեն և տարբեր տեսակի կեղծ լուրերով կամ ընտրակաշառքային մեխանիզմներով փորձ կատարվի որոշակի շրջանակների կողմից, որոնք տիրապետում են միլիարդավոր դոլարների, ազդել ընտրությունների վրա, կամ որոշակի երկրներից, որոնք թիրախային չեն ցանկանա, որպեսզի ՀՀ-ում լինեն ազատ, ժողովրդավարական ընտրություններ և ժողովրդի կողմից ընտրված իշխանություն»,- նկատել է ՀՀ Էկոնոմիկայի նախարարը։
Գևորգ Պապոյանը լրագրողների հետ ճեպազրույցում շեշտել է՝ երկրների սուվերեն իրավունքն է պաշտպանել իրենց և իրենց ժողովուրդների շահը։
«Շատ նորմալ է, որ մենք այդպիսի հարձակումներից մեր ժողովրդավարությունը և մեր պետությունը պաշտպանենք»,- հավելել է նա։
Լրագրողները հետաքրքրվել են՝ Ռուսաստա՞նն է ՀՀ դեմ հիբրիդային պատերազմ վարում, թե՞ Եվրամությունը։
«Ես որևէ երկրի կամ տարածաշրջանի անուն չտվեցի։ Ցանկացած երկիր կամ տարածաշրջան, ցանկացած անձ՝ կլինի նախկին պաշտոնյա, այլ երկրի օլիգարխ, եթե նա փորձի ազդել Հայաստանի ընտրությունների վրա կեղծիքների, փողի, ընտրակաշառքի, կեղծ լուրեր տարածելու տարբեր տեսակի, ընդհանրապես ժողովրդավարության վրա տարբեր հարձակումերով, դա ոչ միայն ժողովրդավարության իրավունքն է, այլ պարտավորությունն է պաշտպանել իրեն»,- պատասխանել է նախարարը։
Նրա խոսքով՝ ԵՄ երկրներն ունեն տարբեր տեսակի հիբրիդային հարձակումներից պաշտպանվելու հաջողված փորձ, որը կարելի է կիրառել։
Փորձագիտական կարծիք
Հայկական խորհրդի նախագահ, քաղաքագետ Արեգ Քոչինյանի խոսքով՝ ռազմավարական հեռանկարում ինքնիշխանության պահպանության տեսակետից Հայաստանի համար ամենամեծ սպառնալիքը Ռուսաստանն է։
«Դիվերսիֆիկացիայով զբաղվենք, թե ոչ, Ադրբեջանի հետ հարաբերությունները փորձենք կարգավորել, թե ոչ, շարունակելու ենք հարվածներ ստանալ Ռուսաստանից։ Որովհետև մեզ հետ կապված ՌԴ վերջնանպատակը անկախ, ժամանակակից պետություն ունենալու մեր ցանկության հետ անհամադրելի է»,- նկատել է նա։
Վերլուծաբանի կարծիքով՝ Մոսկվան ուզում է, որ ՀՀ-ն դառնա իր մասը՝ Թաթարստանի օրինակով։
Factor TV-ի եթերում Քոչինյանը նշել է՝ ՀՀ-ի ամենամեծ կախվածությունը ՌԴ-ից երկրի անվտանգությունն է։ Իսկ տնտեսական կախվածությունը դրա հետևանքն է, ոչ թե պատճառը։ Հանգուցալուծման համար, ըստ նրա, պետք է կարգավորել հարաբերություններն Ադրբեջանի և Թուրքիայի հետ, ինչն էլ թույլ կտա կառուցել «ժամանակակից, հաջողված և հարատև պետություն՝ ՀՀ»։
Քաղաքագետի գնահատմամբ՝ 2026 թ․-ի խորհրդարանական ընտրությունները երրորդ հանրապետության պատմության մեջ ամենակարևորն են լինելու Հայաստանի ապագայի տեսանկյունից․
«Եթե ոչինչ չի փոխվում քաղաքական ուժերի համամասնության, կարողությունների և ամբիցիաների մեջ, եթե չի ձևավորվում որևէ երրորդ բևեռ, որն այլընտրանք է ստեղծում, սա դառնում է ինչ-որ չափով ընտրություն ժողովրդավարական և ոչ ժողովրդավարական ապագայի, խաղաղություն կառուցելու և չկառուցելու, արտաքին քաղաքականությունը դիվերսիֆիկացնելու և ռուսահպատակության միջև»։
Անդրադառնալով Հայաստան-Մոլդովա զուգահեռներին՝ Քոչինյանն ասել է՝ Մոլդովան դիմադրեց ռուսական միջամտությանն ու ազդեցություն գործելու փորձերին։ Մյուս կողմից նկատել է՝ Ռուսաստանը Մոլդովայում չուներ այնքան կարողություն, որքան ունի Հայաստանում։ Խոսքն ինչպես քաղաքական տարբեր ուժերի հետ ունեցած կապերի, այնպես էլ քարոզչական գործիքների՝ ԶԼՄ-ների, հիմնադրամների ու այլ կառույցների մասին է։
«Մինչ այս պահը չեմ տեսնում ՀՀ-ում լուրջ պետական մակարդակի դիմադրունակության ավելացման միջոցառումներ, գործողություններ։ Դրա փոխարեն կարծես թե ամեն բան կառուցված է հասարակության դիմադրունակության վրա։ Սակայն ժողովրդի լայնախոհությունը պետք է լինի ամենավերջին գործիքը»,- նկատել է նա։
Արեգ Քոչինյանի համոզմամբ՝ թյուր են կարծիքները, թե ժողովրդավարությունը չի կարող ինքնապաշտպանվել, մարտունակ չէ կամ չունի համապատասխան գործիքներ ինքն իրեն պաշտպանելու համար։
«Կա Ռումինիայի օրինակը, կա Մոլդովայի օրինակը, մերձբալթյան երկրների, Լեհաստանի օրինակները, որտեղ այդ բոլոր հիբրիդային գործիքակազմերն օգտագործվում են, լրջագույն հարվածներ են հասցվում։ Բայց այդ պետությունները կարողանում են դիմադրել ու հակահարված հասցնել»,- ամփոփել է նա։
Հետևեք մեզ — Facebook | Youtube
Հայաստան-Մոլդովա զուգահեռներ ԵՄ-ում
